முத்தான வாழ்வுக்குப் பத்தாமிடம்!

ஒருவர் என்ன தொழில் செய்தால் மேன்மையடைவார் என்பதை உணர்த்தும் இடமே பத்தாமிடம். மேலும் 10-ஆம் இடத்திலுள்ள கிரகம், 10-ஆம் இடத்தைப் பார்க்கும் கிரகம், தசாபுக்திப் பலனறிந்து நாம் தொழிலைத் தேர்ந்தெடுக்கவேண்டும். பணம் சம்பாதிக்கும் முறையையும் எந்தத் துறைமூலம் வருமானம் வரும் என்பதையும் நிர்ணயிக்கும் இடமாக 10-ஆம் இடம் உள்ளது. எனவே உங்கள் ஜாதகப்படி முத்தான இடமான 10-ஆம் இடத்தை முறையாக அறிந்து செயல்படுவது நல்லது.

படிப்பில்கூட 10-ஆம் வகுப்பு படிக்கும் பொழுதுதான் அதற்கடுத்து என்ன படிக்கப்போகிறோமென்று முடிவெடுத்து மேற்படிப்பைத் தொடர நினைக்கிறோம். விஷ்ணுவின் அவதாரத்தில்கூட பத்து அவதாரங்கள் உள்ளன. எனவே 10 என்பதை முடிவெடுக்கும் எண்ணாகக் கருதுகிறோம்.

10-ஆம் இடம் ஒருவருக்கு மேஷ ராசியாக அமைந்து, அதில் சூரியன் இருந்தால் பொருள் உற்பத்தித்துறையில் ஈடுபட்டு வருமானம் ஈட்டுவார். மின்சாதன உற்பத்தி, ஏஜென்சீஸ், உணவு சம்பந்தப்பட்ட தொழில்கள் லாப மேன்மை தரும்.

10-ஆம் இடம் ரிஷபமாக அமைந்து அதில் ராஜகிரகமான சூரியன் இருந்தால் கடுமையாக உழைத்து முன்னேறுவார். பெரும்பாலும் ஆடை, ஆபரண அணிகலன்களையும், வாசனை திரவியங்களையும் விற்பனைசெய்து வருமானத்தைப் பெருக்கிக்கொள்வார்.

10-ஆம் இடம் மிதுனமாகி அதில் சூரியன் இருந்தால் அவர்களுக்கு உழைத்துப்பிழைக்க மனம் வராது. விரைவில் களைத்துப் போய்விடுவார்கள். மனவேகம் இருக்கும் அளவுக்கு உடல்வேகம் இராது. அவர்கள் ஆலோசனை கூறும் அமைப்பை உருவாக்கினால் பலன் உண்டு.

10-ஆம் இடம் கடகமாக அமைந்து அதில் சூரியன் இருந்தால் அந்த நபர்கள் பொதுவாழ்வில் ஈடுபட்டுப் புகழ்குவிப்பார்கள். மேற்பார்வையாளராக இருந்து மற்றவர்கள் வேலைசெய்வதைப் பார்த்துக்கொண்டிருப்பார்கள்.

10-ஆம் இடம் சிம்ம ராசியாய் அமைந்து அதில் சூரியன் இருந்தால் ஒரு நிறுவனத்தின் தலைமைப் பதவி வகிப்பார். தனக்குக்கீழ் ஏராளமான பேர் பணியாற்றும் யோகமுள்ளவர்.

10-ஆம் இடம் கன்னி ராசியாய் அமைந்து அதில் சூரியன் இருந்தால் எழுத்துத்துறை, கணிதத்துறை, கலைத்துறையில் நிபுணர்களாக விளங்குவார்கள்.

10-ஆம் இடம் துலா ராசியாகி அதில் சூரியன் இருந்தால், மற்றவர்களுக்கு விருப்பமில்லாத தொழிலிலில் இவர்களுக்கு விருப்பம் இருக்கும். தன வணிகத்துறையில், ஆடை, ஆபரணத்துறையில் நிகரில்லா லாபம் ஈட்டுவார்கள்.

10-ஆம் இடம் விருச்சிக ராசியாகி அதில் சூரியன் இருந்தால் தொழிலதிபராகும் வாய்ப்பு கிட்டும். அரசியல்வாதிகளின் ஒத்துழைப்புடன் அதிநவீன தொழில்கள் பல செய்து தனம் ஈட்டுவார்.

10-ஆம் இடம் தனுசு ராசியாய் அமைந்து அதில் சூரியன் இருந்தால் கூட்டுறவுத்துறையில் பங்குபெறலாம். கலைத்துறையிலும் வெற்றிவாய்ப்பு கிட்டும். பெட்ரோல், டீசல், எரிவாயு போன்றவை விற்பனை செய்வதன் மூலம் லாபம் காணலாம்.

10-ஆம் இடம் மகர ராசியாய் அமைந்து அதில் சூரியன் இருந்தால் கமிஷன் ஏஜென்சி, ஏற்றுமதி- இறக்குமதி போன்றவைமூலம் எண்ணற்ற லாபம் வந்துசேரும்.

10-ஆம் இடம் கும்ப ராசியாய் அமைந்து அதில் சூரியன் இருந்தால் மின்சாரப் பொருள் விற்பனை, மருத்துவத்துறை, கெமிக்கல் விற்பனை நிலையங்கள் ஏற்படுத்தி பொருளாதாரத்தை உயர்த்திக்கொள்ள முடியும்.

10-ஆம் இடம் மீன ராசியாய் அமைந்து அதில் சூரியன் இருந்தால் அழகு சாதனப்பொருட்கள் விற்பனை நிலையம் வைத்துப் பயன்பெறலாம்.

உடற்பயிற்சி செய்வதற்கான நவீன உபகரணங்கள் மற்றும் ஆரோக்கியத்தை சீராக்கும் கருவிகள் விற்பனை நிலையங்கள் அமைப்பதன்மூலம் லாபம் அடையலாம்.

பரிகாரம் -1

"ஓம் ஹ்ரீம் ஆதித்யாயச

சோமாய மங்களாய புதயாச

குரு சுக்ர சனிப்யச்ச

ராஹவே கேதவே நமஹ'

என்று தினமும் 16 முறை ஜெபித்து தொழில் மேன்மை பெறலாம்.

பரிகாரம் -2

"ஞாயிறு, திங்கள், செவ்வாய், புதன், வியாழன், வெள்ளி, சனி, ராகு- கேது நவகிரக சகாய நமஹ" என்று தினமும் 16 முறை சொல்லி வந்தால் தொழில் வளம் பெறலாம்.

செல்: 94871 68174