டெண்டர் விவகாரம் !  ராணுவ கேன்டீனில் களேபரம்! திருச்சி திகுதிகு!

திருச்சி ராணுவ கேன்டீனில் அட்டை பெட்டி டெண்டர் எடுப்பதில் ஏற்பட்ட மோதலில் கேன்டீன் மேலாளர் உள்ளிட்ட 7 பேர் மீது வழக்கு பதிவு செய்யப்பட்டுள்ளது.

இந்த விவகாரம் குறித்து நாம் தஞ்சாவூர் மாவட்டம் அருளானந்தம் நகரை சேர்ந்த வேலாயுதம் என்ற முன்னாள் ராணுவ வீரரை தொடர்புகொண்டு பேசியபோது, "தஞ்சாவூர், நாகப்பட்டினம் ராணுவ கேன்டீனில் காலி அட்டைப்பெட்டி எடுக்கும் தொழிலை கடந்த இரண்டாண்டுகளாக செய்துவரும் நிலையில், இந்த ஆண்டுக்கான டெண்டர் அறிவிப்பு, திருச்சி ராணுவ கேன்டீன் தலைமையகத்தில் கடந்த பிப்ரவரி மாதம் வெளியிடப்பட்டு, ஏப்ரல் மாதம் வழங்கப்பட்டது. அந்த டெண்டர் வழங்குவதில்தான் பிரச்சினை ஆரம்பித்தது. திருச்சியை தலைமையாகக்கொண்டு மொத்தம் 6 கேன்டீன்கள் இயங்கி வருகின்றன. அதில் எனக்கு தஞ்சாவூர், நாகப்பட்டினம் டெண்டர்கள் கிடைத்தன. என்னுடைய டெண்டரை மட்டும் திருச்சி கேன்டீனில் பொறுப்பு மேலாளராக பணியாற்றிவரும் ராமன் என்பவர், கொடுக்காமல் நிறுத்தி வைத்துள்ளார். 

 நானும் எனது மனைவியும் அந்த ஆர்டரை வாங்க சென்றோம். மேலாளர் ராமன் எங்களிடம், "சென்னை ராணுவ அலுவலகத்தில் என்மீது புகார் அளித்துள் ளீர்களா?' என்று கேட்டார்.  அதுகுறித்து எந்த விவரமும் தெரியாதென்றேன். ஆனால் அவரோ, அங்கிருந்த 6 பேரை அழைத்து, எங்களை கொன்று புதைக்குமாறு கூறி மிரட்டியதால், கத்திக் கூச்சல் போட்டு அங்கிருந்து தப்பிவந்தோம். அங்கிருந்த வாட்ச்மேன், என் மனைவிமேல் கண்ட இடத்தில் கைவைத்து அசிங்கப்படுத்திவிட்டார். மேலும், அந்த டெண்டர் இறுதி செய்யப்பட, காவல் நிலையத்தில் எந்த வழக்குமில்லையென்று என்.ஓ.சி. வாங்குமாறு கேட்கிறார். டெண்டர் நடைமுறையிலெயே இது இல்லாதபோதும் என்னிடம் மட்டும் கேட்கிறார். 

அங்கு நடந்தது குறித்து கண்டோன்மென்ட் காவல்நிலையத்தில் புகாரளித்தால் இரு நாட்களாக புகாரைப் பெறாமல் மறுப்புத் தெரிவித்தார்கள். வேறு வழியில்லாமல் நீதிமன்றத்தை நாடி, மேலாளர் மீது வழக்குப்பதிவு செய்ய வழிகாட்டுதல் அரசாணை பெற்று கண்டோன்மென்ட் காவல்நிலையத்தில் கொடுத்தால், எஃப்.ஐ.ஆர். போடுவதற்கு பல வாரங்கள் இழுத்தடித்தார்கள். எஃப்.ஐ.ஆர். நகலை இன்னமும் கொடுக்கவில்லை.  எனக்கு நியாயம் வேண்டும்'' என்று மனக்குமுறலை வெளிப்படுத்தினார். 

