இந்தியா - ரஷ்யா இடையே புரிந்துணர்வு ஒப்பந்தங்கள்

இந்திய, ரஷ்ய வருடாந்திர உச்சி மாநாட்டில் பங்கேற்க ரஷ்ய அதிபர் விளாடிமிர் புதின் டெல்லி வந்தார். ரஷ்ய அதிபர் புதினுக்கு பிரதமர் மோடி சிறப்பு விருந்து அளித்தார். அப்போது ரஷ்ய மொழியில் எழுதப்பட்ட பகவத் கீதையை புதினுக்கு அவர் பரிசாக வழங்கினார்.

Advertisment

இதைத் தொடர்ந்து குடியரசுத் தலைவர் மாளிகையில் புதினுக்கு 21 குண்டுகள் முழங்க ராணுவ மரியாதையுடன் சிவப்பு கம்பள வரவேற்பு அளிக்கப்பட்டது.

Advertisment

குடியரசுத் தலைவர் திரவுபதி முர்மு, பிரதமர் மோடி அவரை வரவேற்றனர்.

இதன்பிறகு அதிபர் விளாடிமிர் புதின், காந்தி நினைவிடத்துக்கு சென்று அஞ்சலி செலுத்தினார்.

பின்னர் டெல்லியில் உள்ள ஹைதராபாத் இல்லத்தில் பிரதமர் நரேந்திர மோடியும் அதிபர் விளாடிமிர் புதினும் அதிகாரப்பூர்வமாக பேச்சுவார்த்தை நடத்தினர்.

Advertisment

இந்த பேச்சுவார்த்தையின்போது 16 முக்கிய ஒப்பந்தங்கள் கையெழுத்தாகின. குறிப்பாக, இந்தியா - ரஷ்யா பொருளாதார ஒத்துழைப்பு திட்டம் 2030 தொடர்பான ஒப்பந்தம் கையெழுத்தானது. இதன்படி இரு நாடுகளும் இணைந்து கூட்டு தயாரிப்புகளில் ஈடுபட உள்ளன.

யுரேசியன் பொருளாதார கூட்டமைப்புக்கும் இந்தியாவுக்கும் இடையே தடையற்ற வர்த்தக ஒப்பந்தத்தை மேற்கொள்வது தொடர்பாக பேச்சு வார்த்தை நடத்தப்பட்டு உள்ளது. வேளாண்மை, உரம், உணவு பாதுகாப்பு உள்ளிட்ட துறைகளில் இரு நாடுகளும் இணைந்து பணியாற்றும். இந்தியாவும் ரஷ்யாவும் இணைந்து யூரியாவை உற்பத்தி செய்யும்.

சென்னை- விளாடிவோஸ்டாக் கடல் வழித்தடம், ஐஎன்எஸ்டிசி வழித்தடம், வடக்கு கடல் வழித்தடம் ஆகிய திட்டங்கள் முன்னெடுத்துச் செல்லப்படும். துருவ பகுதிகளில்

கப்பல்களை இயக்க இந்திய மாலுமி களுக்கு ரஷ்யா சிறப்பு பயிற்சி அளிக்க உள்ளது. இதன்மூலம் ஆர்டிக் பகுதியில் இந்தியா, ரஷ்யா இடையிலானஉறவு வலுவடையும். இந்திய இளைஞர் களுக்கு புதிய வேலைவாய்ப்புகள் கிடைக்கும். கப்பல் கட்டுமானத்தில் இந்தியாவும்ரஷ்யாவும் இணைந்து பணியாற்றும்.

அணுசக்தி, எரிசக்தி, மரபுசாரா எரிசக்தி, அரியவகை தனிமங்கள், தொழில்நுட்பம் ஆகியவற்றில் இரு நாடுகள் இடையிலான ஒத்துழைப்பு மேலும் அதிகரிக்கும். ரஷ்ய சுற்றுலா பயணிகள் மற்றும் ரஷ்ய குழுவினர் 30 நாட்கள் விசா இல்லாமல் இந்தியாவுக்கு வருகை தரும் திட்டம் விரைவில் அறிமுகம் செய்யப்படும்.

இந்தியா, ரஷ்யா இடையிலான வர்த்தகம் 96 சதவீதம் உள்ளூர் கரன்சிகளில் நடைபெறுகிறது. இருதரப்பு வர்த்தகம் கடந்த ஓராண்டில் 12% அதிகரித்திருக்கிறது. இந்த வர்த்தகம் 100 பில்லியன் டாலரை எட்டும்.

