கரூர் உயிர்ப்பலி வழக்கு! வேகமெடுக்கும் சி.பி.ஐ. விசாரணை!

கரூர் வேலுச்சாமிபுரத்தில் கடந்த செப். 27-ஆம் தேதி நடந்த விஜய் பிரச்சார கூட்ட நெரிசலில் சிக்கி 41 நபர்கள் பலியான வழக்கு தொடர்பாக, உச்ச நீதிமன்ற உத்தரவின்கீழ் கடந்த அக்டோபர் 16-ம் தேதி முதல் கரூர் மாவட்ட ஆட்சியர் அலுவலக வளாகத்திலுள்ள கரூர் சுற்றுலா மாளிகையில் தற்காலிக முகாமை அமைத்து, சி.பி.ஐ. அதிகாரிகள் விசாரணை நடத்தி வருகின்றனர்.

அக். 31-ஆம் தேதி மற்றும் நவ 1-ஆம் தேதி ஆகிய இரு நாட்கள் 3டி லேசர் ஸ்கேனர் மூலம் வேலுச்சாமிபுரத்தில் சாலையை சி.பி.ஐ.யினர் அளவீடு செய்தனர். நவ. 4, 5-ஆம் தேதிகளில் பாதுகாப்புப் பணிகளில் ஈடுபட்ட போலீஸார், நவ. 6-ஆம் தேதி முதல் நவ. 11-ஆம் தேதி வரை ஆம்புலன்ஸ் உரிமையாளர்கள், ஓட்டு நர்களிடம் 6 நாட்கள் விசாரணை நடத்தினர்.

நவ. 8 மற்றும் 9 ஆகிய இரு நாட்கள் த.வெ.க. வழக்கறிஞர் அரசு உள்ளிட்டோர் பிரச்சார வாகனத்தின் சி.சி.டி.வி. காமரா பதிவுகள் அடங்கிய வீடியோக்கள், நிகழ்ச்சியில் பங்கேற்ற வர்கள் விவரங்கள் அடங்கிய ஆவணங்களை, சி.பி.ஐ.யிடம் ஒப்படைத்து 2 நாட்களாக விளக்கமளித்தனர். நவ. 10 மற்றும் 17-ஆம் தேதிகளில் தமிழ்நாடு பவர் கிரிட் கார்ப்பரேஷன் அதிகாரிகளிடமும், நவ. 11-ஆம் தேதி முதல் 14-ம் தேதிவரை கூட்ட நெரிசலில் காயமடைந்தவர் களிடம் 4 நாட்கள் விசாரணை நடத்தப்பட்டது.

நவ. 15-ஆம் தேதி கரூர் வேலுச்சாமி புரத்தில் உயிரிழந்தவர்கள் குடும்பத்தினர், காயமடைந்தவர்களை நேரில் சந்தித்தும், கரூர் வெங்கமேடு வி.வி.ஜி. நகரைச் சேர்ந்த கூட்டநெரிசலில் காயமடைந்த தாய், மகளான உஷா, திவ்யா ஆகியோரை நேரில் சந்தித்தும் சி.பி.ஐ. அதிகாரிகள் விசாரணை நடத்தினர்.

கடந்த 4 நாட்களாக விசாரணைக்கு யாரும் ஆஜராகாத நிலையில் நவ. 24-ஆம் தேதி காலை சுமார் 10 மணியளவில் கரூர் சுற்றுலா மாளிகைக்கு த.வெ.க. பொதுச்செயலாளர் புஸ்ஸி ஆனந்த், தேர்தல் பிரிவு பொதுச்செயலாளர் ஆதவ் அர்ஜுனா, இணைச் செயலாளர் சி.டி. நிர்மல்குமார், கரூர் மேற்கு மாவட்ட செயலாளர் வி.பி.மதியழகன், பவுன்ராஜ், வழக்கறிஞர் அரசு ஆகியோர் 3 கார்களில் வந்து ஆஜராகினர்.

இதில் சி.பி.ஐ.யின் விசாரணை அழைப் பாணையைப் பெற்றுக்கொண்ட புஸ்ஸி ஆனந்த் கோவிலுக்கு சென்று அந்த அழைப்பாணையை சாமி முன்பு வைத்து மனமுருகி வேண்டிவிட்டே விசாரணைக்கு வந்துள்ளார். விசாரணை அதிகாரிகள், “"நீங்கள்தான் சி.பி.ஐ. விசாரணை வேண்டுமென்று கேட்டுள்ளீர்கள். நாங்கள் விசாரணைக்கு அழைத்தால் ஒத்துழைக்கமால் இருக்கிறீர்கள்''’என்று கூறியுள்ளனர். சி.பி.ஐ. அதிகாரிகள் புஸ்ஸி ஆனந்தை பலமுறை தொடர்புகொள்ள முயன்றபோதும், அவர் செல்போன் அழைப்பை ஏற்கவில்லை என்பதால் இந்தக் கேள்வி முன்வைக்கப்பட்டதாம்.