அவரது குற்றச்சாட்டுகள் குறித்து இராணுவ கேன்டீன் ஊழியர்களிடம் விசாரித்தபோது, "கேண்டீன் பொருட்களின் தினசரி விற்பனை  மாலை 5 மணியுடன் நிறுத்தப்பட்டு, அதன்பின் விற்பனை கணக்குகள் பார்க்கப்படும். அதற்கு அதிகபட்சம் 7 மணிவரை ஆகும். இங்கு அட்டைப்பெட்டிகள் நிறைய சேர்வதால், அதற்கென ஒப்பந்தப்புள்ளிகள் கோரி விற்பனை செய்துவிடுவோம். கடந்த 2 ஆண்டுகளாக தஞ்சாவூரை சேர்ந்த வேலாயுதம் என்பவர் ஒப்பந்தங்களை எடுத்து வருகிறார். இந்த ஒப்பந்தப்புள்ளி கோருபவர்கள் மீது வழக்குகள் இருக்கக்கூடாதென்று விதிகள் இருக்கின்றன. அதற்கு நோ அப்ஜக்ஷன் சான்றிதழ் வழங்க வேண்டும். ஆனால் வேலாயுதம் நோ அப்ஜக்சன் சான்றிதழ் தரவில்லை. அதேபோல் வேலாயுதம் சனிக்கிழமை மாலை 7 மணிக்கு வந்தார். சட்டப்படி அவருக்கு அந்த நேரத்தில் நாங்கள் ஆணை வழங்கக்கூடாது. எனவே அவரை திங்கட்கிழமை காலையில் பெற்றுக்கொள்ளுமாறு அறிவுறுத்தினார்கள். வேறொருவருக்கு ஒப்பந்தம் வழங்கியதாக வேலாயுதம் குற்றம்சாட்டியிருந்தார். ஆனால் வேறொருவரிடம் ரூ.100 ஸ்டாம்ப் பேப்பரில் நோ அப்ஜக்சன் பெற்று வருவதற்கான படிவம் தான் வழங்கினோம். இதுபுரியாமல், வேலாயுதமும் அவரது மனைவியும் இங்குவந்து மோசமாகப் பேசியதோடு, செருப்பாலடிக்க முயன்றார். இதை வீடியோபதிவு செய்த வாட்ச்மேனை, அவரது மனைவியை கண்ட இடங்களில் தொட்டதாகப் புகாரளித்துள்ளார்.

கணவனும் மனைவியும் மோசமாக நடந்துகொண் டது குறித்து காவல்நிலையத்தில் புகாரளிக்கப்பட்டுள்ளது. நீதிமன்றத்திலும் புகாரளிக்கப்பட்டுள்ளது. கண்காணிப்புக் கேமரா வீடியோவும் நீதிமன்றத்தில் சமர்பிக்கப்படவுள் ளது. 7 பேர் மீது வழக்குப்பதிவு செய்யப்பட்டுள்ளது. வேலாயுதத்தின் மீது இரண்டு வழக்குகள் நிலுவையில் உள்ளது. இதை ஆதாரமாக்கி, இந்த ஒப்பந்தத்தை ரத்துசெய்யுமாறு எங்கள் இராணுவத் தலைமையகத்திற்கு கடிதம் அனுப்பப்பட்டுள்ளது'' என்றனர். தற்போது இவ்வழக்கை எதிர்கொள்வார்களா அல்லது முன்ஜாமீன் பெறுவார்களா என்பது கேள்விக்குறி.

இதுபோன்ற பிரச்சனைகள் இனி ஏற்படாம லிருக்க, சம்பந்தப்பட்ட சில ஊழியர்களை அப்புறப்படுத்தி சேவை நோக்கில் இந்த கேன்டீனை இயக்கினால் பல முன்னாள் இராணுவத்தினர் பயனடைவார்கள். அதேபோல் வருடத்திற்கு ஒரு ஒப்பந்தததாரரை நியமித்து, அவர்கள்மீது வழக்குகள் இல்லை என்பதை உறுதி செய்து நல்ல ஒப்பந்ததாரர்களிடம் ஒப்பந்தம் வழங்க நடவடிக்கை எடுக்க வேண்டும் என்பது தான் முன்னாள் இராணுவத்தினரின் கோரிக்கையாக உள்ளது.