சென்ற இதழ் தொடர்ச்சி.. கலெக்டர் யள் பென்னிங்டன் கமிட்டி! -ஒரு நூலகம் நடத்தும் சட்டப் போராட்டம்!

ஸ்ரீவில்லிபுத்தூர் பென்னிங்டன் கமிட்டியினர் தொடர்ந்து குமுறலை வெளிப்படுத்தினர்.

"கடந்த 150 ஆண்டுகளில் பென்னிங்டன் கமிட்டியின் பதவி வழித்தலைவர் பொறுப்பினை வகித்த மாவட்ட ஆட்சியர் யாருமே கமிட்டி கூட்டத்தில் கலந்துகொண்டது இல்லை. பென்னிங்டன் நூலகம் அமைவதற்கு பெரும் பங்காற்றிய கலெக்டர் பென்னிங்டனும்கூட 1875 காலகட்டத்தில் கமிட்டி கூட்டத்தில் கலந்துகொண்டதாக பதிவு எதுவுமில்லை. விருதுநகர் மாவட்ட ஆட்சியர்களாக வருபவர்கள் பென்னிங்டன் கமிட்டி கூட்டத்தில் பங்கேற்காத நடைமுறை(?) தொடர்ந்தாலும், 2003 - 2006ல் விருதுநகர் மாவட்ட ஆட்சியராக இருந்த முகமது அஸ்லம், விதிகளை மீறி கமிட்டி நிர்வாக விஷயங்களில் தலையிட்டார். அப்போது இருந்த கமிட்டி நீதிமன்றத்தில் முறையிட்டு ‘ஸ்டே’ வாங்கியது. அதன்பிறகு, கலெக்டர் முகமது அஸ்லம் அமைதியாகிவிட்டார். 20 வருடங்களுக்குப் பிறகு தற்போதைய விருதுநகர் மாவட்ட ஆட்சியர் ஜெயசீலனும் விதிகளுக்கு முரணாக கமிட்டி நிர்வாகிகள் விஷயத்தில் தொடர்ந்து தலையிடுகிறார். ஆனாலும், சென்னை உயர் நீதிமன்றம் தடையுத்தரவுகளைப் பிறப்பித்து கடிவாளம் போட்டுள்ளது. அதனால், ‘சட்டத்தின் துணைகொண்டு பென்னிங்டன் கமிட்டியினர் மாவட்ட ஆட்சியரையே எதிர்ப்பதா?’ என்பது அரசு இயந்திரத்தின் எண்ணவோட்டம் ஆகிவிட்டது'' என்று வேதனையை வெளிப்படுத்தியவர்களிடம் "என்னென்ன இடையூறுகள்? எவ்வாறு முறியடிக்கப்பட்டன?'' எனக் கேட்டோம்.

“மாவட்ட நிர்வாகத்தின் நிர்பந்தத்தால் துணைத் தலைவர், செயலாளர், பொருளாளர் உள்ளிட்ட நிர்வாக உறுப்பினர்கள் 13 பேரில் 6 பேர் பென்னிங்டன் கமிட்டியிலிருந்து ராஜினாமா செய்து வெளியேறியதும், அந்த மூன்று பொறுப்புக்களை பழைய நிர்வாக உறுப்பினர்களில் 3 பேர் ஏற்றுக்கொண்டனர். இதனைத் தொடர்ந்து, கமிட்டியினர் 7 பேருடன் மேலும் 4 புதிய நிர்வாக உறுப்பினர்கள் இணைந்தனர். அதனால், மாவட்ட நிர்வாகத்தின் ஆசி பெற்றவர் களோ, அரசியல் பிரமுகர்களோ, கமிட்டிக்குள் நுழையமுடியாமல் போனது. இந்த ஆத்திரத்தில், 90 ஆண்டுகள் பழமையான கட்டடத் தில் இயங்கும் 175 மார்க்கெட் கடைகளை இடிக்கப்போகிறோம் என்று கோட்டாட்சியரிடமிருந்து நோட்டீஸ் வந்தது. இந்த இடத்தில் ஒரு விஷயத்தைச் சொல்லவேண்டும். பென்னிங்டன் கமிட்டிக்கு எதிரான எந்தவொரு விஷயத்திலும் கலெக்டர் நேரடியாக ஈடுபடமாட்டார். ஆனால், நடவடிக்கை என்ற பெயரில் ஒவ்வொரு அரசுத் துறையும் கமிட்டியினரை மிரட்டும் பின்னணியில் நிச்சயமாக அவர் இருப்பார்.

