“எனக்கு ரெண்டு மூணு நாளாவே மன உளைச்சலா இருக்கு...” - வீடியோ வெளியிட்ட யூடியூபர்

96 படம் மூலம் பிரபலமான கௌரி ஜி கிஷன், புதிதாக நடித்துள்ள படம் ‘அதர்ஸ்’. இப்படத்தின் சிறப்பு திரையிடல் நேற்று முன்தினம் திரையிடப்பட்ட நிலையில் பின்பு நடந்த பத்திரிகையாளர் சந்திப்பில் ஒரு யூடியூருக்கும் அவருக்கும் வாக்குவாதம் ஏற்பட்டது. முன்னதாக அந்த யூடியூபர், படத்தின் செய்தியாளர் சந்திப்பின்போது கௌரி கிருஷ்னின் எடை குறித்து அநாகரிகமான முறையில் பட நாயகினிடம் கேள்வி கேட்டிருந்தார். அதாவது ஹீரோயினை தூக்கினீங்களே அவங்க எவ்ளோ வெயிட் இருந்தாங்க எனக் கேட்டார்.  

இந்தக் கேள்வியால் பாதித்துள்ள கௌரி கிஷன் நேற்றைய செய்தியாளர் சந்திப்பில் அந்த யூடியூபரை பார்த்து, “நீங்க அன்னைக்கு கேட்டது ரொம்ப அவமரியாதையான கேள்வி, அது ஜர்னலிசமே கிடையாது, ஏன் அப்படி கேள்வி கேட்டீங்க, என் எடைக்கும் படத்துக்கும் என்ன சம்பந்தம், இதே ஒரு ஆம்பளைய பார்த்து இந்த கேள்விய கேப்பீங்களா, நீங்க கேட்டது உருவக்கேலி...” என அடுக்கடுக்காக கேள்விகளை அடுக்கினார். பதிலுக்கு அந்த நிருபரும் உங்ககிட்ட வேற என்ன கேட்க முடியும், குஷ்பு, சரிதா என அனைவரும் இந்த கேள்வியை எதிர்கொண்டவங்கதான் என கடினமான குரலில் எதிர் விவாதத்தில் ஈடுபட்டார். 

இந்த நிலையில் அநாகரீகமாக கேள்வி கேட்ட அந்த யூடியூபரை கௌரி கிஷன் அதிரடியாக கேள்வி கேட்டது பலரது பாராட்டை பெற்றுள்ளது. கௌரி கிஷனுக்கு ஆதரவாக பா.ரஞ்சித், குஷ்பு, கவின், அஞ்சு குரியன் திரைப்பிரபலங்கள் எனப் பலரும் எக்ஸ் பக்கம் வாயிலாக பதிவிட்டனர். இதனைத் தொடர்ந்து தென்னிந்திய நடிகர் சங்கம், மலையாள நடிகர் சங்கம், சென்னை பத்திரிகையாளர் மன்றம் உள்ளிட்டவை அந்த யூடியூபரின் செயலை கண்டித்து கௌரி கிஷனுக்கு ஆதரவு தெரிவித்து அறிக்கை வெளியிட்டனர். அவர்கள் அனைவருக்கும் தற்போது கௌரி கிஷன் நன்றி தெரிவித்துள்ளார். இந்த விவகாரம் தற்போது பேசு பொருளாக மாற அடுத்து அந்த யூடியூபர் செய்தியாளர்களை சந்தித்து கௌரி கிஷன் இதை ஒரு விளம்பரத்திற்காக பண்ணுவதாகவும் அவரால் தான் உட்பட தன் குடும்பம் விமர்சனத்துக்கு உள்ளாக்கப்படுவதாகவும் இதனால் அவர் முதலில் மன்னிப்பு கேட்டால் பின்பு தான் மன்னிப்பு கேட்பதாகவும் தெரிவித்திருந்தார். 

இதனைத் தொடர்ந்து அவர் இந்த விவகாரம் தொடர்பாக வருத்தம் தெரிவிப்பதாக வீடியோ வெளியிட்டுள்ளார். அவர் வெளியிட்ட வீடியோவில், “எனக்கு ரெண்டு மூணு நாளாவே மன உளைச்சலா இருக்குது. காரணம் அந்த கௌரி கிஷன் சம்பவம். நான் ஒரு விதத்தில் கேள்வி கேட்டேன். அவங்க ஒரு விதத்தில் அதை புரிஞ்சுகிட்டு ஸ்டுப்பிட், சென்ஸ் இல்லாத கேள்வின்னு சொன்னாங்க. அதனால அடுத்த பிரஸ்மீட்ல அவங்கள திருப்பியும் கேள்வி கேட்க வேண்டியதாயிடுச்சு. அந்தப் பொண்ண நான் உருவக் கேலி பண்ணல. அவங்கள ஹீரோ தூக்கினதுனால அந்த கேள்வியை கேட்டேன். அது தவறா புரிஞ்சுகிட்டாங்க. அது ஒரு ஜாலியான கேள்வியா கேட்கப்பட்டது. அவங்க ஒருவரை தாக்கணும்ன்ற எண்ணம் இல்லன்னு இன்னைக்கு சொல்லி இருக்காங்க. எனக்கு அவங்க மனசு நோக அடிக்கணும்ன்ற எண்ணம் இல்ல. ஒருவேளை அவங்க மனசு புண்பட்டுருந்தா நான் அதுக்கு வருத்தம் தெரிவிச்சுக்கிறேன். எல்லாருமே அவங்களுக்கு ஆதரவாக இருந்ததால நாமளும் இறங்கி வரணும். அப்படி இறங்கி வந்து இதை சொல்றேன். மத்தபடி எந்த உள்நோக்கமும் இல்லை” என்றார்.