Skip to main content

வாரியப் பதவி தா! சீனியர்களின் நெருக்கடியில் எடப்பாடி!

நாடாளுமன்றத் தேர்தலோடு சட்டமன்றத்துக்கும் தேர்தல் வரும் என்கிற பயம் அதிமுக எம்.எல்.ஏ.க்களிடம் அதிகரித்துவரும் நிலையில், கட்சியின் சீனியர்களிடமிருந்து வரும் நெருக்கடியால் அப்-செட்டாகியிருக்கிறாராம் எடப்பாடி.

minister


கொங்கு மண்டலம் மற்றும் வட தமிழகத்தைச் சேர்ந்த அ.தி.மு.க. எம்.எல்.ஏ.க்கள் சிலரிடம் நாம் பேசியபோது, ""தினகரன் ஆதரவு எம்.எல்.ஏ.க்கள் 18 பேர் தகுதி நீக்க வழக்கின் தீர்ப்பு சாதகமா இருக்கும்னு நம்பிக்கையில்லை. அப்பீல் வரை போனாலும், ஆட்சி கவிழும் அபாயம் இருக்கு. பெரும்பான்மையை நிரூபிக்க முடியாமல் முதல்வர் பதவியிலிருந்து எடப்பாடி விலகுவார். அதற்கான திட்டங்களை கடந்த 2 மாதங்களாக உருவாக்கி வைத்திருக்கும் பா.ஜ.க. தலைமை, நாடாளுமன்றத் தேர்தலோடு சட்டமன்றத்திற்கும் தேர்தல் நடத்தவே விரும்புகிறது.

இதற்கிடையே திருவாரூருக்கும் திருப்பரங்குன்றத்துக்கும் ஜனவரிக்குள் இடைத்தேர்தல் நடத்த வேண்டும். ஆனா, மத்திய அரசின் மனமறிந்து செயல்படும் தலைமைத் தேர்தல் ஆணையம், ஒருவேளை நாடாளுமன்ற-சட்டமன்றத் தேர்தலை சேர்த்து நடத்தும் பா.ஜ.க.வின் மனநிலைக்கேற்ப இடைத்தேர்தலை தள்ளிப்போடலாம். எம்.பி., தேர்தலின்போது, தமிழகத்தில் வலிமையான ஒரு கூட்டணிக்குள் இருக்க வேண்டும் என பா.ஜ.க. தலைவர்கள் விரும்புகின்றனர். தி.மு.க. அல்லது ரஜினி என்பது அவர்களின் முதல்கட்ட சாய்ஸ்.

நாடாளுமன்றத் தேர்தலை நடத்துவதுபற்றி அனைத்துக்கட்சியினரோடு தலைமைத் தேர்தல் ஆணையம் டெல்லியில் ஒரு ஆலோசனைக் கூட்டத்தை கடந்த வாரம் நடத்தியது. அன்று இரவு தேர்தல் அதிகாரிகளுடன் தமிழக இடைத்தேர்தல் குறித்து தனி ஆலோசனை நடத்தியுள்ளது பா.ஜ.க. இதையறிந்துதான், ஆட்சி குறித்த பயம் எம்.எல்.ஏ.க்களிடம் வந்திருக்கிறது'' என்கின்றனர்.

இதுகுறித்து அமைச்சர்கள் சிலரின் உள் வட்டத்தில் நாம் விசாரித்தபோது, ‘""கட்சி-ஆட்சி இரண்டிலும் எடப்பாடியின் கை ஓங்கியிருப்பதை அமைச்சர்கள் மற்றும் கட்சியின் சீனியர்கள் பலராலும் ஜீரணிக்க முடியவில்லை. அதேசமயம், ஆட்சிக்கு ஆபத்து நெருங்கியிருப்பதை எல்லோருமே உணர்ந்திருக்கிறோம். அதனால்தான் எடப்பாடிகூட, தேர்தலை எதிர்கொள்ள பல கோடிகள் தேவைப்படுமென்பதால், முக்கிய அமைச்சர்களிடம் கட்சி நிதி வசூலிக்க முயற்சித்தார். அது துவக்கத்திலேயே அமைச்சர் சி.வி.சண்முகம் மூலம் மோதலாக வெடித்தது. அவரவர் இலாகாவின் வலிமைக்கேற்ப கட்சிநிதி தரவேண்டும் என எடுக்கப்பட்ட அசைன்மெண்ட், ஓரிருவரைத் தவிர பெரும்பாலான அமைச்சர்களிடம் அதிருப்தியையே உருவாக்கியது. "கட்சி நிதி கேட்டு நெருக்கடி தராதீர்கள்; தேர்தல் வந்தால் அமைச்சர்கள் அவரவர் மாவட்டத்தைப் பார்த்துக்கொள்வார்கள். அம்மா பாணியில் நிதி வசூலிக்க முயற்சித்தால் தேவையில்லாத பிரச்சனைகள்தான் உருவாகும்' என எடப்பாடியிடமே தெரிவித்துவிட்டனர். இது, எடப்பாடியை அப்-செட்டாக்கியது.

இது ஒருபுறமிருக்க, ஆட்சிக் காலம் முடிவதற்குள் அதிகாரத்தை அனுபவிக்கவேண்டும் என்கிற ஆசை, கட்சி பதவியிலுள்ள சீனியர்களுக்கும், எம்.பி., எம்.எல்.ஏ.க்களுக்கும் வந்துவிட்டது. தமிழக அரசின் கட்டுப்பாட்டிலுள்ள பொதுத்துறை நிறுவனங்களின் சேர்மன் பதவியையும், துறை சார்ந்த வாரிய பதவிகளையும் குறி வைத்து எடப்பாடியிடம் அடம் பிடிக்கத் துவங்கியுள்ளனர். வடசென்னையில் அமைச்சர் ஜெயக்குமாருக்கும், அவைத்தலைவர் மதுசூதனனுக்குமான நீண்டகால பகை, கூட்டுறவு சங்கத்தேர்தலில் மோதலாக வெடிக்க, எடப்பாடியிடம் மதுசூதனன், "வட சென்னையில் நான் இருக்கணும் அல்லது ஜெயக்குமார் இருக்கணும். யார் வேணும்னு நீங்களே முடிவு பண்ணிக்குங்க. ராயபுரத்தைத் தாண்டி வட சென்னையில் அவர் அரசியல் செய்யக்கூடாது, உடனடியாக வாரியத்தை உருவாக்கி எனக்கும் என்னைப் போல கட்சியின் சீனியர்களுக்கும் பதவி தர வேண்டும். நீங்க மட்டுமே அனுபவிக்கணும்னு நினைக்காதீங்க. நான் நினைச்சேன்னா கட்சியில எதையும் செய்யலாம். தேர்தல் ஆணையம் என்னிடத்தில்தான் கட்சியையும் சின்னத்தையும் ஒப்படைச்சிருக்கு' என ஒட்டுமொத்த ஆத்திரத்தையும் கொட்டித்தீர்த்துள்ளார். தவித்த எடப்பாடி, கடைசியில் வாரியப்பதவி பற்றி உறுதி அளித்துள்ளார்'' என்கிறார்கள்.

மதுவுக்கு கொடுக்கப்பட்ட உறுதியை அறிந்து, வாரியப் பதவிகள் கேட்டு சீனியர்கள் பலரும் எடப்பாடிக்கு நெருக்கடி தரத் தொடங்கியுள்ளனர்.

-இரா.இளையசெல்வன்
 

உங்கள் கருத்தைப் பதிவு செய்யுங்கள்

இவ்விதழின் கட்டுரைகள்