Skip to main content

இரண்டாவது வெற்றியை ருசி பார்த்தாரா கவின்? -  ‘ஸ்டார்’ விமர்சனம்!

Published on 11/05/2024 | Edited on 11/05/2024

 

Star tamil movie review

டாடா வெற்றிக்கு பிறகு நடிகர் கவின் அடுத்ததாக களம் இறங்கி இருக்கும் திரைப்படம் ஸ்டார். தமிழ் சினிமாவில் தமிழ் சினிமாவை மையப்படுத்தி எத்தனையோ திரைப்படங்கள் வெளியாகி சில படங்கள் வெற்றியும் பல படங்கள் தோல்வியும் பெற்றுள்ள இந்தச் சூழலில் இதே கதைக்களத்தை மையமாக வைத்து உருவாகி இருக்கும் ஸ்டார் திரைப்படம் இதில் எந்த பட்டியலில் இணைந்துள்ளது? என்பதைப் பார்ப்போம்.

போட்டோகிராபராக இருக்கும் லால், சினிமா மீது இருக்கும் அதீத காதலால் தனது மகன் கவினை சினிமாவில் மிகப் பெரிய ஸ்டார் ஆக மாற்ற சிறுவயதில் இருந்து அவருக்கு சினிமா ஆர்வத்தை ஊட்டி வளர்க்கிறார். கவினும் சிறு வயது முதலே சினிமாவில் மிகப்பெரிய நடிகராக வேண்டும் என்ற எண்ணத்தோடு வளர்கிறார். மிகப்பெரிய கனவுகளோடு தன் வாழ்க்கையை பள்ளிக்காலம் முதல் காலேஜ் காலம் வரை ஜாலியாக கடத்தும் கவின் அதன் பிறகு சினிமாவின் உண்மையான கோர முகத்தை காண்கிறார். நிஜ வாழ்க்கைக்கும் நினைத்த வாழ்க்கைக்கும் இருக்கும் வித்தியாசத்தை உணரும் தருணம் வரும் வேளையில் வாழ்க்கையில் பல அடிகளை வாங்குகிறார். இதன்பின் அவருடைய காதலி அவரை விட்டு செல்கிறார், அவருக்கு விபத்து ஏற்பட்டு முகத்தில் காயம் ஏற்படுகிறது, பிறகு அவருக்கு வேறு நாயகியுடன் திருமணம் ஆகிறது, இதற்கிடையே சினிமாவில் நடிகராக பல்வேறு போராட்டம் என நகரும் படம் போகப் போக உணர்ச்சிபூர்வமான காட்சிகளால் நிரம்பி சில இடங்களில் கண்கலங்க வைக்கும். பல இடங்களில் இழுவையாக தொடர்ந்து செல்லும் திரைப்படத்தில் கடைசியில் தான் கண்ட கனவில் கவின் ஜெயித்து ஸ்டார் ஆக மாறினாரா? இல்லையா? என்பதே இப்படத்தின் மீதி கதை.

