Skip to main content

ஜெ. காலத்தைப் போல இருந்துவிடக் கூடாது..! சண்ட ஓயவே கூடாது! பா.ஜ.க. ப்ளான்!

Published on 06/10/2020 | Edited on 06/10/2020

 

ops eps

 

தமிழகத்தை அ.தி.மு.க. ஆளும்போதெல்லாம் அதன் எதிர்காலத்தை இந்தியாவை ஆளும் தேசிய கட்சிகள்தான் தீர்மானிக்கின்றன. தி.மு.க., அ.தி.மு.க. பிரிந்தபோது எம்.ஜி.ஆரை இந்திரா காந்தி ஆதரித்தார். அ.தி.மு.க. என்கிற கட்சி வலுப்பெற்றது. ஜானகி, ஜெயலலிதா சண்டையின்போது முதலில் ஒற்றுமையாக இருங்கள் என்று கூறிய ராஜீவ் காந்தி, பின்னர் ஜெயலலிதாவை ஆதரித்தார். ஜானகி அரசியல் துறவறம் பூண்டார்.

 

சசிகலா சிறைக்கு சென்றபோது எடப்பாடி பழனிசாமியை ஆளும் பா.ஜ.க. ஆதரித்தது. எடப்பாடி நான்கு ஆண்டுகால ஆட்சியைத் தொடர்ந்தார். மத்தியில் யார் ஆட்சியில் இருக்கிறார்களோ, அவர்களின் ஆதரவு பெற்ற கட்சிகள்தான் தமிழகத்தில் வலுப்பெறும். இந்த நிகழ்வு இப்பொழுது அ.தி.மு.க.வில் நிகழ்ந்து வரும் குழப்பங்களுக்கும் பொருந்தும்.

 

எடப்பாடி, ஓ.பி.எஸ்., சசிகலா இந்த மூவரில் யாரை பா.ஜ.க. ஆதரிக்கிறதோ அவர்கள்தான் வெற்றி பெறுவார்கள். இந்த சூழ்நிலையில் மூவருமே டெல்லி பா.ஜ.க.வின் தயவை நாடியிருக்கிறார்கள். ஓ.பி.எஸ். எப்பொழுதும் டெல்லி பா.ஜ.க.வின் லைம்லைட்டிலேயே இருப்பவர். எடப்பாடி மத்திய அமைச்சர் பியூஷ்கோயல் மூலம் பா.ஜ.க.வின் ஆதரவை பெறுவார். திரிவேணி பில்டர்ஸ் என்கிற அதானிக்கு நெருக்கமான கட்டுமான நிறுவனம்தான் எடப்பாடியையும் பா.ஜ.க.வையும் இணைக்கும் புள்ளி.

 

sddd

 

சசிகலாவைப் பொறுத்தவரை அவர் சிறைக்கு சென்றபோது பா.ஜ.க. எதிர்ப்பாளராகத்தான் சென்றார். தொடர்ந்து பா.ஜ.க. சசிகலா மீது பாய்ந்தது. இரட்டை இலை வழக்கில் தினகரனை திகார் சிறைக்கே அனுப்பி வைத்தது. தொடர்ந்து வருமான வரித்துறை ரெய்டுகள், சொத்து முடக்கம் என சசிகலாவுக்கு எதிராகவே பா.ஜ.க. செயல்பட்டு வந்தது. சிறையில் இருந்து வெளியே வர தயாராகிக் கொண்டிருக்கும் சசிகலா செய்த முதல் காரியம் பா.ஜ.க.வுடன் இணக்கமாகப்போக முடிவு செய்ததே. அதற்கு அவர் தனது சொந்த பந்தங்கள் யாரையும் நம்பவில்லை.

