கையில் துப்பாக்கியுடன் புது கெட்டப்பில் நயன்தாரா!

'கே.ஜி.எஃப்' படம் மூலம் இந்தியா முழுவதும் பிரபலமான யஷ், 'கே.ஜி.எஃப் 2'-க்குப் பிறகு மலையாள இயக்குநர் கீது மோகன் தாஸ் இயக்கத்தில் ‘டாக்சிக்’ படத்தில் நடித்து வருகிறார். இப்படம், கோவாவில் போதைப் பொருள் நடத்தும் ஒரு கும்பலை மையப்படுத்தி ஒரு ஆக்‌ஷன் நிறைந்த படமாக இருக்கும் எனக் கூறப்படுகிறது. இதில் கியாரா அத்வானி, ஹூமா குரேஷி, நயன்தாரா உள்ளிட்ட பலர் நடிக்கிறார்கள். இப்படத்தின் படப்பிடிப்பு கோவாவில் தொடங்கி மும்பை, கர்நாடகா என பல்வேறு இடங்களில் நடந்தது. 

இப்படத்தில் இருந்து கடந்த யஷ் பிறந்தநாளான ஜனவரி 8ஆம் தேதி வாழ்த்து வீடியோவை படக்குழுவினர் வெளியிட்டனர். அதில் போதைப்பொருள் மற்றும் மது அருந்தும் கிளப்பிற்கு யஷ் செல்லும் காட்சி இடம் பெற்றிருந்தது. இப்படம் ஒரே சமயத்தில் கன்னடம் மற்றும் ஆங்கிலத்தில் படமாக்கப்பட்டு வருவதாகவும் வெளியாகும் போது தமிழ், தெலுங்கு, இந்தி, மலையாளம் என பல்வேறு இந்திய மொழிகளிலும் மற்றும் பல்வேறு வெளிநாட்டு மொழிகளிலும் வெளியாகவுள்ளதாகவும் திரை வட்டாரங்கள் தெரிவிக்கின்றன. படம் வரும் மார்ச் 19ஆம் தேதி வெளியாகிறது. 

இப்படம் குறித்து பல மாதங்களாக அப்டேட் எதுவும் இல்லாமல் இருந்த நிலையில் சமீப வாரங்களில் கதாப்பாத்திர போஸ்டர் மற்றும் அவர்களின் பெயர்கள் வெளியிடப்பட்டு வருகிறது. முதலில் கியாரா அத்வானி போஸ்டர் வெளியிடப்பட்டது. இவர் நடியா என்ற கதாபாத்திரத்தில் நடித்துள்ளதாக தெரிவிக்கப்பட்டது. இவரைத் தொடர்ந்து ஹூமா குரேஷி எலிசபெத் என்ற கதாபாத்திரத்தில் நடித்துள்ளதாக அவரது போஸ்டர் வெளியிடப்பட்டது. இந்த வரிசையில் தற்போது நயன்தாரா கதாபாத்திர போஸ்டர் வெளியிடப்பட்டுள்ளது. இவர் கங்கா என்ற கதாபாத்திரத்தில் நடிப்பதாக தெரிவிக்கப்பட்டுள்ளது. போஸ்டரில் நயன்தாரா கையில் துப்பாக்கியுடன் ஸ்டைலிஷான கெட்டப்பில் வருகிறார்.