ஒரு நடுத்தர வயது இளைஞன் சினிமாவில் மிகப்பெரிய நடிகராக மாற எந்த அளவு போராட வேண்டி இருக்கும் என்பதை மிக மிக எதார்த்தமாகவும், உயிர்ப்புடன் இருக்கும் காட்சி அமைப்புகளாக கொடுத்து இன்ஸ்பைரிங் பீல் குட் படமாக கொடுக்க முயற்சி செய்திருக்கிறார் பியார் பிரேமா காதல் புகழ் இயக்குநர் இளன். முதல் பாதி பள்ளிப் பருவம், காலேஜ் பருவம் முதல் காதல் துள்ளலான பாடல்கள் என மிகவும் பாசிட்டிவ் வைப்பில் ஜெனரஞ்சகமாக நகரும் திரைப்படம், ஒரு மிகப்பெரிய விபத்திற்கு பிறகு இரண்டாம் பாதியில் வாழ்க்கையின் நிதர்சன முகம், திருமண வாழ்க்கை அதனுடன் நடக்கும் பேஷனுக்கான போராட்டம் என நெகிழ்ச்சியான திரைப்படமாக நகர்ந்து முடிவில் சிறப்பான காட்சி அமைப்போடு படம் நிறைவடைகிறது. முதல் பாதி கொடுத்த கூஸ்பம்ப் மோமன்ட்ஸ்கள் இரண்டாம் பாதியில் இல்லாதது படத்திற்கு சற்றே மைனஸ் ஆக அமைந்திருக்கிறது. அதேபோல் இரண்டாம் பாதியில் கதை ஒரு நேர்கோட்டை விட்டு வேறு வேறு நேர்கோட்டில் பயணித்து குழப்பமாக சுற்றி சுற்றி வேறு வேறு கதைகளில் பயணம் செய்து முடிவில் வந்த இடத்திற்கே வந்து முடிவது சற்றே அயற்சியை கொடுத்து இருக்கிறது. இருந்தும் நாம் ஏற்கெனவே பார்த்து பழகிய ஒரு கதையாக இருந்தாலும் மிகவும் பிரஷ்ஷான காட்சிகள், ஜனரஞ்சகமான குடும்ப காட்சிகள், இன்ஸ்பயரிங்கான காட்சிகள், அதற்கு ஏற்ற சிறந்த நடிப்பு எனப் படம் இளைஞர்களுக்கான படமாக அமைந்துள்ளது. குறிப்பாக இரண்டாம் பாதியில் வரும் யுவனின் மிகப்பெரிய பிளாக்பஸ்டர் ஹிட் பழைய பாடல் ஒன்று படத்தை வேறு ஒரு லெவலில் பூஸ்ட் செய்து படத்தை கரை சேர்த்திருக்கிறது. 

நடிகர் கவின் உடல் பொருள் ஆவி என அனைத்தையும் கொடுத்து நடித்து தன்னுடைய கெரியரில் அடுத்த கட்டத்தை எட்டி இருக்கிறார். நடிப்பில் பல இடங்களில் நன்றாக மெனக்கிட்டு நடித்து எந்தெந்த காட்சிகளை என்ஹான்ஸ் செய்து காட்ட வேண்டுமோ அந்தந்த காட்சிகளை தன் நடிப்பின் மூலம் சிறப்பாக காட்டி தியேட்டரில் கைதட்டல் பெறுகிறார். இருந்தும் சற்றே அடக்கி வாசிக்கும்படியான காட்சிகளில் தன் வழக்கமான நடிப்பை கொடுத்த கவின் இன்னும் கூட சிறப்பான நடிப்பை வெளிப்படுத்தி இருக்கலாம் 

கவினின் காதலியாக நடித்திருக்கும் ப்ரீத்தி முகுந்தன் சில இடங்களில் கவினையே தூக்கி சாப்பிடும் அளவுக்கு சிறப்பான நடிப்பை வெளிப்படுத்தி கவனம் பெற்று இருக்கிறார். தனக்கு கொடுக்கப்பட்ட ஸ்பேஸில் சிறப்பாக நடித்திருக்கும் இவர் சிறிது நேரமே வந்தாலும் சிறப்பான நடிப்பை வெளிப்படுத்தி கைத்தட்டல் பெறுகிறார். கவினின் தந்தையாக நடித்திருக்கும் லால் வழக்கம் போல் சிறப்பான நடிப்பை வெளிப்படுத்தி படத்திற்கு மிகப்பெரிய தூணாக அமைந்திருக்கிறார். எந்தெந்த இடங்களில் எவ்வளவு நடிப்பு தேவையோ அதை சிறப்பாக கொடுத்து படத்திற்கு பக்கபலமாக அமைந்திருக்கிறார். கவினின் தாயாக வரும் கீதா கைலாசம் சிறப்பான கதாபாத்திரத்தேர்வு. இவரின் இயல்பான நடிப்பு படத்தை வேறு ஒரு தளத்திற்கு எடுத்துச் சென்றிருக்கிறது. படத்தின் இரண்டாவது நாயகியாக வரும் அதித்தி வழக்கமான நாயகியாக வந்து செல்கிறார். வழக்கமாக காமெடி கதாபாத்திரத்தில் நடிக்கும் லொள்ளு சபா மாறன் இந்தப் படத்தில் குணச்சித்திர கதாபாத்திரத்தில் வந்து மிளிர்கிறார். சில காட்சிகளே வந்தாலும் காதல் சுகுமார் உட்பட பலர் அவரவர் வேலையைச் சிறப்பாக செய்து இருக்கின்றனர். 

