12 லக்னப் பலன்கள்! 56 -முனைவர் முருகு பாலமுருகன்

மீன லக்னம் 8-ஆம் பாவம்வரை சென்ற இதழ்களில் பார்த்தோம். இனி மற்ற பாவங்களைக் காணலாம்.

9-ஆம் பாவம்

ஜென்ம லக்னத்திற்கு 9-ஆம் வீட்டைக்கொண்டு பாக்கியம், செல்வம், செல்வாக்கு, தந்தையால் ஏற்படக்கூடிய அனுகூலம், தந்தையின் ஆயுள், ஆரோக்கியம் பற்றி அறியலாம்.

மீன லக்னத்திற்கு 9-ஆம் அதிபதி செவ்வாய் ஆட்சி, உச்சம் பெற்றாலும், குரு, சூரியன், சந்திரன் போன்ற நட்பு கிரகங்களின் சேர்க்கை பெற்றுப் கேந்திர- திரிகோண ஸ்தானங்களில் அமைந்தாலும், தந்தைகாரகன் சூரியனும் பலமாக அமைந்தாலும் தந்தைக்கு நீண்ட ஆயுள், தந்தைவழியில் செல்வம், செல்வாக்கு போன்ற அனுகூலங்கள் உண்டாகும்.

புதனுடன் செவ்வாய் பரிவர்த்தனை பெற்று பலமாக இருந்தால், தந்தைமூலமாக அசையா சொத்துகள் சேரும். செவ்வாய், சந்திரன் இணைந்து பலமாக அமைந்தால், பூர்வீகவழியில் அசையா சொத்துச் சேர்க்கை உண்டாகும். செவ்வாய், சூரியனுக்கு குரு பார்வை இருப்பது நல்லது. அதுவே சனி, ராகு போன்ற பாவிகள் சேர்க்கை பெற்றாலும், 9-ல் சனி, ராகு அமைந் தாலும், சூரியன் வீடான சிம்மத்தில் சனி, ராகு அமைந்தாலும், சூரியன், செவ்வாய் நீசம்பெற்றோ, பகை பெற்றோ இருந்தாலும், சர்ப்ப கிரக சாரம் பெற்று பாவிகளுக்கிடையே இருந்தாலும் தந்தைக்கு தோஷம், ஆயுள், ஆரோக்கியரீதியான பாதிப் புகள், தந்தையிடம் கருத்து வேறு பாடுகள் உண்டாகும். சூரியன், செவ்வாய் பலம்பெறுவது மட்டுமன்றி, சந்திரனுக்கு 9-ஆம் அதிபதியும் பலம்பெற்றால் தந்தைவழியில் அனுகூலங்கள் உண்டாகும்.

லக்னாதிபதி குருவே 10-ஆம் அதிபதி என்பதால், செவ்வாய், குரு சேர்க்கை பெற்றிருந்தால் தர்மகர்மாதிபதி யோகம் உண்டாவது மட்டுமன்றி, செல்வம், செல்வாக்கு, புகழ், பெருமை யாவும் அமையும். சனி வீடான மகரம், கும்பத்தில் செவ்வாய் அமைவது தந்தைக்கு தோஷமென் றாலும், சனி சேர்க்கை பெற்றோ, சனியுடன் பரிவர்த்தனை பெற்றோ அமைந்தாலும், 9-ல் ராகு அமைந் தாலும் வெளியூர், வெளிநாடுகளுக்குச் செல்லக்கூடிய யோகம் உண்டாகும்.

9-ஆம் அதிபதி செவ்வாய் மற்றும் சந்திரன், குரு சேர்க்கை பெற்று திரிகோண ஸ்தானங்களில் அமைந் தால், பல்வேறு பொதுக்காரியங்களில் ஈடுபடுதல், பலருக்கு உதவிகள் செய்தல், தானதர்மங்கள் செய்யும் மனோபாவம் உண்டாகும்.

10-ஆம் பாவம்

ஜென்ம லக்னத்திற்கு 10-ஆம் பாவத்தைக்கொண்டு தொழில், உத்தியோகத்தை அறியலாம்.

மீன லக்னத்திற்கு லக்னாதிபதி குருவே 10-ஆம் அதிபதியாகவும் இருப்பது சிறப் பாகும். 10-ஆம் அதிபதி குரு ஆட்சி, உச்சம் பெற்று பலமாக அமைந்துவிட்டால், செல்வம், செல்வாக்கு, சமுதாயத்தில் கௌரவப் பதவியை அடையும் யோகம் உண்டாகும். மற்றவர்களுக்கு ஆலோசனைகூறும் திறன், வழிநடத்தும் ஆற்றல் இருக்கும். பேச்சால்- வாக்கால் சம்பாதிக்கும் யோகம், ஆசிரியர் பணி, கல்வி நிறுவனங்களில் பணிபுரிதல், வங்கிப் பணி போன்றவை சிறப்பாக அமையும்.

10-ல் குரு, புதன் சேர்க்கை பெற்றாலும் மேற்கூறிய பலன்களே உண்டாகும்.

