“பல முறை வேண்டுகோள் வைத்தும் பலனளிக்கவில்லை” - பின்வாங்கிய பிரதீப் ரங்கநாதன் படக்குழு

பிரதீப் ரங்கநாதன் தற்போது இரண்டு படங்களில் நடித்து முடித்துள்ளார். விக்னேஷ் சிவனின் ‘லவ் இன்சூரன்ஸ் கம்பெனி’ மற்றும் அறிமுக இயக்குநர் கீர்த்திஸ்வரன் இயக்கும் ‘டியூட்’. இதில் லவ் இன்சூரன்ஸ் கம்பெனி’(எல்.ஐ.கே) படத்தை செவன் ஸ்க்ரீன் ஸ்டூடியோஸ் மற்றும் ரௌடி பிக்சர்ஸ் நிறுவனங்கள் இணைந்து தயாரிக்கின்றன. க்ரித்தி ஷெட்டி கதாநாயகியாக நடித்திருக்க எஸ்.ஜே. சூர்யா, மிஷ்கின், யோகிபாபு ஆகியோர் முக்கியக் கதாபாத்திரங்களில் நடித்துள்ளனர். அனிருத் இசையமைத்துள்ள இப்படத்தின் டீசர் சமீபத்தில் வெளியாகி நல்ல வரவேற்பை பெற்றது. 

டியூட் படம் பொறுத்தவரை மைத்ரி மூவி மேக்கர்ஸ் நிறுவனம் தயாரித்திருக்க மமிதா பைஜு நாயகியாக நடித்துள்ளார். சரத்குமார் முக்கிய கதாபாத்திரத்தில் நடித்துள்ளார். இளம் இசையமைப்பாளர் சாய் அபயங்கர் இசையமைத்துள்ளார். இவரது இசையில் படத்தின் முதல் பாடலாக வெளியான ‘ஊரும் ப்ளட்’ பாடல் நலல் வரவேற்பை பெற்றது. அடுத்து வெளியான ‘நல்லாரு போ’, ‘சிங்காரி’ பாடல் போதிய வரவேற்பை பெறவில்லை. 

இந்த இரண்டு படங்களுமே தீபாவளி வெளியீடாக அக்டோபர் 17ஆம் தேதி வெளியாகும் என முன்பு அறிவிக்கப்பட்டது. ஆனால் அதற்கு வாய்ப்பு கம்மி என திரை வட்டாரங்கள் தெரிவித்தன, இருப்பினும் இரண்டு படக்குழுவும் அதில் உறுதியாக இருப்பதாக சொல்லப்பட்டது. இந்த நிலையில் ‘எல்.ஐ.கே’ படம் தீபாவளி ரேஸில் இருந்து தள்ளி போகிறது. இது தொடர்பாக அப்படத்தின் தயாரிப்பு நிறுவனங்கள் சார்பில் வெளியிடப்பட்டுள்ள அறிக்கையில், “இரண்டு ரயில்கள் ஒரே பாதையில், எதிரெதிர் திசையில் வேகமாக பாய்ந்து வந்தால், அது பேராபத்தில் தான் முடியும். எனவே அதை தவிர்க்கும் பொருட்டு, மைத்ரி மூவிஸ் தயாரிப்பில் இளம் இயக்குநர் கீர்த்திஸ்வரன் அறிமுகமாகும் 'டூட்' படத்துக்கு வழிவிட நாங்கள் முடிவு செய்துள்ளோம். எங்கள் ஹீரோ பிரதீப் ரங்கநாதனுக்கு இந்த தீபாவளி மிகப்பெரிய ப்ளாக்பஸ்டராக அமைய வாழ்த்துகிறோம்.

எங்கள் படத்துக்கு வழிவிட்டு வேறொரு தேதியில் 'டூட்' படத்தை ரிலீஸ் செய்யச்சொல்லி மைத்ரி மூவிஸ் நிறுவனத்திடம் பலமுறை வேண்டுகோள் வைத்தும் அது பலனளிக்கவில்லை. மேலும், தற்போது திரைப்படத்துறை மற்றும் திரையரங்குகள் எதிர்கொள்ளும் சவால்களை கருத்தில் கொண்டு, இரண்டு படங்களின் வசூலுக்கும் எந்தவித பாதிப்பும் ஏற்படக்கூடாது என நாங்கள் விரும்புகிறோம். எனவே அன்பின் அடையாளமாக. எங்கள் திரைப்படத்தை 2025 டிசம்பர் 18 ஆம் தேதி வியாழக்கிழமை அன்று வெளியிட முடிவு செய்துள்ளோம். எங்கள் டீசருக்கு கொடுத்த மாபெரும் வரவேற்புக்கு நன்றி தெரிவிக்கிறோம். இதே ஆர்வத்துடன் படம் வெளியாகும் வரை காத்திருக்கும்படி கேட்டுக் கொள்கிறோம். வரும் வாரங்களில் படம் குறித்த பல புதிய அப்டேட்கள், பாடல்கள் உங்களைத் தேடி வரவிருக்கின்றன” எனக் குறிப்பிட்டுள்ளனர்.