“ஆசிரியர்களும் பேராசிரியர்களும் குடிநீர் தொட்டிகளைப் போன்றவர்கள்” - ரஜினிகாந்த்

கல்வி சேவைக்காக பத்ம ஸ்ரீ விருது பெற்ற மறைந்த கல்வியாளர் மற்றும் ஒய்.ஜி.பார்த்தசாரதியின் மனைவியுமான ராஜெலட்சுமி பார்த்தசாரதியின் நூற்றாண்டு விழா சென்னையில் நடைபெற்றது. இதில் விழா ஏற்பாட்டாளர்கள் ராஜலெட்சுமியின் மகனும் நடிகருமான ஒய்.ஜி.மகேந்திரன் உள்ளிட்ட அவரது குடும்பத்தினர் கலந்து கொண்டனர். மேலும் வேல்ஸ் குழும நிறுவனர் ஐசரி கணேஷ், லதா ரஜினிகாந்த் உள்ளிட்ட பல்வேறு பிரபலங்களும் கலந்து கொண்டனர்.

விழாவில் பழம்பெரும் நடிகை வைஜெயந்தி மாலாவுக்கு கலாச்சார விருது கொடுக்கப்பட்டது. இதனை சிறப்பு விருந்தினராக கலந்து கொண்ட ரஜினிகாந்த் வைஜெயந்தி மாலாவுக்கு வழங்கினார். அப்போது பேசிய அவர், “ஒய்.ஜி. பார்த்தசாரதி, தனது பள்ளிக்கு ஆசிரியர்களை கவனமாகத் தேர்ந்தெடுப்பார். ஆசிரியர்களும் பேராசிரியர்களும் குடிநீர் தொட்டிகளைப் போன்றவர்கள். அவர்கள் ஆரோக்கியமாக இருந்தால் தான் மாணவர்களுக்கு அரோக்கியமான தண்ணீரை வழங்க முடியும்” என்றார்.
  
விருது வென்ற வைஜெயந்தி மாலா பேசுகையில், “ராஜா அம்மா என் அத்தை மட்டுமல்ல, பல வழிகளில் எனக்கு வழிகாட்டியாக இருந்தார். நான் அவரை மிகவும் போற்றுகிறேன், மதிக்கிறேன்” என்றார்.