மார்க்கெட் கட்டடத்தின் உறுதித்தன்மையைப் பரிசோதித்து பார்த்துக்கொள்ளுங்கள், இடிக்கவேண்டிய அவசியம் இருக்காது என்று நாங்கள் கூறியபோது, நிர்வாகிகள் உள்ளிட்ட 11 நிர்வாக உறுப்பினர்களும் பென்னிங்டன் கமிட்டியிலிருந்து ராஜினாமா செய்துவிடுங்கள், இடிக்கமாட்டோம் என்றார்கள் வாய்மொழியாக. அதன் உள்நோக்கத்தை அறிந்து கலெக்டர், சப்-கலெக்டர், தாசில்தார் ஆகிய மூவரும் பென்னிங்டனுக்குள் வரக்கூடாது என்று உயர் நீதிமன்றத்தில் தடையுத்தரவு பெற்றோம். மறுநாளே, ஏற்கெனவே ராஜினாமா செய்துவிட்டுப் போன 6 பேரையும் தூண்டிவிட்டு, பென்னிங்டன் கமிட்டி அலுவலகப் பூட்டை உடைத்து உள்ளே நுழையச் செய்து, 6 நாட்களாக வெறுமனே உட்காரவைத்தார்கள். முன்னாள் கமிட்டி செயலாளர் சண்முகநாதன், கலெக்டர், சப்-கலெக்டர், தாசில்தார் ஆகிய 4 பேர் மீது நீதிமன்ற அவமதிப்பு வழக்கு தொடர்ந்தோம். ‘படிக்காதவர் அறியாமையில் பண்ணலாம். பெரிய படிப்பு படித்த அதிகாரிகள் இப்படி பண்ணலாமா?’ என்று நீதிமன்றத்தில் கேள்வி எழுந்தது. இந்த கோபத்தில், மாவட்ட நிர்வாகத்தின் வழிகாட்டுதலில், முன்னாள் செயலாளர் சண்முகநாதன், கமிட்டி அலுவலக பீரோ சாவியை செயலாளர் ராதா சங்கரும், உப தலைவர் முத்து பட்டரும் திருடிச் சென்றுவிட்டதாக பொய்ப் புகார் ஒன்றை அளிக்க, ஸ்ரீவில்லிபுத்தூர் டவுண் காவல்நிலையம் வேகமாக வழக்கு பதிவு செய்தது. முத்து பட்டரை கைது செய்வதற்கு காவல்துறை தீவிரம் காட்டியபோது, ‘பொய் வழக்கில் 70 வயது முதியவரைக் கைது செய்தால், நீதிமன்றத்துக்குப் பதில் சொல்லவேண்டியது வரும்’ என்று காவல்துறை உயரதிகாரி ஒருவர் எச்சரிக்க.. அந்த வழக்கு மூடப்பட்டது.

