“ஜேம்ஸ் பாண்ட் படம் மாதிரி இருக்கு...” - அஞ்சான் ரீ ரிலீஸ் குறித்து பிரபலம் பாராட்டு

லிங்குசாமி இயக்கத்தில் சூர்யா நடிப்பில் 2014 ஆம் ஆண்டு வெளியான படம் அஞ்சான். திருப்பதி பிரதர்ஸ் தயாரித்திருந்த இப்படத்தில் சமந்தா கதாநாயகியாகவும் மனோஜ் பாஜ்பாய் வில்லனாகவும் நடித்திருந்தனர். மேலும் வித்யூத் ஜமால் முக்கிய கதாபாத்திரத்திலும் சூரி நகைச்சுவை வேடத்திலும் நடித்திருந்தார்கள். யுவன் சங்கர் ராஜா இசையமைத்திருந்த நிலையில் பாடல்களும் நல்ல வரவேற்பை பெற்றது. இதில் சூர்யா பாடிய ‘ஏக் தோ தீன் சார்’ பாடல் சிறப்பம்சமாக அமைந்திருந்தது. 

மும்பை டான் கல்ச்சர், அசத்தலான சூர்யா கெட்டப், சூர்யா குரலில் பாடல் என ஏகப்பட்ட எதிர்பாப்புக்கு மத்தியில் வெளியான இப்படம் போதிய வரவேற்பை பெறவில்லை. சமூக வலைதலங்களில் கிண்டலுக்கும் கேலிக்கும் உண்டானது. குறிப்பாக இயக்குநர் லிங்குசாமியின் பில்டப் பேச்சு சமூக வலைதளங்களில் ட்ரோல் மெட்டீரியலாக மாறியது. இந்த நிலையில் இப்படம் 11 வருடங்கள் கழித்து நேற்று 28ஆம் தேதி ரீ ரிலீஸானது. இதில் புதிதாக ரீ எடிட் செய்து வெளியானது. மொத்தம் 2.36 மணி நேரம் இருந்த படத்தை 2 மணி நேர படமாக குறைத்திருக்கிறார்கள். 

இந்த நிலையில் ரீ ரிலிஸ் காட்சியை ரசிகர்களுடன் லிங்குசாமி, இயக்குநர் ஆர்.கே செல்வமணி, தயாரிப்பாளர் தனஞ்ஜெயன் உள்ளிட்ட சிலர் படம் பார்த்தனர். பின்பு செய்தியாளர்களை சந்தித்து பேசினர். அப்போது ஆர் கே செல்வமணி பேசுகையில், “ஒரு இங்கிலீஷ் படம் பார்த்த மாதிரி இருந்துச்சு. ஆடியன்ஸ் ஸ்கிரீன் கிழியிற மாதிரி கத்துறாங்க. ‘பேங்க் பேங்க்’ பாடலுக்கும் ‘ஏக் தோ தீன்’ பாடலுக்கும் பயங்கரமான ரெஸ்பான்ஸ் இருக்கு. 

படம் பார்க்கும்போது இப்போ எடுத்த மாதிரி அவ்வளோ கலர்ஃபுல்லா ஸ்டைலா இருக்கு. அதுக்கு சந்தோஷ் சிவனுக்கு ஹாட்ஸ் ஆப். அவருடைய கேமரா இன்னைக்கு இருக்கிற படத்துக்கு போட்டி போடுற மாதிரி இருக்கு. சூர்யா ரொம்ப யூத்தா இருக்கார். அவர பார்க்கும்போது ஒரு ஜேம்ஸ் பாண்ட் படம் பாக்குற மாதிரி இருக்கு. சமந்தா அவ்ளோ அழகா இருக்காங்க. தீபாவளிக்கு ஒரு படம் வெளியான எப்படி ஆடியன்ஸ் சந்தோஷப்படுவாங்களோ அதே மாதிரி இப்போ சந்தோஷப்படுறாங்க. இரண்டு மணி நேர படத்துல ஒன்றரை மணி நேரத்துக்கு ஆடியன்ஸ் கைத்தட்டிக்கிட்டே இருக்காங்க. இப்ப பண்ண எடிட்டிங்க அப்பவே பண்ணிருந்தா படம் வேற லெவல்ல இருந்திருக்கும். அப்போ வெளியான போது படம் பார்த்து லிங்குசாமிக்கு பாராட்டு சொன்னேன். அவர் எடுத்ததிலே டெக்னிக்கலா இந்த படம் நல்லா இருக்குன்னு சொன்னேன். இன்றைய தேதிக்கும் அதே போல எந்த அளவும் குறையாமல் இருக்கு” என்றார்.