 

அவருக்கு நெருக்கமான தொழில் அதிபர்கள் மூலம் ராஜ்நாத்சிங்கை சந்தித்தார். கட்சியின் தலைவர் ஜெ.பி. நட்டா என்றாலும் கட்சி சம்பந்தமான முடிவுகளை மேற்கொள்வதற்கு ராஜ்நாத் சிங், ஜெ.பி. நட்டாவிற்கு உறுதுணையாக இருக்கிறார். ராஜ்நாத்சிங், ஜெ.பி.நட்டா, மத்திய அமைச்சர் பியூஷ் கோயல் இவர்களுடன் ராஜஸ் தானைச் சேர்ந்த ஆர்.எஸ்.எஸ். பிரச்சாரகரான பூபேந்திர யாதவ் ஆகிய நால்வர்தான் தமிழக அரசியலை கையாளு கிறார்கள்.

 

இதில் தலையான ராஜ்நாத் சிங்கிடம் பேசிய சசிகலாவுக்கு நெருக்கமான தொழிலதிபர்கள் ராஜ்நாத்சிங் என்ன சொல்கிறார் என்பதை சசிகலாவிடம் சொல்லுவார்கள். இந்த பேச்சுவார்த்தை ஆரம்பித்து மூன்று மாதங்கள் ஆகிவிட்டது. படிப்படியாக நடைபெற்ற இந்த பேச்சுவார்த்தை இறுதிக்கட்டத்தை எட்டியிருக்கிறது.

 

dddd

 

இன்னும் ஒரு சிக்னல் கிடைத்தால் சசிகலா அவர் கட்ட வேண்டிய அபராதத் தொகையான 10 கோடி ரூபாயை கட்டிவிடுவார். அவரது விடுதலை ஜனவரி மாதத்திற்கு முன்பே நடந்துவிடும் என்கிறார்கள் சசிகலாவுக்கு நெருக்கமான மன்னார்குடி வட்டாரத்தினர்.

 

சசிகலா இதுபோல ஒரு பேச்சுவார்த்தையை நடத்துகிறார் என எடப்பாடிக்கும் தெரியும். இந்த சூழ்நிலையில்தான் திடீரென டி.டி.வி.தினகரன், சசிகலாவுக்காக பா.ஜ.க. தலைவர்களுடன் பேசுகிறேன் என தனி விமானத்தை எடுத்துக்கொண்டு டெல்லிக்குப் போனார். டெல்லிக்குச் சென்ற தினகரன், பியுஷ் கோயலை நேரடியாக சந்திக்க முயன்றார். அதேபோல் பூபேந்திர யாதவிடமும் பேச முயன்றார். இருவரும் செல்போனில் தினகரனிடம் பேசியிருக்கிறார்கள்.

 

"நாங்கள்தான் அ.தி.மு.க. ஒற்றுமையாக இருக்க வேண்டும் என சொல்லியிருக்கிறோம். நீங்கள்போய் சசிகலாவை நேரில் சந்தித்துப் பேசி அதற்கான வேலைகளை செய்யுங்கள். எங்களைப் பொறுத்தவரை எடப்பாடி, ஓ.பி.எஸ்., சசிகலா ஆகிய மூவரும் இணைய வேண்டும் என்பதுதான் பா.ஜ.க.வின் நிலை'' என பியூஷ்கோயல் விளக்கமாக தினகரனிடம் பேசியிருக்கிறார்.

 

பியூஷ் கோயலிடம் பேசிவிட்டு வந்த பிறகு சசிகலாவை நேரில் சந்திக்க தினகரன் முயற்சி செய்தார். கரோனா காலத்தை காரணம் காட்டி பரப்பன அக்ரஹார சிறை அதிகாரிகள் தினகரனை சந்திக்க அனுமதிக்கவில்லை. தினகரனின் வழக்கறிஞரான ராஜா செந்தூர்பாண்டியை பெங்களூருவுக்கு அனுப்பி சசிகலாவை சந்திக்க வைக்கத் திட்டமிட்டார் தினகரன்.

 

dddd

 

வருமான வரித்துறை நோட்டீஸ், சொத்துக்கள் கையகப்படுத்துதல் என சசிகலாவின் பதிலை வாங்குவதற்காக ராஜாசெந்தூர் பாண்டியன் முயற்சித்தார். அதற்கான கடிதங்களை தபாலில் அனுப்பி பதில் பெற்றுக்கொள்ளுங்கள் என சிறை நிர்வாகம் அந்த சந்திப்புக்கும் மறுத்து விட்டது.

