ஒரு வழியாக குழப்பத்திற்கு கிடைத்த விடை

விக்ரம் கடைசியாக ‘வீர தீர சூரன் பாகம் 2’ படத்தில் நடித்திருந்தார். கடந்த மார்ச் மாதம் வெளியான இப்படம் பெரியளவு வரவேற்பு பெறவில்லை. இப்படத்தை அடுத்து மண்டேலா, பட இயக்குநர் மடோன் அஷ்வின் இயக்கத்தில் நடிக்க கமிட்டானார். ஷாந்தி டாக்கிஸ் பேனரில் தயாரிப்பாளர் அருண் விஷ்வா இப்படத்தை தயாரிக்க விக்ரமின் 63வது படமாக உருவாகுமென தெரிவிக்கப்பட்டது. ஆனால் அதன் பிறகு எந்த அப்டேட்டும் வரவில்லை. படப்பிடிப்பும் தொடங்கவில்லை. இதனால் இந்தப் படம் டிராப் என சொல்லப்பட்டது. ஆனால் தயாரிப்பாளர் அருண் விஷ்வா, படத்தின் முன் தயாரிப்பு பணிகள் நடைபெற்று வருவதாகவும் கதைக்கு கொஞ்சம் நேரம் தேவைப்படுவதால் சரியான நேரத்தில் அப்டேட் வரும் எனவும் ஒரு நிகழ்ச்சியில் கூறியிருந்தார். 

இப்படத்தை அடுத்து 96 பட இயக்குநர் பிரேம் குமார் இயக்கத்தில் விக்ரம் நடிக்கவுள்ளதாக சமீபத்தில் அறிவிப்பு வெளியானது. இப்படத்தை வேல்ஸ் நிறுவனம் தயாரிப்பதாக அறிவிக்கப்பட்டது. ஆனால் இப்படமும் சில காரணங்களால் தொடங்கப்படவில்லை. பின்பு விக்ரம் இப்படத்தில் இருந்து வெளியேறிவிட்டார். இதனால் விக்ரம் அடுத்ததாக யார் படத்தில் நடிப்பார் என்ற குழப்பம் ரசிகர்கள் மத்தியில் உலா வந்தது. இதனிடையே ஒரு அறிமுக இயக்குநர் இயக்கத்தில் விக்ரம் நடிக்கவுள்ளதாகவும் அதே சமயம் பாடலாசிரியர் மற்றும் இயக்குநர் விஷ்ணு எடவன் இயக்கத்தில் ஒரு படம் நடிக்கவுள்ளதாகவும் தகவல் வெளியாகியிருந்தது. இருந்தும் அதிகாரப்பூர்வ அறிவிப்பு வெளியாகவில்லை.  

இந்த நிலையில் விக்ரம் நடிக்கும் அடுத்தப் படத்தின் அறிவிப்பு வெளியாகியுள்ளது. தகவலில் வெளியானது போல் ஒரு அறிமுக இயக்குநர் இயக்கத்தில் நடிக்கவுள்ளார். அவர் போடி ராஜ்குமார் எனவும் விரைவில் படப்பிடிப்பு தொடங்கவுள்ளதாகவும் தெரிவிக்கப்பட்டுள்ளது. இப்படத்தை சாந்தி டாக்கீஸ் நிறுவனம் தயாரிக்கிறது. இப்படம் தான் விக்ரமின் அடுத்த படமாக அதாவது அவரது 63வது படமாக உருவாகிறது. இதனால் விக்ரமின் அடுத்த படம் என்ன என்ற குழப்பத்திற்கு விடை கிடைத்துள்ளது.