ரவி மோகன் பட விவகாரம்; தடையை நீட்டித்த நீதிமன்றம்

ரவி மோகன் தயாரித்து நடித்து வரும் திரைப்படம் ‘ப்ரோ கோட்’(BRO CODE). கார்த்திக் யோகி இயக்கும் இப்படத்தில் எஸ்.ஜே.சூர்யா, ஷ்ரத்தா ஸ்ரீநாத், ஸ்ரீ கௌரி பிரியா, மாளவிகா மனோஜ், அர்ஜூன் அசோகன் உள்ளிட்டோர் நடிக்கின்றனர். இசைப் பணிகளை ஹர்ஷவர்தன் ரமேஷ் குமார் மேற்கொள்கிறார். 

இப்படத்தின் தலைப்பிற்கு டெல்லியை சேர்ந்த மதுபான உற்பத்தி நிறுவனம் ஒன்று எதிர்ப்பு தெரிவித்தது. ப்ரோ கோட் என்ற பெயரை தங்கள் நிறுவனம் பதிப்புரிமை செய்து வைத்திருப்பதால் அதை படத்தில் பயன்படுத்தக்கூடாது என படத் தயாரிப்பு நிறுவனமான ரவி மோகன் ஸ்டூடியோஸுக்கு மின்னஞ்சல் மூலமாக தெரிவித்தது. இதையடுத்து ப்ரோ கோட் என்ற பெயரை தனது படத்துக்கு பயன்படுத்த தடுக்கக்கூடாது என அந்த மதுபான நிறுவனத்துக்கு உத்தரவிட வேண்டும் என ரவி மோகன் சென்னை உயர்நீதி மன்றத்தில் மனு தாக்கல் செய்தார். 

இந்த வழக்கு விசாரணைக்கு வந்த போது ப்ரோ கோட் பெயரைப் பயன்படுத்தத் தடுக்கக்கூடாது என அந்த மதுபான நிறுவனத்துக்கு மூன்று மாதம் இடைக்காலத் தடை விதித்து உத்தரவிடப்பட்டது. இந்த வழக்கு தற்போது மீண்டும் விசாரணைக்கு வந்தது. அப்போது ரவி மோகன் தரப்பில் ஏற்கனவே நீதிமன்ற பிறப்பித்த உத்தரவை மீறி செயல்படுவதாக டெல்லி மதுபான நிறுவனத்திற்கு எதிராக ரநீதிமன்ற அவமதிப்பு வழக்கு தாக்கல் செய்யப்பட்டது. 

இதையடுத்து, டிசம்பர் 15ஆம் தேதி வரை இடைக்கால உத்தரவை நீட்டித்து உத்தரவிட்டு அன்று வழக்கு விசாரணை தள்ளிவைக்கப்பட்டது. மேலும், புதிதாக தாக்கல் செய்த நீதிமன்ற அவமதிப்பு வழக்கையும் அன்றைதினம் விசாரிக்க  பட்டியலிட உத்தரவிடப்பட்டது. முன்னதாக இடைக்காலத் தடை விதித்த பின்பு டெல்லி மதுபான நிறுவனம அந்த உத்தரவிற்கு எதிராக டெல்லி உயர் நீதிமன்றத்தில் வழக்கு தாக்கல் செய்யப்பட்டது. அதில் ப்ரோ கோட் தலைப்பை ரவி மோகன் ஸ்டூடியோஸ் பயன்படுத்த இடைக்காலத் தடை விதிக்கப்பட்டது.