 

இந்த நிலையில் எடப்பாடிக்கும் ஓ.பி.எஸ்.க்குமான மோதல் அ.தி.மு.க. தலைமைக் கழகத்தில் பெரியதாக வெடித்தது. அதைத் தொடர்ந்து 28ஆம் தேதி செயற்குழு கூட இருந்த நிலையில் அமைச்சர்கள் தங்கமணி, வேலுமணி ஆகியோர் டெல்லிக்குப் பயணமானார்கள். சசிகலாவை அ.தி.மு.க.வில் இணைப்பதற்கு அ.தி.மு.க.வினரின் பதில் என்ன என பியூஷ் கோயல் எடப்பாடி தரப்பைக் கேட்டுள்ளார்.

 

Ad

 

சசிகலா என்பவர் சாதாரண ஆள் இல்லை. அவர் ஒரு சர்வாதிகாரி. அவர் பா.ஜ.க. எதிர்ப்பு மனநிலையை கொண்டவர். சசிகலாவை அ.தி.மு.க.வில் இணைத்தால் அவர் ஓ.பி.எஸ். போல அமைதியாக இருக்க மாட்டார். அவர் அ.தி.மு.க.வை முழுமையாக கைப்பற்றுவார். எதிர்காலத்தில் பா.ஜ.க.வுக்கு எதிரான நிலையை தைரியமாக எடுப்பார் என முடிந்தவரை சசிகலாவுக்கு எதிராக போட்டுக்கொடுத்து இரண்டு மணி மந்திரிகளும் பேசிய பிறகு குறுக்கிட்ட பியூஷ் கோயல், "சசிகலா அப்படி யொன்றும் இல்லை' என மந்திரியிடமே எதிர்வாதம் செய்திருக்கிறார். இது எடப்பாடியின் தூதர்கள் எதிர்பாராத திருப்பம்.

 

55dddd

 

அ.தி.மு.க. ஒற்றுமையாக இயங்க வேண்டும் என்று பா.ஜ.க. நினைக்கிறது. அடுத்த வருடம் நடக்கும் ஜனாதிபதி தேர்தலில் கணிசமான எம்.எல்.ஏ.க்களை அ.தி.மு.க. வைத்திருந்தால் அது பா.ஜ.க.விற்கு உதவும். எனவே அ.தி.மு.க.வை ஒற்றுமைப்படுத்த பா.ஜ.க. விரும்புகிறது. ஆனால் எடப்பாடி அதற்கு ஒத்துழைக்க மறுக்கிறார் என பியூஷ் கோயல் நினைக்கிறார்.

 

டெல்லிக்கு சென்றுவிட்டு வந்த மந்திரிகள் சொன்ன தகவல்களின் அடிப்படையில் சசிகலாவின் டெல்லி மூவ்களை எடைபோட்ட எடப்பாடி, செயற்குழுவில் பேசும்போது, ஓ.பி.எஸ்.ஸையும் முதல்வர் ஆக்கியது சின்னம்மா சசிகலாதான் என்றார். ஜெயலலிதா உயிருடன் இருந்தபோது முதலமைச்சர் பதவிக்கு நியமித்தது சசிகலாதான் என்று இ.பி.எஸ் சொன்னபோது அதற்கு பதிலளித்த ஓ.பி.எஸ். அம்மா இருந்தபோது என்னை முதல்வராக்கியது திவாகரன் என்றார்.

 

