எஸ்.ஐ.ஆர். குழறுபடி! பெயரில்லை... தெருவே இல்லை! தென்காசி திகுதிகு!

ஜனத்தொகை பெருக்கம், வளர்ச்சி காரணமாக 23 ஆண்டுகட்கு முன்பிருந்த தெருவின் பெயர்கள், வார்டுகள் மறு வடிவமைக்கப்பட்டு புதிய பெயர்களில் செயல்படுவது தமிழகமெங்கிலும் சகஜமானது தான்.

அப்படி வார்டுகள், தெருக்களின் பழைய பெயர்கள் மாற்றப்பட்டு புதிய பெயர்களில் செயல்பட்டாலும், அந்தந்த வார்டுகளிலுள்ள மக்களின் பெயர்கள் முந்தைய வாக்காளர் பட்டியலோடு, இடம், பெயர் மாறாமல் அப்படியே தொடர்ந்து நீடிப்பதால் வாக்காளர்களும் அக்காலம் தொட்டு, முடிந்த நாடாளுமன்றத் தேர்தல் வரை தேர்தல் ஆணையம் வழங்கிய வாக்காளரின் புகைப்பட அடையாள அட்டையையே ஆவண ஆதாரமாகக் கொண்டு தொடர்ந்து வாக்களித்து வருகின்றனர். நடைமுறையும் அப்படித்தானிருக்கிறது.

தற்போது இந்தியத் தேர்தல் ஆணையம், வாக்காளர் பட்டியல் சிறப்பு தீவிர திருத்தம் செய்யும் பொருட்டு எஸ்.ஐ.ஆர். படிவங்களை தமிழகத்தின் அனைத்துப் பகுதி மக்களுக்கும், வாக்குச்சாவடி நிலை அலுவலர் என்று சொல்லப்படுகிற பி.எல்.ஓ.க்கள் மூலம் வழங்கிவருகிறது.

வாக்காளர்கள் பட்டியலின்படி, வாக்காளரின் பெயருடன், அவரது புகைப்பட அடையாள எண் பிரகாரம் பி.எல்.ஓ.க்கள் வார்டு வார்டாக மக்களிடம் எஸ்.ஐ.ஆர். படிவங்களை வழங்கி வருகின்றனர். பூர்த்தி செய்யப்பட்ட படிவங்களை நான்கு நாட்களுக்குள் சமர்ப்பிக்க வேண்டுமென்ற நிபந்தனையோடு       தரப்படுகிற படிவங்களில் கேட்கப்படும் விவரங்கள், வாக்காளரிடையே குழப்பத்தை ஏற்படுத்தினாலும், ஒருவழியாக அதனை சமாளித்து படிவங்களைப் பூர்த்தி செய்து பி.எல்.ஓ.க்களிடம் திருப்பித் தருகின்றபோது தான் வில்லங்கமும் விவகாரமும். பூர்த்தி செய்யப்பட்ட விண்ணப்பங்களை திரும்பப்பெற வருகிற பி.எல்.ஓ.க்கள், 23 வருடத்திற்கு முந்தைய பழைய வாக்காளர் பட்டியலுடன் வருகிறார்கள்.

2002-ன்போது உங்களின் தெரு எந்தப் பெயரிலிருந்தது? அப்போதைய உங்களின் வார்டு, கதவு எண் போன்ற விபரங்களைக் கேட்கும்போது பெரும்பாலான வாக்காளர்களுக்கு நினைவிலிருக்க வாய்ப்பில்லை. வயது முதிர்ந்த வாக்காளர்களுக்கும் அதே நிலை தான். ஒருவழியாக அவற்றை தெரிந்து, அதன்படி 2002 வாக்காளர்கள் பட்டியலில் அவர்களின் பாகம் எண், வரிசை எண்ணுடன் பெயரும் இருந்தால் தான் பூர்த்தி செய்யப்பட்ட எஸ்.ஐ.ஆர். படிவங்களை பி.எல்.ஓ.க்கள் வாங்கி, அதனை ஸ்கேன் செய்து பதிவேற்றம் செய்கின்றனர். பெயர்கள் விடுபட்டிருந்தால் பூர்த்தி செய்யப்பட்ட எஸ்.ஐ.ஆர். படிவங்களை பி.எல்.ஓ.க்கள் வாங்க மறுத்து, அவற்றை ஸ்கேன் செய்து, பதிவேற்றம் செய்ய இயலாதென்று தெரிவித்து விடுகின்றனர்.