இந்த ஸ்டார் படத்தின் ஆக்சுவல் நாயகன் யார் என்றால் அது யுவன் தான். இளம் கூட்டணி என்றாலே குஷி ஆகிவிடுவார் என்பது போல் பாடல்களிலும், பின்னணி இசையிலும் வாசித்து தள்ளி மீண்டும் ஒருமுறை ரசிகர்களுக்கு இன்ப அதிர்ச்சி மேல் அதிர்ச்சி கொடுத்திருக்கிறார் மீண்டும். முதல் பாதியில் வரும் காலேஜ் பாடலும், காதல் பாடலும் வேற லெவல் ஹிட். அதேபோல் பின்னணிசையிலும் மிரட்டி இருக்கிறார். குறிப்பாக படத்தில் சர்ப்ரைஸாக வரும் இவரின் பழைய பிளாக்பஸ்டர் பாடல் ஒன்று படத்தை வேறு ஒரு தளத்திற்கு எடுத்துச் சென்று ஹிட்டடிக்க உதவி இருக்கிறது. எழில் அரசுவின் ஒளிப்பதிவில் விண்டேஜ் காட்சிகளும் சமகால காட்சிகளும் மிகச் சிறப்பாக காட்சிப்படுத்தப்பட்டு படத்திற்கு வலு சேர்த்திருக்கிறது.

முதல் பாதி கொடுத்த பூரிப்பை இரண்டாம் பாதியிலும் சற்று சிறப்பாக கொடுத்திருந்தால் இந்தப் படம் இன்னமும் சிறப்பாக அமைந்திருக்கும். அதேபோல் படத்தின் நீளத்தையும் சற்று குறைத்திருக்கலாம். இருந்தும் கவினின் இளமையான நடிப்பும், யுவனின் துள்ளலான இசையும் படத்திற்கு மிகப்பெரிய தூணாக அமைந்து இப்படத்தைக் கரை சேர்க்க உதவி இருக்கிறது.

ஸ்டார் - இன்ஸ்பிரேஷன்!

சார்ந்த செய்திகள்

Next Story

மாபெரும் மதிப்பை பெறுகிறாரா? - ‘மகாராஜா’ விமர்சனம்!

Published on 14/06/2024 | Edited on 14/06/2024
Vijaysethupathi's maharaja movie review

சில ஆண்டுகளாக பெரிய ஹிட் படங்கள் எதுவும் கொடுக்காத விஜய் சேதுபதி அதை மீட்டெடுக்க போராடி வருகிறார். படத்தில் விஜய் சேதுபதி இருந்தால் அந்தப் படம் வெற்றியும், அதுவே அது விஜய் சேதுபதி படம் என்றால் படம் தோல்வி அடைவதுமாய் ஒரு ட்ரெண்ட் வலம் வந்து கொண்டிருந்தது. இந்த வேளையில் சறுக்கல்களில் இருந்து மீண்டு எழுந்து மீண்டும் வெற்றி பாதைக்குத் திரும்ப கோதாவில் மகாராஜாவாக குதித்திருக்கும் விஜய் சேதுபதிக்கு இந்த மஹாராஜா திரைப்படம் மகுடம் சூட்டியதா, இல்லையா?

