விஜய்யுடன் செங்க்ஸ் ! - பரபரப்பு பின்னணி!

அ.தி.மு.க.விலிருந்து நீக்கப்பட்டிருந்த மூத்த தலைவர் செங்கோட்டையன், நடிகர் விஜய்யின்  த.வெ.க.வில் இணைவது தமிழக அரசியலில் பரபரப்பை ஏற்படுத்தியிருக்கிறது. இதற்கு வசதியாக தனது எம்.எல்.ஏ. பதவியை ராஜினாமா செய்துவிட்டார் அவர். கடந்த ஒரு மாதமாக நிலவி வந்த குழப்பங்களுக்கு முற்றுப்புள்ளி வைத்தி ருக்கிறார் செங்கோட்டையன். 

தி.மு.க.வா? த.வெ.க.வா? -ஆலோசித்த செங்ஸ்! 

எம்.ஜி.ஆர். காலத்து அரசியல்வாதி என புகழப்படும் செங்கோட்டையனுக்கு வயது 78. இதுவரை 9 முறை எம்.எல்.ஏவாக இருந்தவர். இதில், கோபி தொகுதியிலிருந்து மட்டுமே 8 முறை தேர்ந்தெடுக்கப்பட்டவர். அரசியலில் பல்வேறு ஏற்ற, இறக்கங்களை சந்தித்த அவர், எடப்பாடி பழனிச்சாமி தலைமையிலான அ.தி.மு.க.வில் எடப்பாடியுடன் அரசியல் செய்ய முடியாமல் தடுமாறினார். எடப்பாடிக்கு நெருக்கடி ஏற்படுத்த செங்கோட்டையனை பயன்படுத்தியது பா.ஜ.க. தலைமை. பா.ஜ.க.வின் எடுப்பார் கைப்பிள்ளையாக மாறினார். அதன் ஒருகட்டமாக, அ.தி.மு.க.வி லிருந்து நீக்கப்பட்டவர்களை எடப்பாடி பழனிச்சாமி ஒன்றிணைக்க வேண்டும் என போர்க்குரல் உயர்த்தியதோடு, 10 நாட்கள் கெடுவும் விதித்தார் செங்ஸ். ஆனால், எடப்பாடி இதனை கண்டுகொள்ளவில்லை. 

இந்த நிலையில், அக்டோபர் 30-ஆம் தேதி தேவர் குரு பூஜைக்கு ஓ.பி.எஸ்.ஸுடன் ஒரே காரில் சென்றார். தேவர் நினைவிட அஞ்சலிக்குப் பிறகு தினகரன் -ஓ.பி.எஸ். ஆகியோருடன் ஆலோசித்தார் செங்ஸ். மூவரும் கூட்டாக செய்தி யாளர்களைச் சந்தித்து எடப்பாடியை விமர்சித் தனர். இதனால் அவரை அ.தி.மு.க.விலிருந்து அதிரடியாக நீக்கினார் எடப்பாடி பழனிச்சாமி. அ.தி.மு.க.வை ஒன்றிணைக்க முயற்சி செய்யுங்கள்; நாங்கள் உதவுகிறோம் என பா.ஜ.க. தலைமை கொடுத்த நம்பிக்கையில் எடப்பாடியை எதிர்த்த தன்னை, கட்சியிலிருந்து எடப்பாடி நீக்கிய நிலையிலும், பா.ஜ.க. உதவவில்லையே என்கிற ஆதங்கமும் ஆத்திரமும் பா.ஜ.க. மீது செங்கோட்டையனுக்கு வந்தது. இனி நமக்கான அரசியலை நாம்தான் செய்யவேண்டும் என நினைத்து, "கட்சியிலிருந்து நீக்கப்பட்டதை எடப்பாடி திரும்பப் பெறவேண்டும் என்கிற திட்டத்தில், தி.மு.க. ஆட்சியை அகற்றவேண்டு மானால் அ.தி.மு.க.வில் பிரிந்தவர்கள் ஒன்றிணைய வேண்டும் என்ற கோணத்தில் மட்டுமே சொன்னேன்; கெடு எல்லாம் விதிக்கவில்லை' என மழுப்பினார். ஆனால், அது எடுபடவில்லை. இதனையடுத்து, தனது அரசியலின் அடுத்த கட்டம் குறித்து தனது ஆதரவாளர்களுடன் தொடர் ஆலோசனையில் ஈடுபட்டுவந்தார் செங்கோட்டையன். இதனால், அவர் தி.மு.க.வில் இணைவாரா? த.வெ.க.  விற்குத் தாவுவாரா? என்கிற ஹேஸ்யங்கள் தமிழக அரசியலில் வட்டமடித்த நிலையில், விஜய்யை தேர்ந்தெடுத்திருக்கிறார் செங்ஸ். 

