Skip to main content

மாணவர்களின் போராட்டத்துக்கு அஞ்சி அதை திசை திருப்புகிறார்கள் - ஆளூர் ஷானவாஸ் பேச்சு!

Published on 05/02/2020 | Edited on 06/02/2020

மாணவர்கள் அமைப்பு சார்பாக நடைபெற்ற கூட்டத்தில் கலந்துகொண்ட விசிக-வை சேர்ந்த ஆளூர் ஷானவாஸ் மத்திய அரசை கண்டித்து கடுமையாக பேசினார். இதுதொடர்பாக அவர் பேசியதாவது,  பல்கலைக்கழகத்தின் அரங்குகளில் நடத்தப்பட வேண்டிய நிகழ்ச்சிகள் இன்று வெளியே அரங்கு பிடித்து நடத்துகின்ற சூழ்நிலைகளில் நாம் இருக்கின்றோம். இதே வலதுசாரி அமைப்புக்கள் நடத்தும் நிகழ்ச்சிகளுக்கு இத்தகைய பிரச்சனைகள் வருவதில்லை. அத்தகைய அமைப்புகள் ஐஐடி முதல் சாதாரண கல்லூரி வரை அவர்களுக்கு பிடித்தவர்களை  அழைத்து வந்து கூட்டம் நடத்த முடிகின்றது. அதில் சுப்பரமணியன் சுவாமி முதல் ஹெச்.ராஜா வரை யாரை வேண்டுமானாலும் அழைத்து கூட்டம் நடத்தலாம் என்ற சுதந்திரம் அவர்களுக்கு இருக்கின்றது. நம்மை போன்ற ஜனநாய சக்திகள் நிகழ்ச்சி நடத்த போனால் கலவரம் செய்து அதனை தடுக்கப் பார்க்கிறார்கள். அப்படிபட்ட வளாகங்களாக அதனை மாற்றிவிட்டார்கள். இந்த நிலையில் பல்கலைகழங்களுக்கு வெளியேதான் நிகழ்ச்சி நடத்த வேண்டிய சூழ்நிலைகளுக்கு நம்முடைய மாணவர்கள் தள்ளப்பட்டுள்ளனர். மத்தியில் பாஜக ஆட்சி அமைந்து எத்தனையோ சட்டதிருத்தங்களை கொண்டு வந்து இருக்கிறார்கள். அதனை எல்லாம் எவ்வித எதிர்ப்புக்களும் இல்லாமல் நிறைவேற்றியும் இருக்கிறார்கள். ஆனால் அதை போன்று ஏன் குடியுரிமை மசோதாவை நிறைவேற்ற முடியவில்லை. முத்தலாக், காஷ்மீர் விவகாரத்தை போல் ஏன் இதை கடந்து செல்ல முடியாமல் அவர்கள் தவிக்கிறார்கள். ஏனென்றால் அவர்களின் முகமூடிகளை தற்போது மக்கள் அறிய துவங்கிவிட்டார்கள்.
 

fgh



வரலாற்றில் முதல் முறையாக தாங்கள் கொண்டுவந்த சட்டத் திருத்தத்தை ஆதரித்து முதல்முறையாக பிரதமர் முதல் பாஜகவின் கடைமட்ட தலைவர்கள் வரை கூட்டங்களில் பேசுகிறார்கள், துண்டறிக்கை கொடுக்கிறார்கள், பொதுக்கூட்டங்களில் பேசுகிறார்கள். தாங்கள் கொண்டுவந்த சட்டத்தை ஆதரித்தே ஏன் போராடி கொண்டிருக்கிறார்கள், ஏனென்றால் இந்த சட்டத்தை எதிர்த்து வெகுமக்கள் போராடினார்கள். குறிப்பாக முன் எப்போதும் இல்லாமல் மாணவர்கள் போராடினார்கள். மாணவர்கள் போராட்டத்துக்கு மிகப்பெரிய வலிமை இருக்கிறது, அது சமூகத்தில் பெரிய தாக்கத்தை ஏற்படுத்தும் என்று கருதப்படுகின்றது. அதற்கு மோடி அரசு அஞ்சுகின்றது. இரும்பு மனிதர் என்று சொல்லப்படுகின்ற அமித்ஷா மாணவர்களை பார்த்து பயப்படுகிறார். அதனால் தான் அந்த சட்டத்தை ஆதரித்து, ஒரு இயக்கத்தை ஆரம்பிக்கின்ற நிலைக்கு அவர்கள் சென்றுள்ளார்கள். அவர்கள் எப்படி பயப்பட்டால் தனியாக இயக்கம் ஆரம்பிக்கும் நிலைக்கு சென்றிருப்பார்கள். எத்தனை விளக்க கூட்டங்களை அவர்கள் நடத்துகிறார்கள். ஆனால் மக்கள் அவர்களை நம்ப மறுக்கிறார்கள் என்பது தற்போது அவர்களுக்கு புரிய வந்திருக்கிறது. அதனால்தான் மாணவர்கள் போராட்டத்தை சமூகவிரோதிகள் நடத்துகின்ற போராட்டம் என்று திசை திருப்புகிறார்கள். ஆனால் அவர்களின் எண்ணம் எப்போதும் நிறைவேறாது. மாணவர்கள் போராட்டம் தோற்றதாக வரலாறு இல்லை. நிச்சயம் அது அடுத்த கட்டத்துக்கு செல்லும்" என்றார்.

