எடப்பாடிக்கு எதிராக பா.ஜ.க. மாஸ்டர் ப்ளான்!

கடந்த நாடாளுமன்றத் தேர்தலில் அ.தி.மு.க.வில் சீனியர்கள் பலர் தேர்தலில் போட்டியிட தயக்கம் காட்டியது போலவே, 2026 சட்டமன்றத் தேர்தலிலும் அ.தி.மு.க. முன்னாள் அமைச்சர்கள், முன்னாள் எம்.எல்.ஏ.க்கள், எம்.பி.க்கள் எனப் பலரும் போட்டியிடத் தயக்கம் காட்டி வருகிறார்கள்.

தேர்தலில் போட்டியிடும் வேட்பாளர்களுக்கு கட்சித் தலைமையே எப்போதுமே பணத்தை வாரியிறைத்து வெற்றிவாய்ப்பை தக்க வைப்பார்கள். ஆனால், இந்த முறை எடப்பாடி பழனிசாமி விட்டமினை இறக்கத் தயாராக இல்லை. மாறாக, முன்னாள் அமைச்சர்கள், எம்.எல்.ஏ.க்கள், எம்.பி.க்களிடம் "உங்களுக்குண்டான தொகுதிச் செலவுகளை எல்லாம் நீங்களேதான் பார்த்துக்கொள்ள வேண்டும். ரூ.20 கோடி ரெடி பண்ணி வச்சுக்கங்கோ… குறைந்தது 15 கோடியாவது தயார் செய்துவிடவேண்டும்''’ எனச் சொல்லிவிட்டார். 

கட்சிக்குள் நிலைமை இப்படியிருக்க, கூட்டணியில் கட்சிகளை இணைப்பதிலும் எடப்பாடி பழனிச்சாமி சுணக்கம் காட்டுகிறார். இத்தனை பலவீனமாக இருக்கும் எடப்பாடி பழனிசாமி, அ.தி.மு.க.விலிருந்து பிரிந்துபோன சசிகலா, ஓ.பி.எஸ்., டி.டி.வி.தினகரன் போன்றவர்களை மீண்டும் சேர்த்துக்கொள்வதிலும் பிடிவாதம் காட்டுகிறார். 

"நாம் தமிழகத்தில் ஆட்சியமைக்க வேண்டுமானால், சசிகலா, டி.டி.வி.தினகரன், ஓ.பி.எஸ், செங்கோட்டையன் எனப் பிரிந்து சென்றவர்களின் ஒட்டுமொத்த ஆதரவையும் பெற வேண்டும். நீங்கள் எதற்கும் தடையாக மட்டும் இருக்காதீர்கள்'' என எடுத்துச்சொல்லிப் பார்த்தும் அடியோடு மறுத்திருக்கிறார் எடப்பாடி பழனிசாமி.

தி.மு.க.வை தோற்கடிப்பதற்கு இடையூறாக இருக்கும் எந்த சக்தியையும் தூக்கி எறியவும், வெற்றிபெறக் கிடைக்கும் வாய்ப்புகளைப் பயன்படுத்தவும் பா.ஜ.க. டெல்லி தலைமை உறுதியோடிருக்கிறது. அதன் முதல் கட்டமாகத்தான் பா.ஜ.க. கூட்டணியிலிருந்து விலகிச்சென்ற ஓ.பி.எஸ்.ஸை மீண்டும் என்.டி.ஏ. கூட்டணியில் இணைக்க முடிவெடுக்கப் பட்டுள்ளது. அதன் பின்னணியில் நடந்துவரும் சில கணக்குகளை வைத்தே, "அரசியலில் எதுவும் நடக்கலாம். என்.டி.ஏ. கூட்டணியில் சேர்வதற்கான வேலைப் பாடுகள் நடந்துவருகின்றன'' என ஓ.பி.எஸ். தெரிவித்துள்ளார்.