கூட்டத்திற்கு நடுவே சின்னம்மா வாழ்க என்ற கோஷங்களும் எதிரொலித்தன என்கிறார்கள் அ.தி.மு.க.வினர். செயற்குழுவில் 95 சதவிகிதம் எடப்பாடிக்கு ஆதரவாக பேசினார்கள். 5 சதகிவிதம் யாருக்கும் ஆதரவு இல்லை என பேசினார்கள். ஆனால் துரோகி என ஓ.பி.எஸ்.ஸை குறிப்பிட்டு எடப்பாடி பேசியது ஓ.பி.எஸ்.ஸை காயப்படுத்தியது. இவர் கள் எதிர்த்து வாக்களித்தார்கள். "அன்று சசிகலா ஆதரவு பெற்ற எம்.எல்.ஏ.க்களுடன் நின்று இவர்களது துரோகத்தை முறியடித்தேன். அப்படி நிகழாவிட்டால் தி.மு.க. ஆட்சி வந்திருக்கும். நம்மில் பாதிபேர் இந்நேரம் சிறைக்கு சென்றிருப்போம்'' என இ.பி.எஸ். பேசியது ஓ.பி.எஸ்,ஸை பெருந்துயரத்திக்கு ஆளாக்கியிருக்கிறது. அவர் வீட்டைவிட்டு வெளியே வரவில்லை. அவரை சமாதானப்படுத்த இ.பி.எஸ். எந்த முயற்சியும் எடுக்கவிலலை.

 

ddd

 

அதற்கு நேர்மாறாக ஆடிட்டர் குருமூர்த்தி வீட்டிற்கு சென்று, முதல்வர் வேட்பாளராக இ.பி.எஸ்.ஸை ஆக்க வேண்டும். அதற்கு மத்திய பா.ஜ.க. அரசு ஆதரவு தர வேண்டும். ஓ.பி.எஸ்.ஸை கண்டித்து வைக்க வேண்டும் என அமைச்சர்கள் செல்லூர் ராஜு, விஜயபாஸ்கர், உடுமலை ராதாகிஷ்ணன், ஓ.எஸ்.மணியன் உள்ளிட்ட எடப்பாடி ஆதரவு அமைச்சர்கள் சசிகலா டீமோடு அடுத்தகட்ட நடவடிக்கைகள் பற்றி பேச்சுவார்த்தையில் இறங்கிவிட்டார்கள்.

 

இப்படி நாளொரு வண்ணமும், பொழுதொரு வண்ணமாக யார் பா.ஜ.க.வின் ஆதரவை பெறுவது என்பதில் கடும்போட்டி அ.தி.மு.க.வுக்குள்ளும் சசிகலா தரப்பிலிருந்தும் நடந்து வருகிறது. ஒருவேளை சசிகலா அதில் ஜெயித்துவிட்டால், முதல் ஆளாக சரண் அடைவதற்காகத்தான் ஓ.பி.எஸ்.ஸும், இ.பி.எஸ்.ஸும் எங்களை முதல்வராக்கியது சின்னம்மா என செயற்குழுவில் எதிரொலித்திருக்கிறார்கள் என்கிறார்கள் அ.தி.மு.க. தலைவர்கள்.

 

Nakkheeran

 

அ.தி.மு.க என்பது ஜெயலலிதா காலத்தைப் போல ஒருவர் அதிகாரத்தின் கீழ் இருந்துவிடக் கூடாது என்றும், இப்போது நடக்கும் மோதல்களால், இவிய்ங்க சண்ட ஓயவே கூடாது என்பதே எங்க தலைமையோட ப்ளான் என்றும் சொல்கிறார் தென்மாவட்ட பா.ஜ.க. நிர்வாகி ஒருவர்.

 


 

 

 

Next Story

காவிரி விவகாரம்; கர்நாடக காங்கிரஸ் அரசுக்கு எடப்பாடி பழனிசாமி கண்டனம்!

Published on 12/07/2024 | Edited on 12/07/2024
Edappadi Palaniswami condemns Karnataka Congress government!

தமிழகத்திற்கு நாள் ஒன்றுக்கு 1 டிஎம்சி தண்ணீர் திறக்க வேண்டும் என்று காவிரி ஒழுங்காற்று குழு பரிந்துரை செய்திருந்தது. இந்த நிலையில் கர்நாடக முதல்வர் சித்தராமையா மற்றும் துணை முதல்வர் டி.கே.சிவக்குமார் தலைமையில் தமிழகத்திற்குத் தண்ணீர் திறப்பது குறித்து அதிகாரிகளுடன் ஆலோசனை நடத்தப்பட்டது. இதையடுத்து, தமிழகத்திற்குத் தண்ணீர் தரவே முடியாது என்று கர்நாடக முதல்வர் சித்தராமையா திட்டவட்டமாகத் தெரிவித்துள்ளார்.