காதில் அடிபட்டு கை கால்களில் வெட்டு காயங்களுடன் போலீஸ் நிலையத்திற்கு வரும் விஜய் சேதுபதி தன் வீட்டில் இருந்த லட்சுமியை காணவில்லை என போலீசில் கம்பளைண்ட் கொடுக்கிறார். போலீசோ லட்சுமி என்றால் யார் என்ன என்று கேட்க அதற்குப் பல விதங்களில் மழுப்பும் விஜய் சேதுபதி ஒரு வழியாக லட்சுமி யார் என்ற உண்மையை சொல்ல போலீஸோ இதற்கெல்லாம் கேஸ் கொடுக்க முடியாது எனத் தட்டிக் கழிக்கின்றனர். எப்படியாவது போலீசை இந்த வழக்கை விசாரிக்க செய்ய அவர்களுக்கு 7 லட்சம் ரூபாய் லஞ்சம் தருவதாக விஜய் சேதுபதி சொல்ல போலீசும் பணத்திற்கு ஆசைப்பட்டு இந்தக் கேசை கையில் எடுக்கிறது. யார் அந்த லட்சுமி..? விஜய் சேதுபதி ஏன் அந்த லட்சுமியை லஞ்சம் கொடுத்தாவது மீட்க வேண்டும் எனத் துடிக்கிறார்? உண்மையில் விஜய் சேதுபதிக்கு என்னவாயிற்று? அவரது காயங்களுக்கு யார் காரணம்? போன்ற கேள்விகளுக்கு விடையாக வந்திருக்கிறார் இந்த மகாராஜா. 

சமீப காலங்களாக விஜய் சேதுபதிக்கு போதுமான வெற்றி கிடைக்காத இந்தச் சூழலில் தன்னுடைய பிளஸ் எதுவோ அதைப் பிரதானமாக வைத்துக் கொண்டு அதே சமயம் கதைக்கும் திரைக்கதைக்கும் முக்கியத்துவம் கொடுக்கும் வகையான படத்தைக் கொடுத்து மீண்டும் கம்பேக் கொடுத்து வெற்றி அணையில் ஏறி இருக்கிறார் விஜய் சேதுபதி. நாம் ஏற்கெனவே பார்த்து பழகிய ஒரு சமூகத்துக்கு தேவையான ஒரு கதையை எடுத்துக் கொண்டு அதனைத் தனது சிறப்பான நான் லீனியர் திரைக்கதை மூலம் மிக சுவாரஸ்யமான படமாக கொடுத்து சூப்பர் ஹிட் படமாக இப்படத்தை கொடுத்து கைதட்டல் பெற்றிருக்கிறார் இயக்குநர் நிதிலன் சாமிநாதன். முதல் பாதி முழுவதும் மர்மமான முறையில் கதையை நகர்த்தி நக்கலும் நையாண்டியமாக சிரிக்க வைக்கும்படி பிளாக் காமெடி உடன் கதை நகர்ந்து இரண்டாம் பாதியில் நாம் எதற்கெல்லாம் சிரித்து ஏளனமாக இருந்தோமோ அதை எல்லாம் மிக சிறப்பான திருப்பங்கள் நிறைந்த திரைக்கதையோடு ஒவ்வொரு முடிச்சுகளாக அவிழ்க்கும் பொழுது மிக மிக சீரியசான ஒரு நல்ல க்ரைம் த்ரில்லர் படம் பார்த்த அனுபவத்தை இந்த மகாராஜா கொடுத்திருக்கிறது. குறிப்பாக இரண்டாம் பாதி நாம் எதிர்பாராத பல்வேறு ட்விஸ்டுகளை உள்ளடக்கி காட்சிக்கு காட்சி ஆச்சரியங்களையும் சுவாரசியத்தையும் கூட்டி முடிவில் நெகிழ்ச்சியான திரில்லர் படமாக படம் நிறைவடைந்து தியேட்டரில் கைத்தட்டல்களை பெற்றிருக்கிறது. விஜய் சேதுபதி கரியரிலேயே இது ஒரு சிறந்த படமாக அமைந்திருக்கிறது. இந்த ஆண்டின் குறிப்பிடத்தக்க கவனிக்க கூடிய ஒரு படமாகவும் இப்படம் அமைந்திருக்கிறது. இருந்தும் படத்தில் ஆங்காங்கே பல்வேறு விதமான லாஜிக் மிஸ்டேக்குகள் பல இடங்களில் படர்ந்து காணப்பட்டாலும் அவை பெருமளவு அயற்சி ஏற்படாதவாறு இருப்பது படத்தைப் பெரிதாகப் பாதிக்கவில்லை. இருந்தும் அந்தச் சிறு சிறு குறைகளில் சற்று கவனம் செலுத்தி இருக்கலாம். 