சென்னையில் ஓ.பி.எஸ். தனது ஆதர வாளர்களுடன் சந்தித்துப் பேசுகையில் "டிசம்பர் 15ஆம் தேதி நாம் எடுக்கின்ற முடிவு அரசியல் வரலாற்றில் ஒரு திருப்பு முனையாக இருக்கும். தவறான பொதுக்குழு, செயற்குழு, தொடர் தோல்வி ஆகியவற்றால் மக்களின் ஆதரவையும், நம்பிக்கையையும் அ.தி.மு.க. இழந்துள்ளது. அ.தி.மு.க. ஒன்றிணையாவிட்டால் அ.தி.மு.க. தொண்டர்கள் உரிமை மீட்புக்குழு, கழகமாக மாறும்'' என்று சுட்டிக்காட்டினார்.

அவருடைய இந்த பேச்சுக்குப் பின் மாபெரும் திட்டம் இருப்பது தெளிவாகத் தெரிகிறது. அந்த திட்டத்தை, தனிக்கட்சி தொடக்கமென்று புரளியை கிளப்பிவிட்டுள்ளனர். ஆனால் அமித்ஷா வகுத்துக்கொடுத்த திட்டப்படி  டி.டி.வி., சசிகலா, செங்கோட்டையன், ஓ.பி.எஸ். என நால்வரும் இணைந்து ஓரணியாக செயல்படுவதற்கான திட்டமென்று பார்க்கப்படுகிறது. ஆனால் எடப்பாடி ஒரு நம்பிக்கை துரோகி என்பதாக அமித்ஷாவும் பிரதமர் மோடியும் நம்புவதாகவும், எடப்பாடியை தனிமைப்படுத்தி அரசியல் வாய்ப்புகளே இல்லாதபடி கொண்டுசெல்வதே பா.ஜ.க.வின் திட்டமாகக் கூறுகிறார்கள். இதனால் தான் ஓ.பி.எஸ். தனது தொண்டர்களிடம், அ.தி.மு.க. ஒன்றிணைய வேண்டும் என்றும், அ.தி.மு.க. ஒன்றிணைந்தால், எடப்பாடி தனியாகிவிடுவார் என்ற மாஸ்டர் பிளானை செயல்படுத்தத் தொடங்கியுள்ளனர்.

எனவே இத்திட்டப்படி, த.வெ.கவின் பலத்தை தங்களுக்கு சாதகமாக்குவதற்காக செங்கோட்டையனை த.வெ.க. தலைவர் விஜய்யை சந்தித்துப்பேச திட்டமிட்டது பா.ஜ.க. ஏற்கெனவே த.வெ.க.வில் அரசியலில் அனுபவமுள்ள ஆளுமைகள் இல்லாதது பெரிய பற்றாக்குறையாக இருக்கிறது. இதன் காரணமாக மோசமான திட்டமிடல்களால் பல மோசமான விளைவுகளை குறுகிய காலத்திலேயே சந்தித்துள்ளது. எனவே செங்கோட்டையனை த.வெ.க.வில் ஐக்கியமாகச் செய்து, த.வெ.க.வை தங்கள் கட்டுப்பாட்டுக்குள் முழுமையாகக் கொண்டுவந்து, எடப்பாடியை கூட்டணியிலிருந்து கழட்டிவிட்டு தனிமைப்படுத்த திட்டம் வகுக்கப்பட்டுள்ளது.

