காதல் உருக வைத்ததா? - ‘தேரே இஷ்க் மே’ விமர்சனம்

ராஞ்சனா, அத்ரங்கீ ரே இந்தி படங்களுக்குப் பிறகு மீண்டும் ஆனந்த் எல் ராயுடன் கூட்டணி அமைத்து இந்த தேரே இஷ்க் மே படம் மூலம் மீண்டும் பாலிவுட்டில் கோதாவில் குதித்து இருக்கிறார் தனுஷ். இந்த வருடத்தில் ஒரு தெலுங்கு பான் இந்தியா படம், நேரடி தமிழ் படம், தற்போது பாலிவுட் படம் என இந்தியா முழுவதும் ஒரு ரவுண்டு வந்திருக்கும் தனுஷுக்கு இந்த தேரே இஷ்க் மே திரைப்படம் எந்த அளவு வரவேற்பை பெற்றுத் தந்திருக்கிறது?

டெல்லியில் கல்லூரியில் அடிதடி செய்து கொண்டு அட்டகாசம் செய்யும் கடைசி பெஞ்ச் மாணவராக இருக்கும் தனுஷ் மிகவும் கோபக்கார இளைஞராக வலம் வருகிறார். அதே கல்லூரியில் பிஎச்டி படிக்கும் மாணவியான க்ரித்தி சனோன் முனைவர் பட்டம் பெறுவதற்கான ஆராய்ச்சியில் ஈடுபட்டுக் கொண்டிருக்கிறார். அப்பொழுது அவர் ஆராய்ச்சிக்காக தனுஷை நல்லவராக மாற்றும் முயற்சியில் இறங்குகிறார். இதில் தனுஷுக்கு க்ரித்தி சனோன் மேல் அளவில்லா காதல் ஏற்படுகிறது. இந்த காதல் விஷயம் க்ரித்தி சனோன் தந்தை ஐஏஎஸ் அதிகாரியான டோட்டா ராய் சௌதிரிக்கு தெரிய வர அவரோ தனுஷை யுபிஎஸ்சி தேர்வில் குறைந்தது முதல் நிலை தேர்வையாவது தேர்ச்சி பெற்று வந்தால் தன் மகளை தருகிறேன் என கூறி அனுப்பி விடுகிறார். தனுஷும் மிகவும் கஷ்டப்பட்டு மூன்று வருடங்கள் போராடி முதல் நிலை தேர்வில் தேர்ச்சி பெற்று க்ரித்தி சனோனை காண வரும் நேரத்தில் அவருக்கு வேறொருவருடன் திருமணம் நிச்சயிக்கப்படுகிறது. இதைத்தொடர்ந்து தனுஷ் வாழ்வில் என்னென்ன அதிரடி திருப்பங்கள் ஏற்படுகிறது? தனுஷ் க்ரித்தி சனோனை கரம் பிடித்தாரா, இல்லையா? தனுஷ் காதல் என்னவானது? என்பதே இப்படத்தின் மீதி கதை. 

நாம் இந்திய சினிமாவில் பார்த்து பழகிய உருகி உருகி காதலிக்கும் ஒரு காதல் கதையே இந்தப் படத்தையும் முழுவதுமாக அலங்கரித்து இருக்கிறது. தன் முந்தைய படங்களான ராஞ்சனா, அத்ரங்கீ ரே ஆகிய படங்கள் மூலம் வெவ்வேறு விதமான காதல் கதைகளை கூறியிருக்கும் இயக்குநர் ஆனந்த் எல் ராய் இந்த படத்தில் அதே போன்று ஒரு காதலில் உருகி அதில் மூழ்கி அழிந்து போகும் ஒரு இளைஞனின் கதையை தன்னுடைய பாணியில் எதார்த்தமாகவும் அதே சமயம் இக்காலத்திற்கு ஏற்ப கமர்சியல் அம்சங்களையும் ஒருசேர மிக்ஸ் செய்து மிகவும் ஒரு எமோஷனலான காதல் டிராமாவாக கொடுத்திருக்கிறார். தன் முந்தைய படங்களில் இருக்கும் ஒரு அழகான காதல் கவிதை இந்த படத்தில் ஏனோ சில இடங்களில் சற்றே மிஸ்ஸிங்காக தெரிகிறது. அதேபோன்று ஒரு இசை விருந்தை தன் படங்கள் மூலம் சிறப்பான முறையில் கொடுத்து அதன் மூலம் பார்ப்பவர்களை கண்கலங்க செய்து அதே சமயம் நெகிழவும் செய்து ஒரு பீல் குட் காதல் படம் பார்த்த உணர்வை கொடுக்கும் இயக்குநர் இந்தப் படத்திலும் அதை ஓரளவு பூர்த்தி செய்திருக்கிறார். 

