மக்களைக் கொன்ற ராணுவம்! -பற்றி எரியும் நாகலாந்து!

நாகலாந்தின் மோன் மாவட்டப் பகுதியில் தீவிரவாதிகள் நடமாட்டம் இருப்பதாகக் கிடைத்த தகவ-ன் பெயரில், ராணுவம் நடத்திய துப்பாக்கிச் சூட்டில் 14 பொதுமக்கள் பலியாகியுள்ளனர். இதையடுத்து உயர்நிலை விசாரணைக்கு முதல்வர் நெய்பிரியோ உத்தரவிட்டுள்ள நிலையில், மாநிலம் முழுவதும் பொதுமக்கள் கொந்தளித்து எழுந்து வாகனங்களுக்கு தீ வைப்பில் ஈடுபட... நாகலாந்தில் இணைய சேவை தடை செய்யப் பட்டுள்ளது.

சீனா, மியான்மர் எல்லையை ஒட்டியுள்ள வடகிழக்கு மாநிலங்களில் தீவிரவாதக் குழுக்களின் ஆபத்தும், அம்மாநிலங்களில் சில பிரிவினர் சுயாட்சி கோருவதுமான பிரச்சினை நீடித்துவருகிறது. முக்கியமாக சுதந்திர காலகட்டம் முதலே நாகலாந்து மக்கள் இந்தியாவுடன் இணைவதில் தயக்கம் காட்டிவந்தனர். எனினும் நேரு தலைமை யில் போடப்பட்ட ஒரு ஒப்பந்தம் மூலம் தற்காலிக இணைவு சாத்தியமாகியது.

தற்போதும் நாகலாந்தில் நாகா மக்கள் அடங்கிய நாகாலிம் தனி நாட்டுக்கான கோரிக்கை நீடித்துவருகிறது. இதனால் நாகலாந்தில் அசாம் ரைபிள்ஸ் படைப்பிரிவு அமைக்கப்பட்டு, ஆயுதப் படைச் சட்டமும் நடைமுறையில் நீடித்துவருகிறது.

ஆயுதப் படைச் சட்டம் என்பது மாநில நிர்வாகத்தைவிடவும், ராணுவத்துக்கு கூடுதல் அதிகாரம் அளிக்கும் சட்டமாகும். இச்சட்டப்படி சோதனை, கைது, துப்பாக்கிச் சூடு போன்ற நடவடிக்கைகளுக்கும் ராணுவத்துக்கு எந்த அனுமதியும் தேவையில்லை.

இந்த ஆயுதப் படைச் சட்டத்துக்கு நாகலாந்து மக்கள் எதிர்ப்புத் தெரிவிப்பதுடன், அந்தச் சட்டத்தை நீக்கவேண்டுமென பல காலமாகவே கோரி வருகின்றனர். மோடி பிரதமர் பொறுப்புக்கு வந்தவுடன் 2015-ல் நாகலாந்து தேசிய சோஷலிஸ்ட் கவுன்சிலுடன், தற்போது தமிழக ஆளுநராக இருக்கும் ரவி பேச்சுவார்த்தை நடத்தி அதன் பொதுச் செயலாளர் துயிங்கலங் மொய்வாவை ஒரு ஒப்பந்தத்தில் கையெழுத்திடச் செய்தார். எனினும், அந்த அமைதி நீண்ட நாட்களுக்கு நீடிக்க வில்லை.

நாகலாந்தின் போராளிக் குழுக்கள், இந்தியாவுக்கு சவாலாகவே நீடித்துவருகின்றன. இந்நிலையில்தான் கடந்த நவம்பர் 13-ஆம் தேதி மணிப்பூரில் தீவிரவாதிகள் நடத்திய தாக்குதலில் அசாம் ரைபிள்ஸ் படையின் கர்னல் விப்லப் திரிபாதி, அவரது மனைவி, மகன் மற்றும் நான்கு வீரர்கள் உயிரிழந்தனர்.