அடுத்ததாக ஆதவ் அர்ஜுனாவிடம், 4 உதவியாளர்களை வைத்துக்கொண்டிருக்கும் உங்களை செல்போனில் தொடர்புகொண்டால் பதிலளிக்க நீங்கள் தயாராக இல்லை. அப்படி என்ன தொழில் செய்கிறீர்கள்? அரசாங்கத்திற்கு முறையாக கணக்கு காட்டும் நல்ல தொழில்தானே” என்று ஆரம்பத்திலேயே காட்டமாக விசாரணையை ஆரம்பித்துள்ளது சி.பி.ஐ. அதனை தொடர்ந்து இவ்வளவு கூட்டம் வரும் என்பது உங்களுக்கு தெரியாதா, ஏன் கூட்டத்தை கட்டுப்படுத்தவில்லை, இந்த இடத்தை ஏன் தேர்வு செய்தீர்கள் என்றும் கேள்விகளை முன்வைத்துள்ளனர். 

அதற்குப் பதிலளித்த ஆதவ், “"காவல்துறை இந்த இடத்தை எங்களுக்கு ஒதுக்கிக் கொடுத்தது'' என்று கூறியவுடன், "எவ்வளவு கூட்டம் வரும் என்பதை ஏன் முன்கூட்டியே காவல்துறைக்கு அறிவிக்கவில்லை'' என்றும், "அப்படி வந்த கூட்டத்தை நீங்கள் ஏன் கட்டுப்படுத்தவில்லை'' என்றும் கேட்டுள்ளது. "காவல்துறை எங்களை தடுக்கவில்லை, தடுத்திருந்தால் நாங்கள் சென்றிருக்கமாட்டோம்'' என்றும் கூறியுள்ளார். "காவல்துறை உங்களை தடுத்து நிறுத்தியதற்கான வீடியோ ஆதாரங்கள் இருக்கிறது. அவர்களைத் தாண்டி நீங்கள் தொண்டர்களை முன்னேறிச் செல்லுங்கள் என்று சொல்லும் ஆடியோவும் அதில் உள்ளது'' என்று சி.பி.ஐ. அதிகாரிகள் கூறியுள்ளனர். தமிழக வெற்றிக் கழகத்தின் மேற்கு மாவட்டச் செயலாளர் மதியழகனிடம் 7 மணி நேரம் சி.பி.ஐ. அதிகாரிகள் விசாரித்து, கூடுதல் தகவல்களைக் கேட்டுப் பெற்றதாகக் கூறப்படுகிறது

அவரைத் தொடர்ந்து மாவட்டச் செயலாளர் மதியழகனை பாதுகாப்பாக காரில் அழைத்துச்சென்ற பவுன்ராஜ் என்பவரிடம் நடத்தப்பட்ட விசாரணையில், "நான் போஸ்டர், விளம்பரப் பலகை கட்டுவதற்காக வந்தேன், அப்போதுதான் அவரை அழைத்துச்சென்றேன். எனக்கும் இந்த விவகாரத்திற்கும் எந்தவித தொடர்பும் கிடையாது'' என்று கெஞ்சியுள்ளார்.

இந்த விசாரணையை தொடர்ந்து இணைச்செயலாளர் சி.டி.நிர்மல்குமார் செய்தியாளர் களை சந்தித்துப் பேசுகையில், "விசாரணைக்குத் தேவையான அனைத்து ஆவணங்களையும் வழங்கியுள்ளோம். இதில் தொடர்புடைய குற்றவாளிகள் தண்டிக்கப்படவேண்டும். தற்போது சி.பி.ஐ. விசாரணை நடந்துவருவதால் சதிச்செயலில் ஈடுபட்டவர்கள் யாரென வெளிப்படையாகக் கூறமுடியாது''’என்று அவர் தெரிவித்தார். இதற்கிடையில் கரூர் டவுன் போலீசாரும் விசாரணைக்கு ஆஜராகியதோடு, தங்கம் கைவசமிருந்த வீடியோ ஆதாரங்களையும் சி.பி.ஐ.யிடம் சமர்ப்பித்துத் திரும்பியுள்ளனர்.

இந்நிலையில் 26ஆம் தேதி கரூர் நகர காவல் ஆய்வாளர் மணிவண்ணன் மற்றும் இந்துஸ்தான் ஜனதா கட்சியின் பிரமுகர் ராகுல்காந்தி, கரூர் டெக்ஸ் தொழிலதிபர் ஒருவர் மற்றும் விவசாயி கோகுலகண்ணன் ஆகியோர் விசாரணைக்கு ஆஜராகியுள்ளனர்.

இவையெல்லாம் ஆரம்பகட்ட  விசாரணை மட்டுமேதானாம். விரைவில் இதை மேற்பார்வையிட நியமிக்கப்பட்ட அஜய் ரஸ்தோகி தமிழகம் வரவிருக்கிறார். அப்போதுதான் விரிவான விசாரணை நடக்குமாம்.