இஸ்ரோவின் புதிய தலைவரான ராக்கெட் தமிழர்

* இஸ்ரோவின் புதிய தலைவராக தமிழ்நாட்டை சேர்ந்த விஞ்ஞானி கே.சிவனை நியமித்து மத்திய அரசு அண்மையில் உத்தரவிட்டது. கடந்த 2015 ஜனவரி 12-ஆம் தேதி இஸ்ரோ தலைவராக பொறுப்பேற்ற ஏ.எஸ்.கிரண் குமாரின் பதவிக்காலம் முடிவடைவதை அடுத்து, கே.சிவன் இந்த பதவியை ஏற்றார்.

* தமிழகத்தை சேர்ந்த விஞ்ஞானி ஒருவர் இஸ்ரோ தலைவராக பொறுப்பேற்பது இதுவே முதல் முறை.

* விஞ்ஞானி டாக்டர் கே. சிவன் குமரி மாவட்டம் நாகர்கோவில் அருகே சரக்கல்விளையில் விவசாய குடும்பத்தில் பிறந்தவர்.

* தந்தை கைலாசவடிவு நாடார், தாயார் செல்லம். சரக்கல்விளை அரசு தொடக்கபள்ளியில் சிவன் ஆரம்ப கல்வி பயின்றார். வல்லன்குமாரவிளை அரசு உயர்நிலை பள்ளியில் 10-ஆம் வகுப்பு வரை படித்தார். பின்பு பியுசி படிப்பை நாகர்கோவில் தெ.தி.இந்து கல்லூரியில் முடித்தார். தொடர்ந்து பி.எஸ்சி கணிதம் பட்ட படிப்பும் அங்கு பயின்றார்.

* கடந்த 1980-இல் சென்னையில் உள்ள எம்.ஐ.டி.யில் [Madras Institute of Technology] ஏரோநாட்டிகல் இன்ஜினியரிங் முடித்துவிட்டு தன்னுடைய முதுகலை படிப்பை பெங்களூரில் உள்ள ஐஐஎஸ்சியில் (IISC) 1982-இல் முடித்தார்.

* இஸ்ரோவின் பி.எஸ்.எல்.வி. ராக்கெட்டின் திட்டமிடுதல் மற்றும் வடிவமைப்புக் குழுவில் கடந்த 1982-இல் இணைந்த சிவன், அந்த ராக்கெட் உருவாக்கத்தில் முக்கியப் பங்காற்றினார். தொடர்ந்து பல்வேறு திட்டங்களில் தன்னை இணைத்துக் கொண்டார். தன்னுடைய பணிக்காலத்தில்பல்வேறு விருதுகளையும் இவர் பெற்றுள்ளார்.

* 2014-இல் ஜி.எஸ்.எல்.வி. டி-5 ராக்கெட் வெற்றிகரமாக விண்ணில் ஏவப்பட்டபோது அதன் திட்ட இயக்குநராக பணியாற்றியிருந்தார்.

* மேலும் இவர் ராக்கெட்டை விண்ணில் ஏவும்போது அதன் பாதையை விண்ணில் தீர்மானிப்பது தொடர்பான மென்பொருளை உருவாக்கியவர் என்பது குறிப்பிடத்தக்கது.

* ஆய்வுகள் வாயிலாக ஜிஎஸ்எல்வி ராக்கெட்டுகள் தோல்விக்கான காரணங் களை கண்டறிந்து அதிலும் சிவன் வெற்றி கண்டார்.

* இஸ்ரோவின் மிகப்பெரிய விண்வெளி நிலையமாகக் கருதப்படும் திருவனந்தபுரம்விக்ரம் சாராபாய் விண்வெளி நிலையஇயக்குநராகப் பணியாற்றுவதற்கு முன்பாக, நெல்லை மாவட்டம்ம கேந்திரகிரியில் உள்ள திரவ இயக்கத் திட்ட மையத்தின் இயக்குநராக சிவன் பணியாற்றினார்.