Vijaysethupathi's maharaja movie review

விஜய் சேதுபதி வழக்கம் போல் தன்னுடைய டிரேட் மார்க் நடிப்பின் மூலம் இப்படத்தை அடுத்த கட்டத்திற்கு எடுத்துச் சென்றிருக்கிறார். தனக்கு என்ன வருமோ அந்த நடிப்பை இந்தப் படத்தில் மிகச் சிறப்பாக கையாண்டு அதற்கு ஏற்றவாறு கதையும், திரைக்கதையும், அதற்கு உதவி செய்து படத்தையும் வேறு ஒரு தளத்திற்கு கொண்டு செல்ல உதவி இருக்கிறது. இவருக்கும் போலீசுக்குமான கெமிஸ்ட்ரி சிறப்பாக அமைந்தது படத்திற்கு பிளஸ் ஆக அமைந்திருக்கிறது. படத்தில் விஜய் சேதுபதி மட்டுமல்லாது உடன் நடித்த மற்ற நடிகர்களும் மிகச் சிறப்பாக நடித்து படத்தை வெற்றி படமாக மாற்ற உதவி செய்துள்ளனர். நெகட்டிவ் கதாபாத்திரத்தில் நடித்திருக்கும் அனுராக் காஷ்யப் வில்லத்தனத்தில் மிரட்டி இருக்கிறார். ஆரம்பத்தில் பயமுறுத்தி இறுதிக் காட்சிகளில் நெகிழவும் செய்திருக்கிறார். போலீசாக நடித்திருக்கும் நட்டி சிறப்பான நடிப்பை வெளிப்படுத்தி இருக்கிறார். அவருடைய வழக்கமான நடிப்பை வெளிப்படுத்தி இருக்கும் நட்டி, அந்தக் கதாபாத்திரத்துக்கு எந்த அளவு நியாயம் செய்ய முடியுமோ அதைச் செய்து ரசிக்க வைத்திருக்கிறார். இவருக்கு பக்கபலமாக போலீஸ் கதாபாத்திரத்தில் நடித்திருக்கும் நடிகர்களும் சிறப்பாக நடித்துள்ளனர். 

Vijaysethupathi's maharaja movie review

நீண்ட இடைவெளிக்குப் பிறகு சினிமாவில் தலை காட்டி இருக்கும் பாய்ஸ் மணிகண்டன் ஒரு நல்ல தேர்வு. சில காட்சிகளே வந்தாலும் கவனம் பெற்றுள்ளார். இதுவரை எந்தப் படத்திலும் ஏற்காத ஒரு கதாபாத்திரத்தை ஏற்று நடித்திருக்கும் சிங்கம் புலி, அதைச் சிறப்பாக செய்து இறுதி கட்ட காட்சிகளில் பார்ப்பவர்களுக்கு வெறுப்பை கொடுக்கும் படியான கதாபாத்திரத்தில் நடித்து கவனம் பெற்று இருக்கிறார். நாயகி மம்தா மோகன்தாஸ், அபிராமி மற்றும் திவ்யபாரதி ஆகியோர் சில காட்சிகளே வந்தாலும் அவரவர் வேலையை சிறப்பாக செய்து படத்திற்கு வலு சேர்த்து இருக்கின்றனர். விஜய் சேதுபதியின் மகளாக நடித்திருக்கும் சிறுமி சிறப்பாக நடித்து கவனம் பெற்று இருக்கிறார். சிறப்பு தோற்றத்தில் வரும் பாரதிராஜா அனுபவ நடிப்பால் கவர்கிறார். மற்றபடி முக்கிய கதாபாத்திரத்தில் நடித்த அனைவருமே அவரவர் வேலைகளை மிக மிக சிறப்பாக செய்து படத்தை கரை சேர்க்க பெருமளவு பங்களிப்பு கொடுத்துள்ளனர். 