பொதுப்பணித் துறை, மின்வாரியம், ஸ்ரீவில்லிபுத்தூர் நகராட்சி ஆகிய மூன்றும், பென்னிங்டன் மார்க்கெட் கட்டடத்தில் உள்ள கடைகளை இடிப்போம், மின்னிணைப்பைத் துண்டிப்போம் என்று அதனதன் பங்குக்கு தொடர்ந்து மிரட்டல் விடுத்தனர். உயர் நீதிமன்றத்திலிருந்து தனித்தனியாக 3 தடையுத்தரவுகளைப் பெற்று, அத்துறையினரின் தொல்லைகளில் இருந்து தற்காலிகமாக விடுபட்டுள்ளோம். ஆனாலும், பென்னிங்டன் கமிட்டி நிர்வாகத்தில் ஊழல் நடப்பதுபோல் சித்தரித்து, ஊருக்குள் ஆளாளுக்கு போஸ்டர் ஒட்டுவதும், பேனர் வைப்பதுமாக இருக்கிறார்கள். 100 கோடி ரூபாய் பொதுச் சொத்தைப் பாதுகாப்பதற்காக பென்னிங்டன் கமிட்டியினர் படும்பாடு சொல்லிமாளாது. தற்போது எங்களிடம் உயர் நீதிமன்ற தடையுத்தரவுகள் நான்கு இருக்கின்றன. வழக்குகள் முடிவதற்கு எப்படியும் ஏழெட்டு வருடங்கள் ஆகும். நீதி கிடைக்கும் என்ற நம்பிக்கை இருக்கிறது'' என்றனர்.

சி.பி.எம். விருதுநகர் மாவட்டச் செயலாளர் குருசாமி யிடம் பென்னிங்டன் கமிட்டிக்கு எதிராக பெருந்திரள் ஆர்ப்பாட் டம் நடத்தியது ஏன்?’என்று கேட்டோம்.

"அன்னைக்கு ஆர்ப்பாட் டத்துல தனியார் நடத்துறதுல யும் ஊழல் இருக்கு. அரசாங்கம் நடத்துறதுலயும் ஊழல் இருக் குன்னு சொன்னோம். எல்லா பக்கமும் ஊழல் இருக்கு. யார் அப்பன் வீட்டு சொத்துன்னு போஸ்டர் அடிச்சு ஒட்டுனது கம்யூனிஸ்ட் கட்சி இல்ல. நிர்வாகிகளுக்குள் பிரச்சனை யாகி வெளிய வந்ததுக்குப் பின்னாடி, ஒரு அரசியல் கட்சிங் கிற முறைல, இதுல அரசு தலையிடணும்னு சொன்னோம். பென்னிங்டன் கமிட்டியை ஜனநாயகப்பூர்வமா நடத்தணும் கிறதுதான் எங்களோட கருத்து'' என்றவரிடம் "ஊழல் நடந்துள்ளதா?'' என்று கேட்டபோது "எங்ககிட்ட மூணு நாலு பாய்ண்ட் இருக்கு. முழு விபரத்தையும் அப்புறம் சொல்லு றேன்'' என்றவர், அதன்பிறகு நமது லைனுக்கு வரவில்லை.

பென்னிங்டன் மார்க்கெட் பகுதியிலுள்ள கடைகளைச் சுற்றி வந்தோம். அங்கு கடை நடத்தும் ராஜேந்திரன் "40 வருஷமா எங்க காய்கறிக் கடை இங்கதான் இருக்கு. இந்த கட்டடத்தை கண்ணால பார்த்தாலே தெரிஞ் சிரும். எம்புட்டு ஸ்ட்ராங்கா இருக்குன்னு. எந்த அதிகாரின்னாலும் வரட்டும், அடித்தளத்தை தோண்டிப் பார்க்கட்டும், சுவரை நோண்டிப் பார்க்கட்டும். அசந்து போயிருவாங்க. அந்தக் காலத்துல அப்பேர்ப்பட்ட கட்டுமானத்துல கட்டிருக்காங்க. இன்னும் 100 வருஷம் ஆனாலும் இந்த கட்டடத்துக்கு ஒரு குறையும் வராது. தேவையில்லாம மார்க்கெட் விஷயத்துல அதிகாரிகள் அரசியல் பண்ணுறாங்க'' என்றார் ஆதங்கத்துடன்.