இதையடுத்து மணிப்பூர், நாகலாந்து, அஸ்ஸாம் போன்ற வடகிழக்கு பகுதிகளில் ராணுவ வீரர்கள் உஷார்படுத்தப்பட்டனர். விப்லப் மீதான தாக்குதலுக்கு பி.எல்.ஏ.எம். என்ற தீவிரவாத அமைப்பு காரணமென தெரியவந்தது. நாகலாந்தின் பாரம்பரியத் திருவிழாவான ஹார்ன்பில் திருவிழா தொடங்கியிருந்த நிலையில் தீவிரவாதிகள் அமைதியைக் குலைக்கும் நடவடிக்கையில் இறங்கக்கூடுமென எதிர்பார்த்து ராணுவம் உஷார் நிலையில் இருந்தது.

டிசம்பர் 4-ஆம் தேதி இரவு மோன் மாவட்டப் பகுதியில் என்.எஸ்.சி.என். தீவிரவாத அமைப்பைச் சேர்ந்தவர்கள் வாகனத்தில் செல்வதாக ராணுவத்துக்குத் தகவல் வர, அவர்கள் வாகன சோதனை, தாக்குதல் ஆயத்தம் போன்ற பணிகளில் ஈடுபட்டு வந்தனர். கிட்டத்தட்ட ரகசியத் தகவலுடன் பொருந்தும்படியான ஒரு வாகனம் வேகமாக வரவே அதுதான் தீவிரவாதிகளின் வாகனமென நினைத்த வீரர்கள் அதை நோக்கி சரமாரியாகச் சுட்டனர்.

பின் வாகனத்தைச் சோதனையிட்டபோது வாகனத்திலிருந்த 6 பேர் இறந்திருந்தனர். மேலும் இருவர் காயம்பட்டு ஆபத்தான நிலையில் காணப்பட்டனர். வண்டியில் வந்தவர்கள் அருகிலுள்ள நிலக்கரிச் சுரங்கத் தொழிலாளர்கள் என்பதும், அவர்கள் பணிமுடித்து வீடுதிரும்பிக் கொண்டிருந்தவர்கள் என்பதும் தெரியவந்தது.

இந்நிலையில் வேலைக்குச் சென்றவர்கள் வழக்கமான நேரத்தில் வீடு திரும்பாததைக் கண்டு சம்பந்தப்பட்ட கிராமத்தில் அவர்கள் குடும்பத்தின ரும், உறவினர்களும் தேடி வந்தபோதுதான், ராணுவம் தாக்குதல் நடத்திய சம்பவம் தெரியவந் தது. இதில் ஆத்திரமடைந்த பொதுமக்கள், ராணுவ வீரர்களையும், போலீஸாரையும் குறிவைத்து தாக்க ஆரம்பித்தனர். எண்ணற்ற வாகனங்கள் தீக்கிரை யாகியுள்ளன. இதில் ராணுவ வீரர் ஒருவர் உயிரிழந் தார். பதிலுக்கு ராணுவம் திருப்பித் தாக்கியதில் 7 பேர் உயிரிழந்தனர். சுட்டுக் கொல்லப்பட்டவர் களுக்கு போராளிகளின் உடைகளை அணிவித்து தீவிரவாதிகளாக காட்ட முயன்றதாகவும் புகார் கிளம்பியுள்ளது.

நாகலாந்தின் பிரபலமான ஹார்ன்பில் திருவிழா ரத்து செய்யப் பட்டுள்ளதோடு, பல்வேறு அமைப்பு கள் ஆயுதப்படை சட்டத்துக்கு எதி ராக போர்க்கொடி உயர்த்தியுள்ளன. மத்திய உள்துறை அமைச்சர் அமித்ஷா பாராளு மன்றத்தில், "நாகலாந்தில் உயிரிழந்துள்ள மக்களுக்கு ஆழ்ந்த இரங்கல். மாநில அரசு அமைத்துள்ள சிறப்பு புலனாய்வுக் குழு முழுமையான விசாரணை நடத்தி, பாதிக்கப்பட்டவர்களுக்கு நீதி வழங்கும்'' எனத் தெரி வித்துள்ளார்.

சம்பவத்தில் பலியான ஒவ்வொருவரின் குடும்பத்துக்கும் ரூ.5 லட்சம் நிவாரண நிதி அறி விக்கப்பட்டுள்ளது. பா.ஜ.க.வுடன் கூட்டணி அமைத்து ஆட்சியமைத்துள்ள நெய்பியுரியோ வுக்கு, இந்த தாக்குதல் இக்கட்டை ஏற்படுத்தியுள்ளது.