படத்தில் பாடல்கள் இல்லை. ஆனால், பின்னணி இசையைத் தனக்குக் கொடுத்த ஸ்பேஸை சிறப்பாக பயன்படுத்தி மிரட்டலாக கொடுத்திருக்கிறார் அஜனீஸ் லோகநாத். எந்தெந்த காட்சிகளுக்கு எவ்வளவு சத்தம் தேவையோ ஒரு திரில்லர் படத்துக்கான இசையை சிறப்பாக கொடுத்து கவனம் பெற்று இருக்கிறார். தினேஷ் புருஷோத்தமன் ஒளிப்பதிவில் முதல் பாதியைக் காட்டிலும் இரண்டாம் பாதி காட்சிகள் சிறப்பாக காட்சிப்படுத்தப்பட்டுள்ளன. இவரின் நேர்த்தியான ஒளிப்பதிவு படத்திற்கு பக்க பலமாக அமைந்திருக்கிறது. 

நீண்ட இடைவெளிக்குப் பிறகு விஜய் சேதுபதி ரசிகர்களுக்கும் மற்றும் பொது ரசிகர்களுக்கும் திருப்திகரமான படமாக இந்த மகாராஜா மாறி இருக்கிறது. சமூகத்துக்கு தேவையான கதையைக் கையில் எடுத்து நான் லீனியர் முறையில் திரைக்கதை அமைத்து ஹாலிவுட் படத்திற்கு நிகரான படத்தைக் கொடுத்திருக்கிறார் இயக்குநர் நிதிலன் சாமிநாதன். மேலும், ஒரு நல்ல த்ரில்லர் படம் பார்த்த அனுபவத்தை கொடுத்து அனைத்து ரசிகர்களுக்கும் நிறைவான படமாக அமைந்திருக்கிறது. நாயகர்களை காட்டிலும் கன்டென்ட் தான் முக்கியம் என்பதை மீண்டும் ஒருமுறை இப்படம் நிரூபித்திருக்கிறது. 

 

மகாராஜா - மதிப்பு மிக்க ராஜா!

Next Story

மக்களின் மனங்களை வென்றாரா சூப்பர் ஹீரோ? - வெப்பன் விமர்சனம்

Published on 07/06/2024 | Edited on 07/06/2024
sathyaraj vepan movie review

குணச்சித்திர கதாபாத்திரங்களிலும், வில்லன் கதாபாத்திரங்களிலும் சமீப காலங்களாக நடித்து கைதட்டல் பெற்று வரும் நடிகர் சத்யராஜ் நீண்ட இடைவெளிக்குப் பிறகு மீண்டும் கதையின் நாயகனாக நடித்திருக்கும் திரைப்படம் வெப்பன். நீண்ட இடைவெளிக்கு பிறகு கதையின் நாயகனாக நடிக்கும் அளவுக்கு அப்படி என்ன இந்தக் கதையில் நடிகர் சத்யராஜை கவர்ந்துள்ளது. அதேபோல் ரசிகர்களை இப்படம் எந்த அளவு ஈர்த்துள்ளது? என்பதைப் பார்ப்போம்.

சுதந்திரத்திற்கு முன் நேதாஜி சுபாஷ் சந்திரபோஸ் உடன் சத்யராஜின் தந்தையும் ஜெர்மனிக்கு செல்கின்றனர். போன இடத்தில் ஹிட்லரின் படையில் சூப்பர் ஹியூமன்களை தயாரித்து அவர்கள் மூலம் உலகத்தை வீழ்த்தும் ஒரு மருந்தை ஹிட்லர் படை கண்டுபிடிக்கிறது. அம்மருந்தை இந்தியாவிற்கு கடத்தி வரும் சத்யராஜின் தந்தை அதைத்தன் மகன் சத்யராஜுக்கு செலுத்தி அவரை சூப்பர் ஹியூனாக மாற்றி விடுகிறார். இதை அடுத்து தானுண்டு தன் குடும்பம் உண்டு என வசித்து கொண்டிருக்கும் சத்யராஜை ஹிட்லர் படை பின் தொடர்ந்து வந்து அவர் குடும்பத்தை அழிக்கிறது. அதிலிருந்து தப்பிக்கும் சத்யராஜ் மற்றும் அவருடைய மகன் வசந்த் ரவி அந்த விபத்தில் தனித்தனியாக பிரிகின்றனர். பல வருடங்களுக்குப் பிறகு ஒரு இடத்தில் ஒரு குழந்தை மர்மமான முறையில் காப்பாற்றப்படுகிறது.