* இஸ்ரோவில் தொடர்ந்து புராஜக்ட் இயக்குனர், RLV-TD துணை இயக்குனர், GSLV முதன்மை கன்ட்ரோலர், LPSC டைரக்டர் என பல்வேறு தலைமைபொறுப்பை திறம்பட ஏற்று செயல்பட்டார்.

டாக்டர் சிவன் பெற்ற முக்கிய விருதுகள்:

* சிறி அரி ஓம் அசிரம் பிரடிட் டாக்டர் விக்ரம் சாராபாய் ஆய்வு விருது (1999)

* இந்திய விண்வெளி ஆய்வு நிறுவனம் மெரிட் விருது (2007)

* டாக்டர் பிரன் ராய் விண்வெளி அறிவியல் விருது (2011)

* மதிப்புமிகு அலும்னஸ் விருது (2013)

* சத்தியபாமா பல்கலைக்கழக அறிவியல் முனைவர் விருது (2014)

* ஆனந்த விகடன் ""டாப் 10'' மனிதர் விருது (2016)

* MIT அலுமினி விருது (2013)

இஸ்ரோவின் சமீப வெற்றி

* இந்திய விண்வெளி ஆராய்ச்சி நிறுவனமான இஸ்ரோவின் விஞ்ஞானிகள் 12 ஜனவரி 2018 அன்று 31 செயற்கைக்கோள்களை வெற்றிகரமாக விண்ணில் செலுத்தி சாதனை படைத்தனர்.

* பி.எஸ்.எல்.வி. சி-40 ராக்கெட் (PSLV C40/Cartosat-2 Series) மூலமாக இந்த செயற்கைக்கோள்கள் சென்னையைஅடுத்த ஸ்ரீஹரிகோட்டாவில் உள்ள சதீஷ் தவண் விண்வெளி மையத்தின் முதலாவது ராக்கெட் செலுத்தும் தளத்தில் இருந்து விண்ணில் செலுத்தப்பட்டன.

* இந்த ராக்கெட்டில் கார்ட்டோசாட்-2 வகை பூமியை மேற்பார்வையிடும் நிலப்படவரைவுக்கலைக்கு உதவும் செயற்கைக்கோள் பிரதானமாக இடம்பெற்று இருந்தது.

* இந்த செயற்கைக்கோள் 710 கிலோ எடை கொண்டதாகும். இதைத் தவிர இந்த செயற்கைக்கோளுடன் 30 செயற்கைக்கோள்களும் விண்ணில் செலுத்தப்பட்டன. இவற்றின் மொத்த எடை 613 கிலோவாகும்.

* இந்த துணை செயற்கைக்கோள்களில் இரண்டு செயற்கைக்கோள்கள் இந்தியாவின் செயற்கைக்கோள்கள் ஆகும். அதில் ஒன்று நுண் செயற்கைக் கோள் (மைக்ரோ) இன்னொன்று மிகநுண்ணிய செயற்கைக்கோளாகும் (நானோ). மீதமுள்ள 28 செயற்கைக் கோள்கள் வெளிநாட்டு செயற்கைக் கோள்களாகும்.

* கனடா, பின்லாந்து, பிரான்ஸ், கொரிய குடியரசு (தென் கொரியா), இங்கிலாந்துமற்றும் அமெரிக்கா ஆகிய 6 நாடுகளின் செயற்கைக்கோள்கள் ஆகும். 31 செயற்கைக்கோள்களுடன் மொத்தம்1323 கிலோ எடையை சுமந்து பி.எஸ்.எல்.வி.-சி40 ராக்கெட் விண்ணில் செலுத்தப்பட்டது.

* 31 செயற்கைக்கோள்களில் 30 செயற்கைக் கோள்கள் முதலிலில் 505 கிமீ தொலைவில்துருவ சூரிய இணக்கப்பாதையில் செலுத்தப்பட்டன.

* இஸ்ரோவால் தயாரிக்கப்பட்ட நுண் செயற்கைக்கோள் 359 கி.மீ. துருவ சூரிய இணக்கப்பாதையில் செலுத்தப்பட்டது.

