“கற்பனையே செய்ய முடியாது...” - கலைஞர் குறித்து சிலாகித்த சிவகுமார்

தமிழ்நாடு டாக்டர் ஜெ ஜெயலலிதா இசை மற்றும் கவின்கலைப் பல்கலைக்கழகத்தின் மூன்றாம் ஆண்டு பட்டமளிப்பு விழாவில் சென்னை கலைவாணர் அரங்கத்தில் நடைபெற்றது. இதில் தமிழ்நாடு முதலமைச்சரும், பல்கலைக்கழகத்தின் வேந்தருமான மு.க. ஸ்டாலின் கலந்து கொண்டு மாணவ, மாணவியர்களுக்கு பட்டங்களை வழங்கினார். மேலும் நடிகர் சிவகுமாருக்கு மதிப்புறு முனைவர் பட்டத்தை வழங்கி சிறப்பித்தார். 

மேடையில் பேசிய சிவகுமார், “கலைஞர் இறந்த அதே மாதத்தில் கோவை இந்துஸ்தான் பல்கலைக்கழக வளாகத்தில் அவருக்கு நினைவேந்தல் நிகழ்ச்சி நடந்தது அதில் திரைப்படத்துறையில் இருந்து பல்வேறு கலைஞர்கள் கலந்து கொண்டார்கள். அந்த மேடையில் முக ஸ்டாலினை நாளை முதல்வர் என குறிப்பிட்டு பேசினேன். அந்த வாழ்த்து பொய்யாகவில்லை. தந்தை வழியில் மிகச்சிறந்த ஆட்சியை நடத்திக் கொண்டிருக்கிறார். நான் சிறு வயதிலேயே அதிகமாக படங்கள் பார்த்ததில்லை. என்னுடைய 16 வயது வரை நான் பார்த்த மொத்த படங்களே 14 தான். அதில் மறக்க முடியாத படங்கள் பராசக்தி, மனோகரா, இல்லற ஜோதி, ராஜா ராணி போன்ற படங்கள். அந்தப் படங்களில் கலைஞர் எழுதிய வசனங்களை 15 வயதிலேயே மனப்பாடம் செய்து விட்டேன். 

கலைஞர் என்னிடம் கூறிய நிகழ்வு ஒன்றை பகிர்ந்து கொள்கிறேன். ஒரு முறை அவர், ‘தம்பி நான் எஸ் எஸ் எல் சி பரிட்சை எழுதல, ஒரு வேளை எழுதி பாஸ் பண்ணா, ஐஏஎஸ் போக சொல்லுவாங்க. மேற்கொண்டு படிக்க எனக்கு விருப்பமில்ல, அதனால் பரிட்சை எழுதாம தவிர்த்தேன்’ அப்படின்னு என்கிட்ட சொன்னார். அப்படி எஸ்எஸ்எல்சி தேர்ச்சி பெறாத ஒரு இளைஞன் சங்க இலக்கிய பாட்டுக்கு உரை எழுதி இருக்கார். அதை கற்பனையே செய்ய முடியாது. அவர் சங்க இலக்கியம் என ஒரு புத்தகம் கொடுத்திருக்கிறார். அந்த புத்தகத்தை வாங்கி படித்தால் ஆயிரம் கதை இருக்கும். அவருடைய மகன் இன்று ஆட்சி செய்து காலை உணவு திட்டம், புதுமைப்பெண் திட்டம், நான் முதல்வன் திட்டம், தமிழ் புலவன் திட்டம், வீடு தேடி மருத்துவம் என்று எண்ணற்ற திட்டங்களை நிறைவேற்றி இன்று நம் மக்களுடைய மனதில் நீங்கா இடம் பிடித்திருக்கிறார். இவர் இந்த பதிவிலேயே மீண்டும் நீடிக்க வேண்டும் என்று வாழ்த்துகிறேன். இதனிடைய கலைஞர் எழுதிய ‘காவிரி தந்த தமிழகத்து புது மணலில் களம் அமைத்து...’ என ஆரம்பிக்கும் வசனத்தை உணர்ச்சி பொங்க பேசினார். அது அரங்கத்தை கைத்தட்டல்களால் நிரம்பச் செய்தது.