அதன்படி புதன்கிழமையன்று காலையில், 11:30 மணியளவில் தலைமைச் செயலகத்துக்கு வருகைதந்த செங்கோட்டையன், சபாநாயகர் அப்பாவுவிடம் ராஜினாமா கடிதத்தை கொடுத்து பரபரப்பை ஏற்படுத்தினார். ஏற்கெனவே மனோஜ் பாண்டியன் தனது எம்.எல்.ஏ. பதவியை விட்டு விலகிய சூழலில், செங்கோட்டையனின் இந்த முடிவு அரசியல் களத்தை சூடாக்கியது. முன்னதாக செய்தியாளர்களிடம் பேசிய செங்கோட்டையன், "50 ஆண்டுகால உழைப்பிற்கு அ.தி.மு.க.வின் உறுப்பினர் பதவியிலிருந்து நீக்கி பரிசு கொடுத்துள்ளார்கள். எனக்கு மிகுந்த மன வேதனையாக இருக்கிறது" என்று கூறியவர், விஜய் கட்சியில் சேருவது குறித்து பதிலளிக்க மறுத்துவிட்டார். இந்நிலையில், மதியம் 1 மணியளவில், பட்டினப்பாக்கத்திலுள்ள த.வெ.க. தலைவர் விஜய்யின் வீட்டிற்கு செங்கோட்டையன் சென்றார். அங்கு விஜய்யுடன் நீண்ட நேரம் ஆலோசனை நடத்திவிட்டு கிளம்பினார். வியாழனன்று பனையூர் த.வெ.க. அலுவலகத்தில் விஜய்யை சந்தித்து இணைந்தார். அவருக்கு நிர்வாகக் குழு தலைமை ஒருங்கிணைப்பாளர் பதவியும், மேலும் ஈரோடு, கோவை, நீலகிரி, திருப்பூர் ஆகிய நான்கு மாவட்ட அமைப்புச் செயலாளராகவும் பதவி வழங்கப்பட்டிருக்கிறது.

செங்கோட்டையனை வரவேற்று விஜய் வெளியிட்டுள்ள வீடியோவில், "ஒரு 20 வயது இளைஞராக இருந்தபோதே புரட்சித்தலைவர் எம்ஜிஆரை நம்பி அவரது மன்றத்தில் சேர்ந்தவர். அந்த சின்ன வயதிலேயே எம்.எல்.ஏ என்ற பெரும் பொறுப்பை ஏற்றவர். பின்னர் அதிமுக இயக்கத்தில் இருபெரும் தலைவர்களுக்கு நம்பிக்கைக்குரியவராக அரசியல் களத்தில் இருந்தவர். இப்படி 50 வருடங்களாக ஒரே இயக்கத்தில் இருந்தவர் அண்ணன் செங் கோட்டையன். இன்று அவருடைய அரசியல் அனு பவமும், அரசியல் களப்பணியும், நம்முடைய தமிழக வெற்றிக் கழகத்திற்கு பெரிய உறுதுணையாக இருக்கும் என்ற நம்பிக்கையுடன் அவருக்கும், நம்மோடு இணைந்து பணியாற்ற நம்முடன் கைகோர்க்கும் அனைவரையும் மக்கள் பணியாற்ற வரவேற்கிறேன். நல்லது நடக்கும், நல்லதே நடக்கும், நல்லது மட்டுமே நடக்கும், வெற்றி நிச்சயம்." என்று பேசியிருக்கிறார்.

பனையூரில் செய்தியாளர் களைச் சந்தித் செங்கோட் டையன்... "அ.தி.மு.க. காலச்சூழலில் 3 கூறுகளாகப் பிரிந்துகிடக்கிறது. அவற்றை ஒருங்கிணைக்க வேண்டுமென்ற நோக்கத்தோடு, தான் கருத்துக்களை வெளியிட்டோம். கருத்துக்கள் பரிமாறப்பட்டதே தவிர செயல்படுத்தப்படவில்லை. ஒருங்கிணைக்க வேண்டுமென்று செயல்பட்டபோது முதலில் எனது பொறுப்புக்களை எடுத்தார்கள். எல்லோரோடும் பேச வேண்டுமென்று தான் நான் தேவர் ஜெயந்திக்கு சென்றேன். சென்று திரும்பிய இரண்டு நாட்களுக்குள்ளேயே உறுப்பினர் பதவியைக்கூட எடுத்துவிட்டார்கள். 50 ஆண்டுகால வரலாற்றில், இந்த இயக்கத்துக்காக ஏற்றத்தாழ்வு களை சந்தித்ததற்கு எனக்கு கிடைத்த பரிசு தான் உறுப்பினர் பதவிகூட எடுக்கப்பட்டிருக்கிறது. நான் என்று ஒருவன் நினைத்தால் ஆண்டவன்தான் என்று பார்த்துக்கொள்வான், தண்டிப்பான். இதுதான் இன்றைய சூழல்'' என்றார்.