இதற்கென ராக்கெட்டின் 4 கட்டம் இரண்டு முறை நிறுத்தப்பட்டு இயக்கி அதன் சுற்றுவட்டப்பாதையின் உயரம் குறைக்கப்பட்டது.

* இஸ்ரோவுக்கு பெருமை சேர்க்கும் பி.எஸ்.எல்.வி. ராக்கெட்டின் சி-40வது ராக்கெட் 44.4 மீட்டர் உயரம் கொண்டதாகும்.

* திட மற்றும் திரவ எரிபொருளைக் கொண்டு நான்கு கட்டமாக இயக்கப்படும் இந்த ராக்கெட்டின் மொத்த எடை 320 டன் ஆகும்.

* முதலில் காலை 9.28 மணிக்கு ராக்கெட்டைசெலுத்த திட்டமிடப்பட்டு இருந்தது. ஆனால் விண்வெளியில் ராக்கெட்டின்சுற்றுப்பாதையில் பழைய செயற்கைக்கோள் இடிபாடுகள் கடந்து சென்றதால் ஒரு நிமிடம் தாமதமாக காலை 9.29 மணிக்கு செலுத்தவிஞ்ஞானிகள் திட்டமிட்டனர்.

இதையடுத்து இந்த செயற்கைக்கோள்கள் செலுத்துவதற்கான கவுண்ட்டவுண் பின்னர் தொடங்கியது.

* ராக்கெட்டின் நான்கு நிலைகளிலும் திட மற்றும் திரவ எரிபொருள்கள் திட்டமிட்டபடி நிரப்பப்பட்டன.

மற்ற ஏற்பாடுகளும் நடவடிக்கைகளும் ஏற்கனவே நிர்ணயிக்கப்பட்டபடி செய்து முடிக்கப்பட்டன.

* காலை 9.29 மணிக்கு பி.எஸ்.எல்.வி. சி-40 ராக்கெட் வெள்ளைப் புகையைகக்கியபடி பலத்த இரைச்சலுடன் விண்ணில் சீறிப்பாய்ந்தது.

செயற்கைக்கோளின் செயல்பாடுகள் கட்டுப்பாட்டு அறையில் இருந்தவாறு விஞ்ஞானிகளால் கண்காணிக்கப்பட்டன.

* கடந்த ஆகஸ்ட் மாதம் அனுப்பப்பட்ட செயற்கைக்கோளை சுற்றியிருந்த வெப்பக் கவசத் தகடு விலகாத காரணத்தால் செயற்கைக்கோள் பயணம் தோல்வியடைந்தது.

* இந்த முறை முதல் நிலை முடிவடைந்து.

இரண்டாம் கட்ட என்ஜின் செயல்படத்தொடங்கியதும் செயற்கைக்கோளின் வெப்பக் கவசத் தகடு பிரிந்தது. இதை கட்டுப்பாட்டு விஞ்ஞானி உறுதி செய்ததும் அங்கு குழுமியிருந்த விஞ்ஞானிகள் கைத்தட்டி ஆரவாரம் செய்தனர்.

* நான்கு கட்டமும் வெற்றிகரமாக செயல்பட்டு குறிப்பிட்டபடி புவி சுற்று வட்டப்பாதையில் ராக்கெட் பறந்தது.

* சரியாக 17 நிமிடம் 20 விநாடிகளில் முதல் செயற்கைக்கோளான கார்ட்டோசாட் 2 ஐ சரியான உந்துவிசையுடன் 504 கி.மீ. உயரத்தில் சுற்று வட்டப்பாதையில் எறிந்தது. இதன் பின் ஒவ்வொரு செயற்கைக்கோளாக பிரிந்தன.

* கடைசியாக இஸ்ரோவின் ஒரு நுண் செயற்கைக்கோள் மட்டும் ராக்கெட் செலுத்தப்பட்டபின் ஒரு மணி நேரம் 45 நிமிடத்தில் பிரிந்தது.

* செயற்கைக்கோள்களை வெற்றிகரமாக செலுத்தியபின் விஞ்ஞானிகள் ஒருவருக்கு ஒருவர் வாழ்த்து தெரிவித்தனர்.