அந்த பட்டியலில், குடும்பத்தில் மற்றவர்களின் பெயர்கள் இடம்பெற்றிருந்தாலும், அதில் விடுபட்ட உறுப்பினர் எத்தனை வயதுக்காரர் என்றாலும் மறுப்புதான். அப்படி விடுபட்டவர்கள் பலர். "நாங்கள் 1996களிலிருந்தே தொடர்ந்து வாக்களித்து வருகிறோம். இதோ அப்போதைய எங்களின் வாக்காளர் அடையாள அட்டை'' என்று பி.எல்.ஓ.க்களிடம் காட்டினாலும் வேலைக்கு ஆகாது. தனக்கு வாக்குரிமை இல்லாமல் போய் விடுமே என்ற அச்சத்தில் அவரோடு வாக்குவாதம் செய்யும் வாக்காளர்களோ, "பட்டியலில் எங்கள் பெயரில்லையென்றால் அது உங்கள் தவறு. தேர்தல் கமிசனின் மிஸ்டேக். 2002 பட்டியல் முறையாக அச்சிடப்படவில்லை'' என்று வாதம் செய்பவர்களுக்கு பதிலேதும் கிடைப்பதில்லை.

2002 வாக்காளர்கள் பட்டியலில் வாக்காளர்களின் பெயர் இயல்பாகவே, பிழையாக விடுபட்டுப்போனதா? அல்லது பெயர்கள் எடிட் செய்யப்பட்டுள்ளனவா? என்ற விபரம் தெரியாமல் வாக்காளர்கள் குழம்பிப்போயுள்ளனர். தென்காசி மாவட்டத்தின் புளியங்குடி, கீழப்பாவூர், பாவூர்சத்திரம், சங்கரன்கோவிலின் பல வார்டுகளிலும் இது போன்ற விடுபட்ட பெயர்களால் வாக்காளர்கள் பி.எல்.ஓ.க்களிடம் மோத வேண்டிய நிலை. இதனை மாவட்ட தேர்தல் அதிகாரிகளால் கூட சரி செய்ய முடியாதாம். தென்காசி மாவட்டத்தில் மட்டுமல்ல, தமிழகம் முழுக்க இதே நிலை தான். இதுகுறித்து கணக்கெடுத்தால் இப்படி விடுபட்டவர்கள் எத்தனை லட்சமென்று தெரிந்துவிடும் என்கிறார் மாவட்டத்தின் தி.மு.க.வைச் சேர்ந்த சீனியர் உறுப்பினர்.

அப்படி நீக்கப்பட்டவர்கள் அனைவரும் தற்போதைய நிலவரப்படி, தேர்தல் கமிசனின் கணக்குப்படி அவர்கள் புதிய வாக்காளர்களாகவே கருதப்படுவார்கள். புதிதாக அவர்கள் வாக்குரிமை பெறுவதற்கு அதற்கான ஆவணங்களை எஸ்.ஐ. ஆருடன் இணைக்க வேண்டும் என்கிறது தேர்தல் ஆணையம். அதனை இதுபோன்று பாதிக்கப் பட்டவர்களிடம் தெரிவிக்கிற பி.எல்.ஓ.க்கள், அவர்களிடம் பிறப்புச்சான்றிதழ், ஜாதிச்சான்று, குடும்பப்பதிவேடு என அறிவிக்கப்பட்ட 12 ஆவணங்களில் எதையாவது ஒன்றை எஸ்.ஐ.ஆருடன் இணைக்க வேண்டும் என்கிறார்கள். இள வயது வாக்காளர் என்றால் ஆவணமிருக்கும். ஆனால் 60 வயதுக்கு மேற்பட்டவர்களிடம் கேட்கப்படுகிற ஆவணங்கள் எப்படி இருக்கும்? இப்போதே வேண்டுமென்றால் அதற்காக எங்கே செல்வது? என்று பி.எல்.ஓ.விடம் வாக்குவாதம் செய்த பா.ஜ.க. புள்ளி ஒருவர் ஆத்திரத்தைக் கொட்டிவிட்டுச் சென்றிருக்கிறார். ஒரு சில பகுதிகளில் ஆயிரத்திற்கும் மேற்பட்ட வாக்காளர்களின் பெயர்கள் பட்டியலில் நீக்கப்பட்டதால் கொந்தளிப்பைக் கிளப்பிய சம்பவமும் நடந்தேறியிருக்கிறது.

தென்காசி மாவட்டத்தின் கடையநல்லூர் ரஹ்மானியபுரம் பகுதியின் 36வது எண் வாக்குச்சாவடி, மூவாயிரத்திற்கும் மேற்பட்ட வாக்காளர்களைக் கொண்டது. நடந்துமுடிந்த நாடாளுமன்றத் தேர்தல் வரை இங்குள்ள மக்கள் வாக்களித்திருக்கிறார்கள். அந்த வாக்குச்சாவடியின் அத்தனை வாக்காளர்களுக்கும் எஸ்.ஐ.ஆர். படிவம் தரப்பட்டு அவர்களால் முறையாகப் பூர்த்தி செய்யப்பட்டு பி.எல்.ஓ.விடம் ஒப்படைத்த போது, தேர்தல் கமிஷனின் 2002 வாக்காளர் பட்டியலில் அந்த வாக்குச்சாவடியிலுள்ள அனைத்து வாக்காளர்களின் பெயர்களும் இல்லாமல் போனதால் எஸ்.ஐ.ஆர். படிவங்களை ஒப்படைக்க முடியாமல் போக, அங்கு குழப்பமும், பரபரப்பும் ஏற்பட்டது. 