பென்னிங்டன் கமிட்டி விவகாரத்தை நன்கறிந்த உள்ளூர் வழக்கறிஞரான சுரேஷ் நெப்போலியன் "நிர்வாகிகளுக்கு மத்தியில் என்ன பிரச்சனையும் இருந்துட்டு போகட்டும். ஆனா.. லைப்ரரியை ஒழுங்கா ரன் பண்ணுறாங்க. இதை பிடுங்கி அரசியல்வாதிங்க கையில கொடுத்தா என்ன ஆகும்? அமைச்சர் பேரைச் சொல்லி நாலு கடையை எடுத்துக்குவாங்க. ஸ்ரீவில்லிபுத்தூர் நகர சேர்மன் பேர்ல 10 கடையை வச்சுக்குவாங்க. ஊருக்கு நடுவுல எந்த நேரமும் மக்கள் நடமாட்டம் இருக்கிற இடம் பென்னிங்டன் மார்க்கெட். இங்க இருக்கிற கடைகளை வச்சு லட்சம் லட்சமா பகடி வாங்குவாங்க. அதான்.. லைப்ரரியை நடத்துறதுக்கு வர்ற வருவாய்ல கைவைக்க அரசியல் வாதிங்க துடிக்கிறாங்க. இதுக்கு கலெக்டரை ஒரு கருவியா பயன் படுத்துறாங்க. மார்க்கெட் பில்டிங்கோட ஸ்டெபிலிட்டிய டெஸ்ட் பண்ணணும்னு கலெக்டர் சொல்லுறாரு. முனிசிபாலிடில நேத்து போட்ட ரோட்டோட ஸ்டெபிலிட்டிய டெஸ்ட் பண்ணச் சொல்லுவாரா? ஒரு அரசியல் கட்சிக்காரங்க சேர்மன்கிட்ட ரூ.1 லட்சத்தை வாங்கிட்டு நடத்துன போராட்டம் பிசுபிசுத்துப் போச்சு. பென்னிங்டன் கமிட்டியை ஏதாச்சும் பண்ணணும்கிற அதிகாரிகளோட நடவடிக்கைக்கு பப்ளிக்கே எதிரா இருக்காங்க. ஏன்னா.. முப்பாட்டன் காலத்துல இருந்து எல்லா தரப்பு மக்களும் தொடர்ந்து இந்த லைப்ரரியை பயன்படுத்திட்டு வர்றாங்க. அவங்க வாழ்க்கையுடன் பின்னிப்பிணைந்து இருக்கிறது பென்னிங்டன். பொது மக்களோட இந்தக் கோபம் சட்டமன்றத் தேர்தல்ல நிச்சயம் எதிரொலிக்கும்'' என்றார்.

பென்னிங்டன் கமிட்டி விவகாரத்தில் விருதுநகர் மாவட்ட ஆட்சியர் ஜெயசீலனின் பெயர் தொடர்ந்து அடிபடுவது குறித்து அவரிடமே எழுத்து மூலமாகக் கேட்டோம். இதழ் அச்சேறும் வரையில் அவரிடமிருந்து பதில் வரவில்லை. விளக்கம் அளிக்க முன்வந்தால் பிரசுரிக்கத் தயாராக இருக்கிறோம்.

இந்திய நாட்டை அடிமைப் படுத்தி வைத்திருந்த பிரிட்டிஷ் ஆட்சிக் காலத்தில் வாசிப்பு மூலமாக அறிவு வெளிச்சம் மக்களிடையே பரவவேண்டும் என்ற உயரிய நோக்கத் துடன், ஆங்கிலேய கலெக்டரான பென்னிங்டனின் சமூக அக்கறையின் வெளிப்பாடாக அமைந்திட்ட பென் னிங்டன் நூலகத்துக்கு, ஒன்றரை நூற்றாண்டுகளைக் கடந்து விழா எடுத்துக் கொண்டாட வேண்டிய தருணம் இது.