இவர் படம் என்றாலே கதைக்கும் காட்சி அமைப்புகளுக்கும் ஏற்றார் போல் இசையும் மிகவும் ஹைலைட்டாக அமைந்து ரசிகர்களை தியேட்டருக்கு வரவழைக்கும். ஆனால் இந்தப் படத்தில் மற்ற விஷயங்கள் அனைத்தும் சிறப்பாக அமைந்து இசை மட்டும் இன்னும் கூட சிறப்பாக இருந்திருக்கலாம் என்ற உணர்வை ஏற்படுத்துகிறது. மற்றபடி தான் சொல்ல வந்த விஷயத்தை மிகவும் அழகாகவும் அதேசமயம் எதார்த்தமாகவும் மிக மிக எமோஷனலாகவும் காதலை உருகி உருகி காண்பித்து பார்ப்பவர்களை கண்கலங்க செய்து அந்தப் படத்துடன் நம்மை கனெக்ட் செய்யும்படியாக அமைந்திருக்கிறது. படத்தில் பல்வேறு லாஜிக் மீறல்கள் படம் முழுவதும் தென்பட்டாலும் அவை சிறப்பான திரைக்கதை அமைப்பு மற்றும் காட்சி அமைப்புகள் மூலம் மறக்கடிக்கப்பட செய்து பார்ப்பவர்களை ரசிக்க வைத்திருக்கிறது.

கதைக்கருவில் இருந்த சில ஓட்டைகளை தவிர்த்துவிட்டு குறிப்பாக விருப்பம் இல்லாத கதாநாயகியை பின்தொடரும் கதாநாயகனால் அவருக்கு ஏற்படும் பின் விளைவுகள் பின்னாளில் நாயகிக்கு குற்ற உணர்வை ஏற்படுத்தி அதன் மூலம் அவருக்கு நாயகன் மேல் ஒரு காதல் ஏற்படுகிறது என்கின்ற ஆதிகால கதை அமைப்பை இந்த படத்திலும் உபயோகித்து இருப்பது சற்றே நம்மை பின்னோக்கி இழுத்துச் செல்கிறது. இது கொஞ்சம் மைனஸ் தான். ஆனால் இந்தி ரசிகர்களுக்கு இந்த படம் மிகவும் கனெக்ட் ஆகும்படியான அதுவும் குறிப்பாக இந்த காலம் இருக்கும் ட்ரெண்டுக்கு ஏற்ப கனெக்ட் ஆகும்படியான படமாக இது இருப்பது படத்திற்கு மிகப்பெரிய பிளஸ். இந்த கால ஜென்சிகளுக்கு தெரியாத ஒரு உணர்ச்சிபூர்வமான உண்மை காதலை இந்த படம் மூலம் மீண்டும் அவர்களுக்கு மணி அடித்தார் போல் கூறி இருப்பது இந்த படத்திற்கு இன்னொரு பிளஸ்.

தனுஷ் வழக்கம் போல் தன்னுடைய இயல்பான நடிப்பின் மூலம் ஒவ்வொரு காட்சிக்கும் உயிர் கொடுத்து பார்ப்பவர்களை பல்வேறு உணர்ச்சிகளுக்குள் ஊடுருவ செய்து படத்துடன் நம்மை ஒன்ற வைத்து விடுகிறார். வழக்கம் போல் இவரது எளிமையான எதார்த்தமான நடிப்பு அந்த கதாபாத்திரத்தை அப்படியே நம் கண் முன் கொண்டு வந்து நிறுத்துகிறது. அதேபோல் ஒவ்வொரு ஃபிரேமிலும் ஒவ்வொரு விதமான உணர்ச்சிகளை வெளிப்படுத்தி தன் நடிப்பின் மூலம் நம்மை கவர்ந்து இழுக்கிறார். அதுவே படத்திற்கு பெரிய பிளஸாகவும் அமைந்திருக்கிறது. ஏதோ கடமைக்காக கதாநாயகி வந்தார் என்பதாக இல்லாமல் தனுஷுக்கு ஈக்குவலாக போட்டி போட்டுக்கொண்டு தானும் ஒரு சிறந்த நடிகை என இந்த படத்தின் மூலம் நிரூபித்துக் காட்டியிருக்கிறார் நடிகை க்ரித்தி சனோன். பல இடங்களில் தனுஷை தூக்கி சாப்பிட்டு விட்டிருக்கிறார். இவருக்கும் தனுஷ்குமான கெமிஸ்ட்ரி மிக மிக சிறப்பாக அமைந்து படத்தையும் தூக்கி நிறுத்தி இருக்கிறது. படம் முழுவதும் பெரும்பாலான காட்சிகள் இவர்கள் இருவருமே வருகிறார்கள் அந்த ஒவ்வொரு காட்சியிலும் ஒவ்வொருவர் போட்டி போட்டுக் கொண்டு நடித்து படத்தை வேறு லெவலுக்கு எடுத்துச் சென்று இருக்கிறார்கள்.