இது தொடர்பாகச் செய்தியாளர்களைச் சந்தித்த கர்நாடக முதல்வர் சித்தராமையா, “காவிரி பாசனப் பகுதியில் 28 சதவீதம் தண்ணீர் பற்றாக்குறை உள்ளது. கர்நாடகாவின் வலியுறுத்தலை மீறி தண்ணீர் திறக்க காவிரி ஒழுங்காற்று குழு உத்தரவிட்டுள்ளது. கர்நாடகாவில் பற்றாக்குறை இருப்பதால் தற்போதைக்கு தமிழகத்திற்கு தண்ணீர் திறந்துவிட  முடியாது” என்று தெரிவித்தார். மேலும் இது குறித்து ஆலோசனை நடத்தக் கர்நாடக மாநிலத்தில் உள்ள அனைத்து கட்சியினருக்கும் முதல்வர் சித்தராமையா அழைப்பு விடுத்துள்ளார். 

தமிழகத்திற்குத் தண்ணீர் தர மறுக்கும் கர்நாடக காங்கிரஸ் அரசுக்கு தமிழக எதிர்க்கட்சி தலைவர் எடப்பாடி பழனிசாமி கண்டனம் தெரிவித்துள்ளார். இது தொடர்பாக அவர் வெளியிட்ட பதிவில், “கர்நாடக அணைகளில் இருந்து தமிழகத்திற்கு காவிரியில் நாளொன்றுக்கு ஒரு டி.எம்.சி வீதம் ஜூலை 31 வரை தண்ணீர் திறந்துவிடவேண்டும் என்ற காவிரி ஒழுங்காற்றுக் குழுவின் உத்தரவை ஏற்க மறுக்கும் கர்நாடக காங்கிரஸ் அரசின் போக்கு கடும் கண்டனத்திற்குரியது. காவிரி ஆறு பாயும் மாநிலங்களின் எண்ணங்களை கருத்திற்கொண்டு பிறப்பிக்கப்பட்டுள்ள உத்தரவை கர்நாடக அரசு ஏற்காமல் முரண்டு பிடிப்பது ஏற்கத்தக்கதல்ல.

விளம்பர போட்டோ ஷூட்டில் மட்டுமே கவனம் செலுத்தும் திமுக முதல்வர், காங்கிரசின் தயவிற்காக தமிழ்நாட்டின் ஜீவாதார உரிமையை விட்டுக்கொடுப்பது அவரின் தொடர் செயலற்றத்தன்மை மூலம் தெளிவாகத் தெரிகிறது. மேடையில் மட்டும் மாநில உரிமை பற்றி வாய் கிழிய பேசும் திமுக அரசின் முதல்வர் தன்னுடைய செயலற்ற தன்மையால், தமிழக மக்களின் வாழ்வோடு விளையாடி வருவது கடும் கண்டனத்திற்குரியது.

டெல்டா விவசாயிகள் நலனைக் கருத்திற்கொண்டு உடனடியாக காவிரி விவகாரத்தில் தீர்க்கமான நடவடிக்கைகளை மேற்கொண்டு தமிழ்நாட்டிற்கு உரித்தான நீரைப் பெறுமாறு திமுக முதல்வரை வலியுறுத்துகிறேன்” எனத் தெரிவித்துள்ளார். 

Next Story

சாட்டை துரைமுருகன் கைது; இபிஎஸ் கண்டனம்!

Published on 11/07/2024 | Edited on 11/07/2024
Shattai Duraimurugan arrested; EPS condemnation

விக்கிரவாண்டி சட்டமன்றத் தொகுதியில் கடந்த 2021 ஆம் ஆண்டு நடைபெற்ற சட்டமன்றத் தேர்தலில் திமுக சார்பில் போட்டியிட்டு வெற்றி பெற்றவர் புகழேந்தி. இவர் கடந்த ஏப்ரல் 6 ஆம் தேதி (06.04.2024) உடல் நலக்குறைவால் காலமானார். இவர் மறைந்ததைத் தொடர்ந்து விக்கிரவாண்டி சட்டமன்றத் தொகுதிக்கு ஜூலை 10 ஆம் தேதி இடைத்தேர்தல் நடைபெறும் எனத் தேர்தல் ஆணையம் அறிவித்திருந்தது. இந்த இடைத்தேர்தலில் திமுக சார்பில் அன்னியூர் சிவா, நாம் தமிழர் கட்சி சார்பில் அபிநயா, பாஜக கூட்டணியில் உள்ள பாமக சார்பில் அக்கட்சியின் மாநிலத் துணைத் தலைவர் சி.அன்புமணி ஆகியோர் போட்டியிட்டனர்.