இதனால் தங்கள் வாக்குரிமை கேள்வியானது அங்கே கொதிப்பைக் கிளப்ப, ஸ்பாட்டுக்கு வந்த கடையநல்லூர் தி.மு.க.வின் முன்னாள் மா.செ. செல்லத்துரை, சம்பவத்தை அந்த ஏரியாவிற்கு ஆய்விற்காக வந்த மாவட்ட கலெக்டர் கமல் கிஷோரிடம் கொண்டுபோயிருக்கிறார்.

கலெக்டரின் தலையீட்டிற்குப் பின்பு இரண்டு நாட்கள் கழித்து ரஹ்மானியாபுரம் 36ஆவது எண் வாக்குச்சாவடியின் வாக்காளர்கள் இடம்பெற்ற பட்டியல், அங்குள்ள வட்டாட்சியர் அலுவலகத்தில் பார்வைக்காக வைக்கப்பட்டுள்ளது. வாக்காளர்கள் அதனைப் பார்த்து படிவம்             பூர்த்தி செய்யக் கேட்டுக் கொள்ளப்படுகிறார்கள் என்று கலெக்டர் தரப்பிலிருந்து அறிக்கை வெளியிடப்பட்டது.

ஆட்சியர் தலையீட்டுக்குப் பின் அவர்களின் பெயர்கள் பட்டியலில் இடம்பெற்ற போதும், விடுபட்ட அந்த வாக்காளர் பட்டியல் எப்படி வெளிவந்தது என்ற கேள்விக்கு தெளிவான பதில் தரப்படவில்லை. வாக்காளர் பெயர் நீக்கம் செய்யப்பட்டது, வாக்குரிமை பறிப்பிற்கான முயற்சி தான் என்ற பேச்சு இப்போது அங்கே ஹாட் டாபிக்!

இந்த மாவட்டத்தின் கீழப்பாவூர் அருகேயுள்ள ஆரியங்காவூர் கிராமத்தின் 1வது வார்டு, ஆயிரத்திற்கும் மேலான வாக்காளர்களைக் கொண்டது. 162வது பூத் எண்ணில் அடங்கியது. நடந்துமுடிந்த பாராளுமன்றத் தேர்தல் வரையிலும் தொடர்ந்து அந்த ஊர் பூத் எண் 162, ஆரியங்காவூர் 1வது வார்டு என்று வாக்காளர் பட்டியலில் தெளிவாகவே இருந்தது. அந்த ஊர் மக்களும் வாக்களித்து வந்திருக்கிறார்கள்.

ஆனால் தற்போதைய திருத்தத்திற்கான பி.எல்.ஓ. அலுவலர்கள் அந்த மக்களுக்கு வழங்கிய எஸ்.ஐ.ஆர். விண்ணப்பப் படிவங்கள் அனைத்திலும் ஆரியங்காவூர் என்பதற்குப் பதிலாக துரைச்சாமியாபுரம் என்று தவறுதலாக திருத்தம் செய்யப்பட்டு பதிவாகியுள்ளது.  இதனால் படிவத்தை பூர்த்திசெய்ய முடியாமல் தவித்த அந்த கிராம பொதுமக்கள் தங்களின் வாக்குரிமை பறிபோனதே என்ற அச்சத்திலும் கொதிப்பிலுமிருக்க, பதட்டமான சூழல் நிலவியிருக்கிறது.

இந்த குளறுபடி நடைபெற யார் காரணம்? வருவாய்த் துறையா?, உள்ளாட்சித்துறையா? தேர்தல் கமிசனா? என்று கருத்து மோதல் ஏற்பட்டு ஊர்ப் பொதுமக்கள் அனைவரும் திரண்டு போய், தென்காசி கலெக்டரை சந்தித்து, தேர்தல் அலுவலரான நீங்கள் போர்க்கால அடிப்படையில் உடனடியாக இந்தப் பிரச்சினைக்குத் தீர்வுகாண வேண்டும் என்று மனு கொடுத்திருப்பது மாவட்டத்தில் அதிர்வலைகளைக் கிளப்பி யிருக்கிறது.

தேர்தல் கமிசனின் 2002 வாக்காளர் பட்டியலில் ஏற்பட்ட இதுபோன்ற குளறுபடிகளால் கொத்துக்கொத்தாக வாக்காளர்களின் வாக்குரிமை பறிபோகும் என்ற அச்சத்தைக் கிளப்பியிருக்கிறது.

-பி.சிவன்

படங்கள்: ப.இராம்குமார்