அப்பாவாக வரும் பிரகாஷ்ராஜ் வழக்கம்போல் தன் அனுபவ நடிப்பின் மூலம் கண் கலங்க வைத்திருக்கிறார். தனுஷின் நண்பராக நடித்திருக்கும் நபர் சிறப்பான நடிப்பை வெளிப்படுத்தி கலகலப்பு ஊட்டி இருக்கிறார். நாயகியின் அப்பாவாக வரும் டோட்டா ராய் சௌத்ரி தனக்கு கொடுத்த வேலையை சிறப்பாக செய்து கவர்ந்திருக்கிறார். சிறப்பு தோற்றத்தில் வரும் ரஞ்சனா படத்தின் தனுஷின் நண்பராக வரும் நடிகர், இரண்டு காட்சிகளில் வந்தாலும் தியேட்டரை அதிர செய்திருக்கிறார். மற்றபடி உடன் நடித்த அனைத்து நடிகர்களுமே வழக்கம் போல் ஆனந்த் எல் ராய் படங்களில் வரும் நடிகர்கள் எந்த அளவு காட்சிகளுக்கு உயிர் கொடுப்பார்களோ அதே போல் இந்த படத்திலும் உயிர் கொடுத்து நடித்து படத்தையும் கரை சேர்க்க உதவி இருக்கின்றனர். 

இந்தப் படத்தின் இன்னொரு நாயகனாக இருக்கும் ஏ ஆர் ரஹ்மான் இந்த கால ஜென்சிகளுக்கு ஏற்றார் போல் சிறப்பான இசையை கொடுத்து கவர்ந்திருக்கிறார். இவர் இந்த படத்திற்கு கொடுத்திருக்கும் இசை இந்தி ரசிகர்களுக்கு மிக மிக சிறப்பாக அமைந்திருக்கிறது. ஆனால் ஏதோ தமிழ் ரசிகர்களுக்கு சற்றே ஏமாற்றம் அளித்திருக்கிறது. பின்னணி இசை அனைத்து தரப்பு ரசிகர்களையும் கவரும்படி இருந்தாலும் பாடல்களில் ஏனோ தமிழ் ரசிகர்களுக்கு சற்றே அன்னியமாக இருக்கிறது. மற்றபடி தமிழை விட மற்ற மொழி ரசிகர்களுக்கு இந்த படத்தின் இசை மிகப்பெரும் விருந்தாக அமைந்து படத்தையும் கரை சேர்க்க உதவி இருக்கிறது. துஷால் கண்டி ரே மற்றும் விஷால் சின்ஹா ஒளிப்பதிவில் காட்சிகள் உலகத்தரம். குறிப்பாக மிலிட்டரி சம்பந்தப்பட்ட காட்சிகள் மற்றும் வான் வழி காட்சிகள் மிகச் சிறப்பாக காட்சிப்படுத்தப்பட்டு அதற்கு ஏற்றார் போல் வி எப் எக்ஸ் காட்சிகளும் அதற்கு உதவி புரிந்து காட்சிகளை வேறு தளத்திற்கு எடுத்துச் சென்று இருக்கிறது. படத்தொகுப்பாளர் படத்தின் நீளத்தை சற்று கத்தரி போட்டு இருக்கலாம். 

முதல் பாதி சற்றே வேகமாகவும் விறுவிறுப்பாகவும் நகர்ந்து இரண்டாம் பாதியில் முழுக்க காதல் காட்சிகள் உருகி உருகி காதலித்து நெகிழ வைத்து பார்ப்பவர்களை கலங்கடிக்க செய்து ஒரு மிகவும் எமோஷனலான குறிப்பாக நீண்ட நாட்களுக்கு பிறகு நல்ல காதல் படமாக இந்த தேரே இஷ்க் மே திரைப்படம் அமைந்திருக்கிறது. இருந்தும் படத்தின் நீளத்தை சற்று குறைத்திருக்கலாம். அதேபோல் படத்தில் பல்வேறு லாஜிக் ஓட்டைகள் நிறைந்து இருப்பதையும் தவிர்த்து இருக்கலாம். குறிப்பாக நாயகியின் வீட்டினுள் அவ்வளவு பெரிய தீ பிடிக்கும் சம்பவத்தை செய்துவிட்டு அடுத்த நாள் ஏதும் தெரியாதது போல் ஈசியாக திரும்பவும் அதே வீட்டுக்குள் நாயகன் எந்த ஒரு தடங்கலும் இல்லாமல் நுழைவது ஏற்றுக்கொள்ளும்படி இல்லை. இதுபோல் பல லாஜிக் மீறல்கள் இருந்தாலும், அதேபோல் கதைக்குள் பழைய பாணி காட்சி அமைப்புகள் பல தென்பட்டாலும், எங்கோ ஒரு மூலையில் பலவிதமான காட்சிகள் எங்கேயோ பார்த்திருக்கிறோமே என்ற எண்ணம் படம் முழுவதிலும் உள்ள காட்சிகளை பார்க்கும் பொழுது நமக்கு மனதுக்குள் தோன்றினாலும் படத்தில் சொல்ல வந்த காதல் அதற்கான உணர்ச்சி அதே போல் பாசம், நேசம் ஆகியவை நம்மை கலங்கடிக்க செய்து அந்த காதலுக்குள் நம்மை பயணிக்க செய்து நம்முடன் கனெக்ட் ஆகி இருப்பது படத்தை வெற்றி பெற செய்திருக்கிறது. 

தேரே இஷ்க் மே - பித்து பிடித்தவன்!