“தோழர் நல்லகண்ணு ஒரு பெரிய எடுத்துக்காட்டு” - வெற்றிமாறன்

வயது மூப்பு காரணமாகவும், மூச்சுத் திணறல் காரணமாகவும் சென்னை ராஜீவ் காந்தி அரசு மருத்துவமனையில் தொடர்ந்து சிகிச்சைப் பெற்று வந்த சுதந்திரப் போராட்ட வீரரும், இந்திய கம்யூனிஸ்ட் கட்சியின் மூத்த தலைவருமான தோழர் நல்லகண்ணு (101) நேற்று(25-02-26) சிகிச்சைப் பலனின்றி உயிரிழந்தார்.

அவரது உடல் சென்னை தியாகராயர் நகரில் உள்ள இந்திய கம்யூனிஸ்ட் கட்சியின் தலைமை அலுவலகமான பாலன் இல்லத்தில் பொதுமக்களின் அஞ்சலிக்காக வைக்கப்பட்டுள்ளது. அங்கு வைக்கப்பட்டுள்ள தோழர் நல்லகண்ணுவின் உடலுக்கு அரசியல் தலைவர்கள், திரை பிரபலங்கள் உள்ளிட்ட பல தரப்பினரும் நேரில் சென்று அஞ்சலி செலுத்தி வருகின்றனர். அந்த வகையில் தமிழக முதல்வர் மு.க.ஸ்டாலின், திராவிடர் கழகத் தலைவர் கி.வீரமணி, விடுதலை சிறுத்தைகள் கட்சித் தலைவர் திருமாவளவன், தவெக தலைவர் விஜய், தமிழக காங்கிரஸ் கமிட்டித் தலைவர் செல்வப்பெருந்தகை, கனிமொழி எம்.பி, முன்னாள் முதல்வர் ஓ.பன்னீர்செல்வம், இயக்குநர் ரஞ்சித், கவிஞர் வைரமுத்து, நடிகர் விஜய் சேதுபதி உள்ளிட்டவர்கள் தோழர் நல்லகண்ணுவின் உடலுக்கு அஞ்சலி செலுத்தினர்.

இந்த நிலையில் இயக்குநர் வெற்றிமாறன் நல்லகண்ணு உடலுக்கு நேரில் அஞ்சலி செலுத்தியுள்ளார். பின்பு செய்தியாளர்களிடம் பேசிய அவர், “இந்த தலைமுறைக்கும் அடுத்த தலைமுறைக்கும் ஒரு அரசியல் தலைவர் எப்படி இருக்க வேண்டும் என்று ஒரு பெரிய எடுத்துக்காட்டாக நம் கூடவே இருந்திருக்கிறார்.
இவரைப் போன்ற ஒரு தலைவர் இனிமேல் கிடைப்பாரா என்பது பெரிய கேள்விதான். அதே நேரம் இனி வரப்போகும் இளம் அரசியல் தலைவர்கள் இவரைப் பின்பற்றி வர வேண்டும் என்பது என்னைப் போன்றோரின் விருப்பம்” என்றுள்ளார்.