 

Next Story

பிரகாஷ்ராஜுக்கு அம்பேத்கர் சுடர் விருது!

Published on 29/04/2024 | Edited on 29/04/2024
vck president thirumavalavan anoounced 20204 ambedkar sudar award to prakash raj

பிரகாஷ் ராஜ், நடிப்பைத் தாண்டி சமூக நலன் சார்ந்த பணிகள், அரசியல் என மற்ற தளங்களிலும் பயணித்து வருகிறார். மேலும் சமூக வலைத்தளத்தில் பிரதமர் மோடி குறித்தும், மத்தியில் ஆளும் பாஜக அரசு குறித்தும் கடுமையான விமர்சனங்களை முன்வைத்து வருகிறார். நாடாளுமன்ற தேர்தல் நடந்து வரும் நிலையில் ஏழு கட்ட வாக்குப்பதிவில், இரண்டு கட்ட வாக்குப்பதிவுகள் நடைபெற்று முடிந்துள்ளது. அந்த வகையில் இரண்டாம் கட்ட வாக்குப்பதிவின் போது, பெங்களூருவில் வாக்களித்த பிரகாஷ் ராஜ், மாற்றத்திற்காக மற்றும் வெறுப்பிற்கு எதிராக வாக்களித்ததாக கூறினார். 

இந்த நிலையில் வி.சி.க. சார்பில் பிரகாஷ் ராஜுக்கு விருது அறிவிக்கப்பட்டுள்ளது. வி.சி.க. சார்பில் தமிழகம் மற்றும் இந்திய அளவில் ஆண்டுதோறும் சமூகம், அரசியல், பண்பாடு, கலை-இலக்கியம் போன்ற தளங்களில் சிறப்பாக தொண்டாற்றும் நபர்களுக்கு, ‘அம்பேத்கர் சுடர், பெரியார் ஒளி, காமராசர் கதிர், அயோத்திதாசர் ஆதவன், காயிதேமில்லத் பிறை மற்றும் செம்மொழி ஞாயிறு’ ஆகிய பெயர்களில் விருதுகள் வழங்கப்பட்டு வருகிறது. 

2007ஆம் ஆண்டு முதல் இந்த விருதுகள் வழங்கப்பட்டு வரும் நிலையில், 2024ஆம் ஆண்டிற்கான ‘அம்பேத்கர் சுடர்’ விருதை பிரகாஷ்ராஜுக்கு வழங்குவதாக வி.சி.க. சார்பில் தெரிவிக்கப்பட்டுள்ளது. இது தொடர்பாக வி.சி.க. வெளியிட்டுள்ள அறிக்கையில், “மதச்சார்பின்மைக்காக சமரசமில்லாமல் போராடி வருபவர் பிரகாஷ்ராஜ்” என குறிப்பிடப்பட்டுள்ளது. இந்த விருதுகள் அடுத்த மாதம் 25ஆம் தேதி, (25.05.2024) சென்னையில் நடைபெறுமென அறிவிக்கப்பட்டுள்ளது. கடந்த 26ஆம் தேதி நடந்த இரண்டாம் கட்ட தேர்தல் வாக்குப்பதிவின் போது திருமாவளவனும்,பிரகாஷ் ராஜும் சந்திப்பு மேற்கொண்டனர் என்பது குறிப்பிடத்தக்கது. கடந்த ஆண்டுக்கான அம்பேத்கர் சுடர் விருது சி.பி.ஐ. (எம்.எல்) கட்சியின் பொதுச் செயலாளர் தீபங்கர் பட்டாச்சார்யாவிற்கு வழங்கப்பட்டது நினைவுகூரத்தக்கது.  

