பிரதீப் ரங்கநாதன் சொன்ன வார்த்தை - கண்கலங்கிய இயக்குநர்

பிரதீப் ரங்கநாதன், மமிதா பைஜூ நடிப்பில் அறிமுக இயக்குநர் கீர்த்திஸ்வரன் இயக்கத்தில் உருவாகியுள்ள படம் ‘டியூட்’. மைத்ரி மூவி மேக்கர்ஸ் தயாரித்துள்ள இப்படத்தில் மமிதா பைஜு நாயகியாக நடித்திருக்க சரத்குமார் முக்கிய கதாபாத்திரத்தில் நடித்துள்ளார். இளம் இசையமைப்பாளர் சாய் அபயங்கர் இசையமைத்துள்ளார். இவரது இசையில் படத்தின் முதல் பாடலாக வெளியான ‘ஊரும் ப்ளட்’ பாடல் நல்ல வரவேற்பை பெற்றது. மற்ற பாடல்கள் போதிய வரவேற்பை பெறவில்லை. இப்படம் தீபாவளியை முன்னிட்டு அக்டோபர் 17ஆம் தேதி வெளியாகிறது. 

இந்த நிலையில் படத்தின் புரொமோஷ்னல் நிகழ்ச்சி சென்னையில் ஒரு தனியா கல்லூரி வளாகத்தில் நடைபெற்றது. இதில் படக்குழுவினர் கலந்து கொண்டு தங்களது அனுபவங்களை பகிர்ந்து கொண்டனர். அந்த வகையில் பிரதீப் ரங்கநாதன் இயக்குநர் கீர்த்திஸ்வரன் குறித்து பேசுகையில், “லவ் டுடே படத்திற்கு பின்பு நிறைய கதை வந்தது. அப்படி கதை வரும் போது கதையின் சுருக்கத்தை மெயில் பன்னிடுங்கன்னு சொல்லிடுவேன். இந்த படத்தின் கதை சுருக்கத்தை கேட்ட போது நன்றாக இருந்தது. அப்போது எல்.ஐ.கே. கமிட்டாகியிருந்தேன். டிராகன் கமிட்டாகவில்லை. திரும்பவும் லவ் ஸ்டோரி பன்னனுமா என யோசித்தேன். பின்பு ரிஸ்க் எடுக்க வேண்டாம் என ரிஜெக்ட் பண்ணிவிட்டேன்.

ஆனால் வேறொரு இடத்தில் இருந்து கீர்த்தின்னு ஒரு பையன் உங்களுக்கு கதை சொல்லனும்னு கால் வந்தது. அவரிடம் ஏற்கனவே கதை கேட்டுவிட்டேன், வேண்டாம் என சொன்னேன். ஆனால் தொடர்ந்து கால் வந்துக்கொண்டே இருந்தது. எல்லா காலிலும் கீர்த்தின்னு ஒரு பையன்... கீர்த்தின்னு ஒரு பையன்... என சொல்ல ஆரம்பிப்பாங்க. அப்படி ஒரு முறை மைத்ரி மூவி மேக்கர்ஸ் ஆஃபிஸ்ல இருந்து கால் வந்தது. அங்கேயும் கீர்த்தின்னு ஒரு பையன்னு ஆரம்பிச்சாங்க. அவங்களிடம் நான் ஏற்கனவே கதை கேட்டதை சொல்லவில்லை. மைத்ரி பெரிய நிறுவனம் என்பதால் சரி ஓகே டைரக்டர வர சொல்லுங்கன்னு சொல்லிட்டேன். 

அதைத்தாண்டி நம்ம வேணான்னு சொல்லியும் நம்ம தான் வேணும்னு ஒருத்தன் சொல்றானே யார்ரா அவன், அவனை பார்த்தே ஆகனும்னு எனக்கு ரொம்ப ஆசை. பார்த்தா தினுசா ஒரு கேரக்டர் வந்தது. சட்டையெல்லாம் லூசா விட்டுவிட்டு ஒருத்தன் வந்தான். அவர்கிட்ட நான் ஏன் நடிக்கனும்னு கேட்டேன். லவ் டுடே படம் பார்த்தேன், எனக்கு ரொம்ப புடிச்சிருந்துச்சு, இந்த கதையில நீங்க பண்ணா நல்லாருக்கும்னு நினைக்கிறேன்னு சொன்னார். அதோடு எனக்கேத்த மாதிரி சில விஷயங்களை மாத்தியதாகவும் சொன்னார். இதை நம்பலாமா வேண்டாமான்னு கொஞ்சம் டவுட் இருந்துச்சு. அப்புறம் கதை கேட்டேன். சூப்பரா சொன்னார். எனக்கும் பிடிச்சிருந்துச்சு. ஆனா திரும்பவும் அதே லவ் ஸ்டோரியான்னு ஒரு யோசனை இருந்துச்சு. அதனால அப்புறம் பன்லாம்னு சொல்லிட்டேன்.

ஆனால் அடுத்த நாள் புரொடியூஸர கூட்டு வந்துட்டார். இது லவ் ஸ்டோரி இல்லைன்னு என்கிட்ட எல்லாத்தையும் விளக்கி சொன்னார். இருந்தும் எனக்கு அந்த யோசனை இருந்துகிட்டே இருந்துச்சு. திரும்பவும் வேணான்னு சொல்லிட்டேன். ஆனா அதுக்கப்புறம் 6 மாசம் ஆச்சு. இடையில அந்தக் கதை மனசுக்குள்ள ஓடிட்டே இருந்துச்சு. கனவில் கூட சில டயலாக்குகள் வந்துச்சு. அதனால அந்த டைரக்டர கேளுங்கன்னு என் டீமிடம் சொன்னேன். அவர் வேறு யாரையோ கமிட் செய்துவிட்டதாக பதில் வந்துச்சு. அப்புறம் அது தள்ளிப் போகுதுன்னு நம்ம பன்லாம் என கீர்த்தி சொன்னார். அப்பவும் எனக்கு அந்த யோசனை இருந்துச்சு. ஆனா என்னைய நம்புங்கன்னு கீர்த்தி சொன்னார். அவர் சொன்னது கோமாளி டைம்ல என்னைய் பார்த்த மாதிரியே இருந்துச்சு. ஒரு விஷயத்தை சாதிக்கனும்னா எந்த எல்லைக்கும் போலாம் அப்படிங்குற விஷயம் அவர்கிட்ட பார்த்தேன். அப்பதான் இவரை நம்பலாம் என நடிக்க ஒத்துக்கிட்டேன். அன்னையில இருந்து இப்ப வரையும் அவரை தம்பி மாதிரி தான் பார்க்குறேன்” என்றார். உடனே கீழே அமர்ந்திருந்த கீர்த்திஸ்வரன் கண்கலங்கினார். தொடர்ந்து பேசிய பிரதீப், ஷூட்டிங் போகும் போதுதான் நம்ம நம்புனது தப்பில்லன்னு தெரிஞ்சுச்சு. அந்தளவு திறமையான ஆள். என் படத்துல கூட டயலாக் எழுதித்தர கேட்டிருக்கிறேன். ஓகேன்னு சொல்லியிருக்கார். ஒரு பெரிய டைரக்டர் தமிழ் சினிமாவுக்கு வரப் போறாங்க. இதை பெருமையாகவே சொல்றேன்” என்றார்.