sathyaraj vepan movie review

இதைக் கண்ட யூட்யூபரும், சமூக ஆர்வலருமான வசந்த் ரவி அந்தக் குழந்தையைக் காப்பாற்றிய சூப்பர் ஹுமனை தேடி காட்டுக்குச் செல்கிறார். அதேசமயம் பிளாக் சொசைட்டி என்ற கூட்டத்தின் தலைமை அதிகாரியாக இருக்கும் ராஜீவ் மேனன் தன் சகாக்கள் ஒரு சூப்பர்  ஹியூமனால் பாதிக்கப்படுகின்றனர். இதனால் அவரும் அந்தச் சூப்பர் ஹுமனைத் தேடி காட்டுக்குச் செல்கின்றனர். இதைத்தொடர்ந்து அந்த சூப்பர் ஹியூமன் யார்? அவரை வசந்த் ரவி மற்றும் ராஜீவ் மேனன் கண்டுபிடித்தார்களா, இல்லையா? சத்யராஜுக்கும் வசந்த் ரவிக்கும் இருக்கும் உறவு என்ன ஆனது? இறுதியில் யார் ஜெயித்தார்கள் என்பதே படத்தின் மீதி கதை.

ஹாலிவுட் டிசி மார்வெல் போன்ற கம்பெனிகளில் உருவாகும் சூப்பர் ஹீரோக்களின் படங்கள் சமீப காலங்களாக வரவேற்பைப் பெறாமல் இருக்கும் இந்தச் சூழலில் அதைச் சரிகட்டும் வகையில் தமிழில் ஊரில் சூப்பர் ஹீரோ படத்தை உருவாக்கி அதன் மூலம் ரசிகர்களை ரசிக்க வைக்க முயற்சி செய்திருக்கிறார் இயக்குநர் குகன் சென்னியப்பன். மார்வெல் சினிமாட்டிக் யூனிவர்சில் எப்படி ஒரு அவெஞ்சர்ஸ் ஃபேமிலி இருக்கின்றதோ அதேபோல் இங்கு ஒரு சூப்பர் ஹீரோ பேமிலியை உருவாக்கும் முயற்சியில் வெப்பம் படத்தை உருவாக்கி இருக்கிறார்கள். இப்படத்தின் இறுதிக் கட்ட காட்சியில் இதன் இரண்டாம் பாகத்திற்கான வீடும் கொடுக்கப்படுகிறது. இதன் மூலம் தமிழ் சினிமாவில் ஒரு சூப்பர் ஹீரோ பேமிலி வைத்து ஒரு யூனிவர்சல் உருவாக்கி அதன் மூலம் ரசிகர்களை ரசிக்க வைக்க முயற்சி செய்திருக்கும் படக்குழு அதே முயற்சியைப் படத்தின் திரை கதையிலும் இன்னமும் நன்றாக கவனம் செலுத்தி கொடுத்திருந்தால் இப்படம் ரசிகர்களிடையே இன்னும் கொஞ்சம் நல்ல வரவேற்பை பெற்றிருக்கும்.

sathyaraj vepan movie review

சூப்பர் ஹீரோ மற்றும் அதைச் சுற்றி இருக்கும் யூனிவர்ஸ் என அந்தந்த விஷயங்களுக்கு முக்கியத்துவம் கொடுத்த இயக்குநர் ஏனோ கதைக்கும் திரைக்கதைக்கும் அதே முக்கியத்துவத்தைக் கொடுக்க தவறி இருக்கிறார். இதனால் படம் ஆரம்பித்து முடியும் வரை ஆங்காங்கே தொய்வுகள் ஏற்படுகிறது. இதனால் பார்ப்பவர்களுக்கு அயற்சியும் ஏற்படுகிறது. இருந்தும் படத்தின் இறுதி கட்ட காட்சிகள் சற்று பிராமி சிங்காக அமைந்து பார்ப்பவர்களுக்கு அடுத்து என்ன நடக்கப் போகிறது என்ற உணர்வை கொடுத்து அடுத்தடுத்த பாகங்களுக்கான லீடை கொடுத்திருப்பது சற்று ஆறுதலாக அமைந்து படத்தைக் கரை சேர்க்க முயற்சி செய்திருக்கிறது.