செங்ஸின் விருப்பம்!
மௌனம் காத்த தி.மு.க! 

"அ.தி.மு.க.விலிருந்து நீக்கப்பட்ட பிறகு, நாம் ஒன்றாக ஒரே நேர்கோட்டில் இணைந்து அரசியல் செய்ய வேண்டும். அப்போதுதான் எடப்பாடி வழிக்கு வருவார்' என்று செங்கோட்டையனை ஓ.பி.எஸ்., தினகரன் ஆகியோர் வலி யுறுத்தினர். இதற்கு செங்ஸின் ஆதர வாளர்களோ,   அவர்களுடன் இணைவ தால் எந்த அரசியல் எதிர்காலமும் இருக் காது என்று சொல்லி ஒப்புக்கொள்ள மறுத்தனர். இதனால் அந்த யோசனை யை துவக்கத்திலேயே ஒதுக்கிவிட்டார் செங்ஸ். இந்த நிலையில், அவருடன் தி.மு.க. பேச்சுவார்த்தை நடத்தியது. அப்போது, "வருகிற தேர்தலில் நான் சுயேட்சையாக போட்டியிடுகிறேன். என்னை ஆதரிக்கும் வகையில் வேட் பாளாரை தி.மு.க. நிறுத்தக்கூடாது. தேர் தலுக்குப் பிறகு தி.மு.க.வில் இணை கிறேன்' என தம்மிடம் பேச்சுவார்த்தை நடத்தியவர்களிடம் கோரிக்கை வைத்தார் செங்கோட்டையன். இதற்கு, உதாரணமாக, காங்கேயம் தொகுதியில் மிகுந்த செல்வாக்கு பெற்றவர் காங்கிரஸ் துரை.ராமசாமி. தொடர்ந்து வெற்றிபெற்று வருபவர். காங்கிரசில் அவருக்கு ஒரு முறை சீட் மறுக்கப்பட்டபோது, எம்.ஜி.ஆரை அணுகிய துரைராமசாமி, "சுயேட்சையாக போட்டியிடுகிறேன்; அ.தி. மு.க. ஆதரிக்க வேண்டும்' என கோரிக்கை வைத்தார். அதேபோல அவரை ஆதரிக் கும் வகையில் வேட்பாளரை நிறுத்த வில்லை எம்.ஜி.ஆர். தேர்தலில் வெற்றிபெற் றார் துரை ராமசாமி. தேர்தல் முடிந்ததும் அ.தி.மு.க.வில் அவர் இணைய, அவரை அமைச்சராக்கினார் எம்ஜிஆர். இந்த சம்பவத் தையும் நினைவுகூர்ந்திருக்கிறார் செங்ஸ். இது தி.மு.க. தலைமைக்கு தெரியப்படுத்தப்பட்டது. ஆனால், செங்ஸின் விருப்பத்திற்கு எஸ்., ஆர். நோ எதுவும் சொல்லாமல் மௌனம் காத்தது அறிவாலயம். 

துரோகிகளை வீழ்த்தலாம் வாருங்கள்...
செங்சுக்கு தூண்டில் வீசிய விஜய்! 