இதனையடுத்து தேர்தலுக்கான பரப்புரை கடந்த 8 ஆம் தேதி (08.07.2024) மாலை 6 மணியுடன் ஓய்ந்தது. அதனைத் தொடர்ந்து தேர்தலுக்கான பரப்புரை கடந்த 8 ஆம் தேதி (08.07.2024) மாலை 6 மணியுடன் ஓய்ந்தது. இதற்கிடையில் நேற்று (10.07.2024) காலை 7 மணிக்குத் தொடங்கிய வாக்குப்பதிவு மாலை 6 மணியுடன் நிறைவு பெற்றது. இதற்கிடையே விக்கிரவாண்டி தேர்தல் பரப்புரையின் போது தமிழக முன்னாள் முதல்வர் கலைஞர் குறித்து அவதூறு பரப்பியதாக நாம் தமிழர் கட்சியின் கொள்கை பரப்புச் செயலாளர் சாட்டை திருமுருகன் கைது செய்யப்பட்டுள்ளார். நெல்லை வீராணம் பகுதியில் ஹோட்டலில் தங்கியிருந்த சாட்டை முருகனை திருச்சி சைபர் கிரைம் போலீசார் கைது செய்தனர். 

Shattai Duraimurugan arrested; EPS condemnation

இந்நிலையில் சாட்டை துரைமுருகன் கைது செய்யப்பட்டதற்கு அதிமுக பொதுச் செயலாளர் எடப்பாடி பழனிசாமி கண்டனம் தெரிவித்துள்ளார். இது குறித்து அவர் எக்ஸ் சமூக வலைத்தளத்தில் வெளியிட்டுள்ள பதிவில், “கடந்த மூன்றாண்டு திமுக ஆட்சியில் கொலைகாரர்கள், கொள்ளைக்காரர்கள், கடத்தல்காரர்கள், பாலியல் வன்கொடுமையாளர்கள் போன்றோர் சுதந்திரமாக நடமாடி வருகின்றனர். இந்நிலையில், ஆட்சியாளர்களின் தவறுகளை சுட்டிக்காட்டும் சமூக செயல்பாட்டாளர்கள் மீதும், அரசியல் கட்சியை சார்ந்தவர்கள் மீதும் சர்வாதிகார நடவடிக்கைகள் மேற்கொள்ளப்பட்டு வருவது தொடர்கதையாகி வருகிறது.

தன் கையில் இருக்கும் அதிகாரம், நிரந்தரமானது என்ற இருமாப்போடு, 'இம்' என்றால் சிறைவாசம் 'உம்' என்றால் வனவாசம்... என்ற ரீதியில் வழக்குகள் போட்டு கைது செய்யும் அராஜகம் நாள்தோறும் அரங்கேறி வருகிறது. நாம் தமிழர் கட்சியின் நிர்வாகிகளில் ஒருவரான திருச்சி சாட்டை துரைமுருகன் விக்கிரவாண்டி இடைத்தேர்தல் பிரச்சாரத்தில் அவர் தெரிவித்த ஒரு சில கருத்துகளுக்காக பொய் வழக்கு புனைந்து இந்த அரசு கைது செய்து சிறையில் அடைத்திருப்பது கண்டிக்கத்தக்கதாகும். அவர் மீதான வழக்குகளை திரும்பப்பெற்று, அவரை உடனடியாக விடுவிக்க வேண்டுமென்று காவல்துறை கையில் வைத்திருக்கும் முதலமைச்சரை வலியுறுத்துகிறேன்” எனக் குறிப்பிட்டுள்ளார்.