இந்தியாவுக்கான கச்சா எண்ணெய், நிலக்கரி ஏற்றுமதி தொடர்ந்து அதிகரித்து வருகிறது. இந்தியாவுக்குதேவையான கச்சா எண்ணெய் தடையின்றி தொடர்ந்து விநியோகம் செய்யப்படும். இந்தியாவுடனான வர்த்தக உறவை மேம்படுத்த வடக்கு தெற்கு போக்குவரத்து வழித்தடம் உருவாக்கப்படும். இதன் மூலம் ரஷ்யா, பெலாரஸ் நாடுகளில் இருந்து இந்திய பெருங்கடல் வழியாக இந்தியாவுடன் வர்த்தகம் நடைபெறும். பாதுகாப்பு துறை தொடர்பாக பல்வேறு உடன்பாடுகள் எட்டப்பட்டு உள்ளன.

ரஷ்யாவிடம் இருந்து கூடுதலாக எஸ் 400 ஏவுகணைகளை வாங்கவும் ரஷ்யாவின் எஸ் 500 ஏவுகணைகளை இந்தியாவில் தயாரிக்கவும் உடன்பாடுஎட்டப்பட்டிருப்பதாக தகவல்கள் வெளியாகி உள்ளன. மேலும் ரஷ்யாவின் ஐந்தாம் தலைமுறை போர் விமானமான சுகோய் எஸ்யு ரகத்தை சேர்ந்த 54 போர் விமானங்களை இந்தியாவில் தயாரிப்பது
குறித்தும் உடன்பாடு எட்டப்பட்டிருப்பதாக கூறப்படுகிறது.

மேலும் கூடங்குளம் அணுமின் நிலைய கட்டுமானப் பணிகளை விரைவாக முடிக்கவும், உபகரணங்கள், எரிபொருளை வழங்கவும் ரஷ்யா உறுதியளித்துள்ளதாகவும், 2047-க்குள் இந்தியாவின் அணுசக்தி திறனை 100 ஜிகா வாட்டாக அதிகரிக்க முடிவு செய்திருப்பதாகவும் தெரிவிக்கப் பட்டுள்ளது.

சென்னை- விளாடிவோஸ்டாக் வழித்தடம்: இந்தியா, ரஷ்யா இடையே ராணுவ தளவாட ஆதரவு பரிமாற்ற ஒப்பந்தம்(ஆர்இஎல்ஓஎஸ்) கடந்த பிப்ரவரியில் கையெழுத்தானது. இந்த ஒப்பந்தத்துக்கு ரஷ்ய நாடாளுமன்றம் ஒப்புதல் அளித்துள்ளது.

இதன்படி ரஷ்ய ராணுவ தளங்கள் மற்றும் இந்திய ராணுவ தளங்களை இரு நாடுகளும் பரஸ்பரம் பயன்படுத்திக்கொள்ளலாம். குறிப்பாக ஆர்டிக் மற்றும் பசிபிக் பகுதிகளில் அமைந்துள்ள ரஷ்யாவின் 40 ராணுவ, கடற்படை, விமானப் படைத் தளங்களை இந்தியா பயன்படுத்த முடியும்.

ஆர்இஎல்ஓஎஸ் ஒப்பந்தத்தின் ஒரு பகுதியாக சென்னை- விளாடிவோஸ்டாக் கடல் வழித்தடம் செயல்படுத்தப் பட உள்ளது. தற்போது ரஷ்யாவின் செயின்ட் பீட்டர்ஸ்பர்க் நகரில் இருந்து மும்பைக்கு சரக்கு கப்பல்கள் இயக்கப்படுகின்றன. இந்த வழித்தடம் 16,000 கி.மீ. தொலைவு கொண்டது. இத்தடத்தில் ரஷ்யாவில் இருந்து இந்தியாவுக்கு சரக்கு கப்பல்கள் வந்து சேர 40 நாட்களாகிறது. இதற்கு பதிலாக சென்னை-விளாடிவோஸ்டாக் கடல் வழித்தடம் செயல்படுத்தப்பட உள்ளது. இந்த தடத்தில் 16 நாட்களில் ரஷ்யாவில் இருந்து சென்னைக்கு சரக்கு கப்பல்கள் வந்து சேரும். இதனால் எரிபொருளும், நேரமும் சேமிக்கப்படும்.