செங்கோட்டையனின் விருப்பத்தில் எந்த முடிவையும் தி.மு.க. எடுக்காததை அறிந்த த.வெ.க.வின் இரண்டாம் நிலை தரப்பினர் செங்ஸிடம் பேச்சுவார்த்தை நடத்தினர். அப்போது, விஜய்க்கு போன் போட்டு செங்ஸிற்கு விஜய்க்கும் தொடர்பை ஏற்படுத்தினர். செங்கோட்டை யனிடம் பேசிய விஜய், "உங்கள் மீதும் உங்கள் அரசியல் வாழ்க்கை மீதும் எனக்கு மிகுந்த மரியாதை இருக்கிறது. உங்களின் அருமையை உணராதவர்களையும் யோசிக்க வைக்க வேண்டுமானால் நீங்கள் இருக்கவேண்டிய இடம் த.வெ.க.தான். எங்களுடன் வாருங்கள்; எங்களை வழி நடத்துங்கள். எதிரிகளையும், துரோகிகளையும் வீழ்த்தலாம்' என அழைத்தார். செங்கோட்டையனிடமும் மாற்றம் தெரிந்தது. இதனையடுத்து, தனது ஆதரவாளர்களிடம் செங்ஸ் ஆலோசித்தபோது, "மீண்டும் தி.மு.க. ஆட்சிதான் வரப்போகிறது; அதனால் தி.மு.க.வில் இணையலாம். நீங்கள் அமைச்சராவீர்கள். எதிரி எடப்பாடிக்கு பாடம் புகட்டலாம்' என ஆதரவாளர்கள் சொன்னபோது, "நீங்கள் சொல்வதெல்லாம் சரி. ஆனால், தி.மு.க.வுக்குப் போனால் எனக்கு மட்டும்தான் சீட் கிடைக்கும். என்னை நம்பியுள்ள உங்கள் யாருக்கும் சீட் கிடைக்காது. இதைத்தாண்டி, தி.மு.க.விடம் ஒரு கோரிக்கை வைத்தேன். இப்போதுவரை அதற்கு பதில் இல்லை'' என நடந்ததை விவரித்திருக்கிறார். அதிலுள்ள அரசியலை புரிந்துகொண்ட ஆதரவாளர்கள், "நீங்கள் எடுக்கும் எந்த முடிவுக்கும் ஒத்துழைக்கிறோம்' என்றனர். 

எம்.எல்.ஏ. பதவி ராஜினாமா! 

இதனையடுத்து, தனது எதிர்கால அரசியல் குறித்து ஒரு வாரமாக பல்வேறு யோசனைகளையும் ஆராய்ந்துவிட்டு, த.வெ.க. வில் இணைய முடிவெடுத்த செங்கோட் டையன், தனது எம்.எல்.ஏ. பதவியை ராஜி னாமா செய்துவிட்டு உங்களை சந்திக்கிறேன் என விஜய்க்கு தகவல் பாஸ் செய்திருக்கிறார். "கட்சியில் இணைவதை 27-ந் தேதி வைத்துக்கொள்ளலாமா அண்ணே' என விஜய் தகவல் அனுப்ப... "27-ந் தேதி நல்ல நாள்தான்' என்றிருக்கிறார் செங்கோட்டையன். 27-ந் தேதி உதயநிதி ஸ்டாலினின் பிறந்தநாள் என்பதால் அதன் பரபரப்பை குறைக்க நினைத்தே அந்த தேதியை சொன்னாராம் விஜய். இதன்பிறகு, ஈரோட்டிலிருந்து சென்னைக்கு வந்த செங்கோட்டையன், தனது எம்.எல்.ஏ. பதவியை ராஜினாமா செய்தார். 

சேகர்பாபுவிடம் மனம் திறந்த செங்ஸ்!  

தி.மு.க.விற்கு வரவேண்டும் என ஏற்கனவே செங்ஸை வலியுறுத்தி வந்த அமைச்சர் சேகர் பாபு, செங்கோட்டையன் த.வெ.க.வில் இணையப்போகிறார் என செய்தியறிந்து கோட்டைக்கு விரைந்துவந் தார். ராஜினாமா செய்த அவரை சந்தித்த சேகர்பாபு, "தலைவரிடம் (ஸ்டாலின்) பேசிட் டேன். தி.மு.க.வை கடந்து எந்த தவறான முடிவையும் எடுக்காதீங்க. எதுவாக இருந் தாலும் நீங்கள் விரும்புவது நடக்கும், அவசரப்படாதீர்கள்' என வலியுறுத்த, "நான் முடிவெடுத்து விட்டேன். இனி யோசிக்க முடியாது, என்னை வற்புறுத்தாதீர்கள்... தர்மசங்கடமாக  இருக்கிறது. நாட்கள் கடந்துவிட்டன'' என்று சொல்லி, சேகர்பாபுவின் வலியுறுத்தலை மறுத்துள்ளார் செங் கோட்டையன். 

விஜய்யுடன் ஒன் டூ ஒன் சந்திப்பு!