படத்தின் நாயகனாக நடித்திருக்கும் சத்யராஜ் கதாபாத்திரத்தை உணர்ந்து சூப்பர் ஹீரோ வேடத்தை நிறைவாக செய்திருக்கிறார். இவருக்கு பக்கபலமாக மகன் வசந்த் ரவி இரட்டை வேடத்தில் தனக்கு என்ன வருமோ அதே நடிப்பை இப்படத்திலும் கொடுத்து ரசிக்க வைக்க முயற்சி செய்திருக்கிறார். இவரின் கதாபாத்திரமும் சத்யராஜின் கதாபாத்திரமும் படத்திற்கு பக்க பலமாக அமைந்திருக்கிறது. பிளாக் சொசைட்டி கூட்டத்தில் வரும் ராஜீவ் மேனன் வேலு பிரபாகரன் ஆகியோரின் கூட்டணி படத்திற்கு வில்லன் சம்பந்தப்பட்ட விஷயங்களுக்கான பொறுப்பை எடுத்துக் கொள்கின்றன. அவை வழக்கமான வில்லத்தனம் காட்டி விட்டு கடந்து சென்று விடுகிறது. நாயகி தான்யா ஹோப் வழக்கமான நாயகியாக வந்து செல்கிறார். உடன் நடித்த மற்ற முக்கியமான கதாபாத்திரங்கள் அனைவருமே அவரவர் கதாபாத்திரங்களுக்கு என்ன தேவையோ அதைச் செவ்வனே செய்து விட்டு சென்று இருக்கின்றனர்.

sathyaraj vepan movie review

ஜிப்ரான் இசையில் பாடல்களைக் காட்டிலும் பின்னணி இசை பல இடங்களில் மிரட்டி இருக்கின்றன. குறிப்பாக ஆக்சன் காட்சிகளிலும் திரில்லர் சம்பந்தப்பட்ட காட்சிகளிலும் சிறப்பு. பிரபு ராகவ ஒளிப்பதிவில் சூப்பர் ஹீரோ சம்பந்தப்பட்ட vfx காட்சிகள் சிறப்பாக காட்சிப்படுத்தப்பட்டுள்ளன. அதேபோல் ஆக்ஷன் காட்சிகளையும் நேர்த்தியாக காட்டி இருக்கின்றனர். படத்தில் வரும் பெரும்பாலான காட்சிகளும் காஸ்டிம்களும் கருப்பு நிறத்தில் இருப்பதால் பெரும்பாலும் இருட்டுக்குள் நடக்கும் விஷயங்களை நல்ல வெளிச்சமாக காட்டி இருக்கிறார் படத்தின் இயக்குநர் குகன் சென்னியப்பன்.

தான் நினைத்த விஷயங்கள் மிக பிரம்மாண்டமாக இருந்தாலும் அவை காட்டிய விதத்தில் அதே பிரம்மாண்டத்தைக் காட்ட தவறியதால் இப்படத்தில் ஆங்காங்கே அயர்ச்சி ஏற்படுவதை தவிர்க்க முடியவில்லை. அதே போல் திரை கதையிலும் பல்வேறு குழப்பங்கள் நீடிக்கிறது. கதையும் இன்னும் கூட ஆழமாகவும் அழுத்தமாகவும் இருந்திருக்கலாம். இருந்தும் இப்படியான முயற்சிகளை கையில் எடுத்து அதற்கு ஏற்றார் போல் வி.எப்.எக்ஸ் காட்சிகளும் ஆக்‌ஷ்ன் காட்சிகளும் சிறப்பாக காட்சிப்படுத்தி ஹாலிவுட் தரத்தில் ஒரு படத்தை கொடுக்க எடுத்த முயற்சிக்காகவே இந்த வெப்பனை ஒரு தடவை பயன்படுத்தலாம்.

வெப்பன் - கூர்மை குறைவு!