Next Story

2024 ஆம் ஆண்டிற்கான விசிக விருதுகள் அறிவிப்பு!

Published on 29/04/2024 | Edited on 29/04/2024
2024 Vck Awards Announcement!

விடுதலைச் சிறுத்தைகள் கட்சியின் சார்பில் தமிழகம் மற்றும் இந்திய அளவில் ஆண்டுதோறும் பல்வேறு தளங்களில் சாதனைகள் படைத்தவர்களுக்கு விருதுகள் வழங்கப்பட்டு வருகிறது. அதாவது சமூகம், அரசியல், பண்பாடு, கலை-இலக்கியம் போன்ற தளங்களில் சீரிய முறையில் தொண்டாற்றுபவர்கள் உள்ளிட்ட பல்வேறு ஆளுமையினருக்கு, “அம்பேத்கர் சுடர், பெரியார் ஒளி, காமராசர் கதிர், அயோத்திதாசர் ஆதவன், காயிதேமில்லத் பிறை மற்றும் செம்மொழி ஞாயிறு” ஆகிய விருதுகள் 2007 முதல் ஆண்டுதோறும் வழங்கப்பட்டு வருகிறது. 2022 ஆம் ஆண்டு முதல் ‘மார்க்ஸ் மாமணி’ விருதும் வழங்கப்பட்டு வருகிறது.

அதன்படி தமிழகத்தின் முன்னாள் முதல்வர் கலைஞர், தமிழக முதல்வர் மு.க.ஸ்டாலின், கேரள முதலமைச்சர் பினராயி விஜயன், மேனாள் கர்நாடக முதலமைச்சர் சித்தாரமையா, திராவிடர் கழக தலைவர் கி.வீரமணி, எழுத்தாளர் அருந்ததி ராய், தோழர் து.ராஜா, இலக்கியச் செல்வர் குமரிஅனந்தன், தமிழ்நாடு காங்கிரஸ் தலைவர் கே.எஸ். அழகிரி, பாவலரேறு பெருஞ்சித்திரனார், உணர்ச்சிப் பாவலர் காசி ஆனந்தன், சொல்லின் செல்வர் ஆ.சக்திதாசன், பாவலர் வை.பாலசுந்தரம், பேராசிரியர் காதர்மொய்தீன், பேராசிரியர் ஜவாஹிருல்லா, ஏ.எஸ். பொன்னம்மாள், கிருஷ்ணம்மாள் ஜெகந்நாதன் உள்ளிட்டோருக்கு  இதுவரை விசிக விருதுகள் வழங்கப்பட்டுள்ளன.

இந்நிலையில் 2024 ஆம் ஆண்டுக்கான விசிக - விருதுகள் அறிவிக்கப்பட்டுள்ளன. அதில் அம்பேத்கர் சுடர் விருது - நடிகர் பிரகாஷ்ராஜ், பெரியார் ஒளி விருது - வழக்கறிஞரும், திராவிடர் கழக பிரச்சாரச் செயலாளருமான அருள்மொழி, மார்க்ஸ் மாமணி விருது - இந்திய கம்யூனிஸ்ட் கட்சியின் மாநிலச் செயலாளர் இரா. முத்தரசன், காமராசர் கதிர் விருது - இந்திய சமூக நீதி இயக்கத்தின் தலைவர் பேராயர் எஸ்றா சற்குணம், அயோத்திதாசர் ஆதவன் விருது - பேராசிரியர் ராஜ்கௌதமன், காயிதேமில்லத் பிறை விருது - வெல்ஃபேர் பார்ட்டி ஆஃப் இந்தியா அமைப்பின் முன்னாள் மாநிலத் தலைவர்  எஸ்.என். சிக்கந்தர், செம்மொழி ஞாயிறு விருது - கல்வெட்டியலறிஞர் எ. சுப்பராயலுவுக்கும் வழங்கப்பட உள்ளது. இந்த விருதுகள் வழங்கும் விழா மே 25 ஆம் தேதி (25.05.2024) சென்னையில் நடைபெற உள்ளது. இதற்கான அறிவிப்பை விசிக தலைவர் தொல். திருமாவளவன் எம்.பி. வெளியிட்டுள்ளார்.