பட்டினம்பாக்கத்திலுள்ள தனது ரெசிடென்சியல் அலுவலகத்துக்கு 26ஆம் தேதி மாலை 4 மணிக்கு வந்தார் நடிகர் விஜய். செங்கோட்டையனுக்கு இந்த தகவல் தெரிவிக்கப்பட்டதுடன் ஆதவ் அர்ஜுனாவுக்கு சொந்தமான 5050 எண் கொண்ட கார் அனுப்பி வைக்கப் பட்டது. தனது சொந்த காரை (பச09 ஈஊ 9393) தவிர்த்து விட்டு ஆதவ் அனுப்பிய காரில் பட்டினப்பாக்கத்திற்கு 4:30 மணிக்கு வந்தார் செங்கோட்டையன். விஜய் அலுவலகத்தில் புஸ்ஸி ஆனந்த், ஜான் ஆரோக்கியசாமி, அருண்ராஜ், ஆதவ் அர்ஜுனா, சி.டி.நிர்மல்குமார் உள்ளிட்ட பலரும் செங்கோட்டையனை வரவேற்றனர். விஜய்யை சந்தித்தார் செங்ஸ். இதில் இரண்டாம் நிலை தலைவர்கள் யாரும் அனுமதிக்கப்படவில்லை. விஜய்யும், செங்கோட்டையனும் மட்டுமே 2 மணி நேரம் ஒன் டூ ஒன் விவாதித்தனர். சந்திப்பு முடிந்து செங்கோட்டையன் கிளம்பியபோதும், மீடியாக்களிடம் வாய் திறக்கவில்லை. அருண்ராய் மட்டும், தி.மு.க.வுக்கு ரெட் அலெர்ட் என்று மட்டும் சொல்லிவிட்டுச் சென்றார். 

விஜய்-செங்ஸ் சந்திப்பில் நடந்தது என்ன? 

வீட்டிற்குச் சென்ற செங்கோட்டையன் தன்னை சந்தித்த ஆதரவாளர்களிடம் விஜய்யின் சந்திப்பை அவர்களிடம் விவரித்தார். அதேசமயம், த.வெ.க.வின் இரண்டாம் நிலை தலைவர்கள் சிலரை அழைத்து அவர்களிடம் விவாதித்தார் விஜய். 

இதுகுறித்து நாம் விசாரித்தபோது... "ஏற்கனவே நாம் பேசி முடிவு எடுக்கப்பட்டதில் நான் உறுதியாக இருக்கிறேன்; நீங்களும் உறுதியாக இருப்பீர்கள்னு நினைக்கிறேன்'' என செங்கோட்டையன் சொல்ல, "உங்களுக்கு அதில் சந்தேகம் வேண்டாம். எங்களுடன் நீங்கள் வருவது எனக்கு ரொம்ப ரொம்ப மகிழ்ச்சி அண்ணா. 78 வயதாகிறதென உங்களைச் சொல்ல முடியாது. இளமையாக ஸ்மார்ட்டாக இருக்கிறீர்கள்'' என்ற விஜய், "கட்சியில் எனக்கு அடுத்த நிலையில் எந்த பதவியை நீங்கள் விரும்பினாலும் ஓ.கே. செய்துவிடலாம். அதைப்பற்றி கவலைப்படாதீர்கள். கட்சியை வழிநடத்தப் போவதே நீங்கள்தான்'' என்று சொல்லியிருக்கிறார். ஏற்கனவே விஜய்யுடன் பேசிய செங்கோட்டையன், "த.வெ.க.விற்கு நான் வருவதாக இருந்தால், கட்சியிலும், சட்டமன்றத் தேர்தலிலும் எனக்கும் என்னை நம்பி வரும் ஆதரவாளர்களுக்கும் உரிய மரியாதை தரப்பட வேண் டும். கட்சி பொறுப்புகளிலும் தேர்தலில் போட்டியிட வாய்ப்பும் எனது ஆதர வாளர்களுக்கு மறுக்கப்படக் கூடாது'' என நிபந்தனை விதித்திருந்தார். அதை அப்போதே ஏற்றுக்கொண்ட விஜய்யிடம், மீண்டும் ஒருமுறை இந்த சந்திப்பிலும் நினைவு படுத்தினார் செங்கோட்டையன். மேலும், தி.மு.க.வின் வலி யுறுத்தல், டெல்லியிலிருந்து அவசரப்படாதீர்கள் என்கிற அழுத்தம் ஆகியவைகளையும் விஜய்யிடம் பகிர்ந்துகொண்ட செங்கோட்டையனிடம், "என்னைப் பார்த்து இவர்கள் ஏன் பயப்படுகிறார்கள்? என்னை சீண்டுவதால்தான் அவர்களை நான் விமர்சிக்கிறேன்'' என்று சொல்லி தி.மு.க.வை கடுமையாக சாடியுள்ளார் விஜய். 