10-ஆம் அதிபதி குரு தனக்கு நட்பு கிரகங் களான சூரியன், செவ்வாய் சேர்க்கை பெற் றாலும், 10-ல் சூரியன், செவ்வாய் திக்பலம் பெற்று அமைந்திருந்தாலும் அதிகாரம்மிக்க பதவிகளை அடைதல், அரசு- அரசு சார்ந்த துறைகளில் பணிபுரியக்கூடிய வாய்ப் புண்டாகும். சூரியன், செவ்வாய் சேர்க்கை பெற்று கேந்திர- திரிகோண ஸ்தானங்களில் அமைந்தால் கௌரவப் பதவிகள் தேடிவரும்.

குரு- சனி, செவ்வாய் சேர்க்கை பெற்றிருந் தாலும், சனி, சந்திரன் சேர்க்கை பெற்றிருந் தாலும் பிறந்த ஊரைவிட, வெளியூர், வெளி நாடுகள்மூலம் அனுகூலங்கள், பயணங்கள் மூலம் சம்பாதிக்கக்கூடிய யோகம் உண்டாகும்.

குரு- சந்திரன், கேது சேர்க்கை பெற்று 10-ல் இருந்தாலும், திரிகோண ஸ்தானங்களில் இருந்தாலும் சமூகநலப் பணிகளில் ஈடுபாடு, மற்றவர்களுக்கு உதவிசெய்தல், ஆன்மிகம், தெய்வீகக் காரியங்களில் ஈடுபடும் வாய்ப் புண்டாகும்.

மக்கள் தொடர்புக்குக் காரகனான சனி 10-ல் அமைந்து, குருவும் சூரியனும் பலம்பெற் றால், மக்களால் தேர்ந்தெடுக்கப்படக்கூடிய உயர்ந்த பதவிகளை அடையமுடியும். இதுமட்டுமன்றி, சொந்தத் தொழில் செய்யக்கூடிய வாய்ப்பு, இரும்பு, விவசாயம்,

எண்ணெய் தொடர்புடைய தொழில், வேலை யாட்களை வைத்து வேலைவாங்கக்கூடிய வாய்ப்புண்டாகும்.

சூரியன் 10-ல் அமைந்தால் அரசு சார்ந்த துறைகளிலும், செவ்வாய் 10-ல் அமைந்தால் நிர்வாகத் தொடர்புடைய துறைகளிலும் மற்றும் பூமி, மனை, ரியல் எஸ்டேட் போன்றவற்றிலும் சம்பாதிக்கும் வாய்ப்புண்டாகும்.

சுக்கிரன் 10-ல் அமைந்தால்- குருவுக்கு சுக்கிரன் பகை கிரகம் என்றாலும், ஆடை, ஆபரணம், கலை, இசைத்துறைகளிலும், பெண்கள் உபயோகிக்கக்கூடிய பொருட்கள், டிராவல்ஸ் போன்றவற்றின்மூலமாகவும் சம்பாதிக்கும் வாய்ப்பு அமையும். ராகு 10-ல் இருந்தால், மருந்து, ரசாயனம் தொடர்புடையவற்றிலும், 10-ல் சந்திரனுடன் ராகு அல்லது கேது சேர்க்கை பெற்றிருந்தால் மருத்துவத்துறையிலும் முன்னேற்றம் கொடுக்கும். 10-ல் புதன் அமைந்தால், கணக்கு, கம்ப்யூட்டர் தொடர்புடைய துறைகளில் சம்பாதிக்கும் யோகம் உண்டாகும்.

10-ல் புதன் அமைந்தால்- புதன் 7-ஆம் அதிபதி என்பதால், நெருங்கியவர்களுடன் கூட்டுசேர்ந்து தொழில் செய்வது அல்லது உத்தியோகம் செய்வது நல்லது. மீனம் உபய லக்னம் என்பதால், கூட்டுத்தொழில் செய்யக் கூடாது. அப்படியே செய்யவேண்டியிருந் தாலும் மனைவி மற்றும் மிக நெருங்கியவர்க ளுடன் கூட்டுசேர்ந்து தொழில் செய்யலாம்.

குரு- பகை, நீசம் பெற்று பாவகிரகச் சேர்க்கையுடன் பலமிழந்திருந்தாலும், அஸ்தங்கம் பெற்றிருந்தாலும், வக்ரம் பெற்றிருந்தாலும், 6, 8, 12-ல் மறைந்திருந்தாலும் நிலையான வருமானமில்லாமல் கஷ்ட ஜீவனம்செய்ய வேண்டியிருக்கும். 10-ஆம் வீட்டையோ, 10-ஆம் அதிபதி குருவையோ சனி பார்வை செய்தால், தகுதிக்குக் குறைவான வேலை கிடைத்து, வாழ்க்கையில் சிரமங்களை எதிர்கொள்ளநேரிடும்.

மற்ற பாவங்கள் அடுத்த இதழில்...

செல்: 72001 63001