வெற்றிப்பாதை!

தமிழில் வளர்ந்து வரும் நடிகர் மகத் ராக வேந்திரா, கைவசம் மூன்று படங்களை வைத்துள் ளார். எப்படியும் வெற்றி கொடுத்தாக வேண்டும் என்ற முனைப்பில் தனது உடல் கட்டமைப்பை மாற்றி, புதிய தோற்றத்தில் கதாநாயகனாக புதிய படம் ஒன்றில் நடிக்கவுள்ளார்.  நாயகியாக ஐஸ்வர்யா ராஜேஷ் நடிக்க, முக்கிய கதாபாத்திரத்தில் ரம்யா கிருஷ்ணன் நடிக்கிறார்.  தமிழ், தெலுங்கு இரு மொழிகளிலும் ஒரே நேரத்தில் படமாக்கப்பட்டு இப்படம் வெளியாகவிருக்கிறது. இந்தப் படம் தனக்கு வெற்றிப் பாதையை அமைத்துக் கொடுக்கும் என மகத் நம்புகிறார்.

Advertisment

பொருத்தமான நாயகன்!

விஜய்சேதுபதி, நந்திதா ஸ்வேதா நடிப்பில் கோகுல் இயக்கத்தில் 2014ஆம் ஆண்டு வெளியாகி வெற்றிபெற்ற படம் ‘"இதற்குத்தானே ஆசைப்பட்டாய் பாலகுமாரா.' இதன் இரண்டாம் பாகத்தை உருவாக்க இயக்குநர் கோகுல் பல ஆண்டுகளாக முயற்சித்து வருகிறார். ஆனால் எதுவும் சரியாக அமையவில்லை. முதலில் விஜய் சேதுபதியிடம் கதை சொல்லி, அது சுமுகமாக முடியவில்லை. இருப்பினும் பல்வேறு நடிகர்களை அணுகி வந்தார். அதன் பலனாக தற்போது நடன இயக்குநர் சாண்டியை நாயகனாக முடிவு செய்துள்ளார். அவர் நடித்த "லியோ', "லோகா' மற்றும் தெலுங்கு படமான "கிஷ்கிந்தாபுரி' படங்களில் அவருடைய நடிப்பு வெகுவாக பாராட்டப்பட்டதால், அவர் பொருத்தமாக இருப்பார் என கோகுல் முடிவெடுத்துள்ளார்.  அடுத்த வருட இறுதிக்குள் படத்தை வெளியிட முடிவெடுத்துள்ளாராம் கோகுல்.

Advertisment

tt1

மீண்டும் இயக்கம்!

நடனம், நடிப்பு மற்றும் இயக்குநராகவும் தடம் பதித்தவர் பிரபுதேவா. தெலுங்கில் "நுவ்வொஸ்தானண்டே நேனொத்தண்டானா'’படம் மூலம் இயக்குநராக அறிமுகமானார். இப்படம் தமிழில் ‘"உனக்கும் எனக்கும்'’ என பெயரில் ரீமேக் செய்யப்பட்டது. தொடர்ந்து "போக்கிரி' படம் மூலம் தமிழில் அறிமுகமானவர், இந்தியில் அதன் ரீமேக் மூலம் அறிமுகமானார். அங்கு சல்மான்கான், அக்ஷய்குமார், அஜய்தேவ்கான் என டாப் நடிகர்களை வைத்து இயக்கி பிரபல இயக்குநராக உருவெடுத்தார். கடைசியாக சல்மான்கானை வைத்து ‘"ராதே’' படத்தை இயக்கியவர், கொஞ்சநாள் எந்த படத்தையும் இயக்காமல் இருந்தார். தற்போது சிறிய இடைவேளைக்கு பிறகு மீண்டும் இயக்கம் பக்கம் திரும்பியுள்ளார் பிரபுதேவா, தெலுங்கு நடிகர் மோகன்பாபுவின் மகனும் "கண்ணப்பா' பட இயக்குநருமான விஷ்ணு மஞ்சுவை வைத்து ஒரு படம் இயக்கவுள்ளார். "கண்ணப்பா' படத்தில் பிரபுதேவாவும் பணியாற்றியுள்ளார் என்பது குறிப்பிடத்தக்கது.

ரஜினி ஓ.கே!

ரஜினியின் 173ஆவது படத்திலிருந்து சுந்தர் சி. விலகியதால் அவருக்குப் பதில் பல இயக்குநர்கள் உள்ளே வந்தனர். முதலில் வெங்கட்பிரபு, கார்த்திக் சுப்புராஜ், ராஜேஸ் எம். செல்வா உள்ளிட்ட பெயர்கள் பரிசீலனையில் இருந்த நிலையில், புதியவர்களுக்கும் வாய்ப்புண்டு என படத் தயாரிப்பாளர் கமல் அண்மையில் சொன்னதால், புதுமுக இயக்குநர்களும் ரஜினியிடம் கதை சொல்ல படையெடுத்தனர். "மகாராஜா' பட இயக்குநர் நித்திலன் சாமிநாதன் மற்றும் "பார்க்கிங்' பட இயக்குநர் ராம்குமார் பாலகிருஷ்ணன் ஆகியோர் ரஜினியை சந்தித்து கதை கூறினர். இதில் ராம்குமார் பாலகிருஷ்ணன் சொன்ன கதை ரஜினிக்கு பிடித்துவிட, அவர் இயக்க வாய்ப்புள்ளதாகத் தெரிகிறது. இவர் சிம்புவை வைத்து காலேஜ் பேக்டிராப்பில் ஒரு கதை இயக்கவிருந்தார். ஆனால் தயாரிப்பாளரின் தனிப்பட்ட சிக்கல்களால் அது தொடங்கப்படாமல் போக,  அந்தக் கதையை தற்போது ரஜினிக்கு ஏற்றவாறு மாற்றி அவரிடம் ஓ.கே. வாங்கியுள்ளாராம்.                          

Advertisment

 -கவிதாசன் ஜெ.