"எம்.ஜி.ஆர். காலத்து அரசியல் தொடங்கி தற் போதைய அரசியல் நிலவரம் வரை விஜய்யிடம் பகிர்ந்துகொண்டார் செங்ஸ். பனையூர் அலுவலகத்துக்கு 27-ந் தேதி செங்கோட்டையன் வருகிறார். முறைப்படி அவர் இணைந்ததும் தி.மு.க., அ.தி.மு.க., பா.ஜ.க. கட்சிகளைச் சேர்ந்த பிரமுகர்களை த.வெ.க.வுக்கு கொண்டுவரும் அசைன்மெண்ட் கொடுக்கப் படவிருக்கிறது'” என்றனர் த.வெ.க. நிர்வாகிகள். 

சந்திப்பு முடிந்து வீட்டிற்கு செங்கோட்டையன் திரும்பிய நிலையில்... அவரது முடிவை மாற்ற 26ஆம் தேதி நள்ளிரவு தாண்டியும் முயற்சித்த படியிருந்தது தி.மு.க. 

--------------------------------------------
இறுதிச் சுற்று!
200 தொகுதிகள் இலக்கு;  பிறந்தநாள் செய்தி சொன்ன உதயநிதி!

தமிழகத்தின் துணை முதல்வரும், தி.மு.க. இளைஞரணி செயலாளருமான உதயநிதி ஸ்டாலினின் 49-வது பிறந்தநாள் விழாவை 27-ந்தேதி தமிழகம் முழுவதும் கோலாகலமாக கொண்டாடினர் தி.மு.க.வினர். நலத்திட்ட உதவிகளும் அன்னதானமும்  வழங்கி உற்சாகத்தில் திளைத்தனர் உடன்பிறப்புகள். காலையில் தனது பெற்றோர்களான ஸ்டாலின் மற்றும் துர்கா ஸ்டாலின் ஆகியோரை சந்தித்து வாழ்த்துப் பெற்றார் உதயநிதி. இதனைத் தொடர்ந்து, சென்னை மெரினா கடற்கரையில் உள்ள பேரறிஞர் அண்ணா மற்றும் கலைஞர் நினைவிடங்களிலும், சென்னை வேப்பேரியிலுள்ள பெரியார் நினைவிடத்திலும்  மலர்தூவி மரியாதை செலுத்தி வணங்கினார் உதயநிதி.  இந்நிகழ்வில் அமைச்சர்கள், எம்.பி.க்கள், எம்.எல்.ஏ.க்கள் மற்றும் நிர்வாகிகள் உடனிருந்தனர்.  பெரியார் திடலில் பேசிய  உதயநிதி, "வெல்வோம் 200;  படைப்போம் வரலாறு. இதுதான் நமது இலக்கு. அதுதான் எனது பிறந்தநாள் வாழ்த்துச் செய்தி' என்றார். மேலும் தனது பிறந்தநாள் குறித்து எக்ஸ் தளத்தில், "ஆதிக்கவாதிகளிடம் குவிந்திருந்த அதிகாரத்தை சாமானிய மக்களிடம் கொண்டுசேர்த்த தமிழ்நாட்டின் தலைமகன் பேரறிஞர் அண்ணா அவர்களின் நினைவிடத்தில் பிறந்த நாளில் மரியாதை செலுத்தினேன். பேரறிஞர் அண்ணா வழியில் கடமை, கண்ணியம், கட்டுப்பாடு காப்போம்! மாநில உரிமைகளையும் சமூக நீதியையும் நிலைநாட்டுவோம்'' என்று பதிவிட்டார். 

தி.மு.க.வினரின் வாழ்த்துகளைப் பெறுவதற்காக உதயநிதியின் குறிஞ்சி இல்லத்தில் பிரமாண்ட ஏற்பாடுகள் செய்யப்பட்டிருந்தன. தமிழகம் முழுவதுமிருந்து தொண்டர்கள் அலையலையாய் குறிஞ்சி இல்லத்தில் குவிந்தனர். நீண்ட நேரம் நின்று தொண்டர்களின் வாழ்த்துகளைப் பெற்றார் உதயநிதி. பொன்னாடைகள், மலர்க்கொத்துக்கள் தவிர்க்கப்பட்டு, புத்தகங்கள் பரிசளித்து மகிழ்ந்தனர் உடன்பிறப்புகள்.

-இளையர்