இந்நிலையில், 2026 தேர்தலில், பா.ஜ.க. தரப்பில் நிர்மலா சீதாராமனை முதல்வர் வேட்பாளராக்கிவிட்டு, த.வெ.க.  தலைவர் விஜய்யை துணை முதல்வராக்க சம்மதிக்குமென்றும் தெரிகிறது. அதற்கான பேச்சுவார்த்தையும் மறைமுகமாக நடந்துவருகிறது. இதன்மூலம் பா.ஜ.க.வை கொள்கை எதிரி என்று மட்டும் அவ்வப்போது சொல்லிவந்த விஜய், தி.மு.க.வை எதிர்க்கும் நோக்கத்துக்காக கொள்கை எதிரியுடன் சமரசமாகச் செல்வதாக சொல்லிக்கொள்வாரென்று தெரிகிறது. பா.ஜ.க. உருட்டும் பகடையில் விஜய் சிக்கிக்கொண்டதாகவே தெரிகிறது!

_____________________
துரோகியா? எதிரியா? 

தமிழ்நாடு சட்டமன்றத் தேர்தல் நெருங்க நெருங்க அரசியல் விளையாட்டுகளும் சூடுபிடித்து கட்சித் தாவல்கள் தொடங்கிவிட்டன. 

இந்நிலையில் தான் தங்கள் கட்சிக்கு அரசியல் கற்றுக்கொடுக்க அனுபவமுள்ள ஆட்கள் தேவை எனக்கருதிய த.வெ.க. முதல் கோழியாக செங்கோட்டையனை அமுக்கியுள்ளது. செங்கோட்டையனுக்கு தனிச்செல்வாக்கு இருப்பதால், அவரது தேர்தல் வெற்றி, த.வெ.க.வின் வெற்றிக்கணக்காகத் தொடங்குமென்று எதிர்பார்க்கிறது. இன்னும் பலரை கட்சிக்குள் கொண்டுவரும் அசைன்மெண்ட்டை செங்கோட்டையனுக்கு அளித்துள்ளது த.வெ.க.

இந்நிலையில்தான் முதல்கட்டமாக, ஓ.பி.எஸ். அணியிலுள்ள மாஜிக்கள், மாவட்ட நிர்வாகிகளிடம் செங்கோட்டையன் பேசியுள்ளார். நமக்கு நல்ல பதவியும், மரியாதையும் கிடைக்கும் என்று சொல்லி அழைக்க, த.வெ.க.வில் பதவி கிடைக்கும், ஆனால் அந்த கட்சியிலுள்ள இளைஞர்களை அரசியல்படுத்த படாதபாடு படணுமே என்று பதறியிருக்கிறார்கள்.

இந்த நிலையில்தான் ஓ.பி.எஸ். தனது ஆதரவாளர்களுடன் செவ்வாயன்று சென்னையில்வைத்து கலந்துரையாடினார். "நம்மை அ.தி.மு.க.வில் இணைச்சுக்க அவங்க விரும்பல. இனி, எதிரிகளிடம் போய் துரோகியை வீழ்த்த வேண்டும். பாடம் புகட்ட வேண்டும். அதற்கு தி.மு.க. அல்லது த.வெ.க. கூட்டணிக்கு போகணும். உங்க கருத்துக்களை சொல்லுங்க'' எனக்கேட்க, தி.மு.க. கூட்டணிக்கு போகலாமென்று பலரும் சொல்ல, சிலரோ, த.வெ.க.வுக்கு சென்றால் கூடுதல் சீட்டும், நல்ல பதவிகளும் கிடைக்குமென்று கூறியுள்ளனர். அதையடுத்து, ஒரு வாரத்தில் நல்ல முடிவை அறிவிப்பதாகக் கூறியுள்ளார். இந்நிலையில் ஓ.பி.எஸ். அணியிலுள்ள சிலர் புதன்கிழமை இரவில் செங்கோட்டையனை ரகசியமாக சந்தித்துள்ளது பரபரப்பை கிளப்பியுள்ளது..

-இரா.பகத்சிங்