மறைந்த பாடகி வாணி ஜெயராமின் நினைவாக இசைத் தொகுப்பு வெளியீடு

காலத்தைத் தாண்டி நம்முடன் பயணிக்கும் சில குரல்கள் உண்டு. அவை  நம்முள் ஒரு தாக்கத்தை மட்டும்  உருவாக்குவது அல்ல, வாழ்நாள் துணையாகவே மாறிவிடும். நம் ஆனந்தம், துயரம், சொல்ல முடியாத ஏக்கம் — எல்லாவற்றிலும் அவை ஒலித்துக்கொண்டே இருக்கும். வாணி ஜெயராம் அவர்களின் குரல் அப்படிப்பட்ட ஒரு அரிய பொக்கிஷம்.

அவரின் மறைவின் மூன்றாம் ஆண்டு நினைவாக, விஸ்வராகாம் – பாகம் 2  ஒரு பணிவான நினைவஞ்சலியாக சமர்ப்பிக்கப்படுகிறது. இசையில் அவர் வெளிப்படுத்திய அதே நயமும், உண்மையும், இந்த ஆல்பத்தின் ஒவ்வொரு நொடிகளிலும் பிரதிபலிக்கின்றன. இந்த இசைத் தொகுப்பின் மையத்தில், தென்னிந்திய சினிமாவின் உணர்ச்சிப் பிம்பத்தை உருவாக்கிய இசையமைப்பாளர் எம்.எஸ்.விஸ்வநாதன் அவர்களுக்கு  மரியாதை செலுத்தப்பட்டது. தலைமுறைகளைத் தாண்டி வாழும் அவரது மெட்டுகள், இன்றும் நினைவுகளில் இசைக்கின்றன.

இந்த நினைவஞ்சலி, இந்த இரு இசை மகத்துவங்களின் நிலைத்த பாரம்பரியத்தை கொண்டாடும் வகையில், கருத்தாக்கம், எழுத்து, தயாரிப்பு ஆகிய அனைத்தையும் சுமதி ராம் வடிவமைத்துள்ளார். இந்தத் தொகுப்பில், வாணி ஜெயராமின் பாடல்களை எஸ்.பி. பாலசுப்பிரமணியமின் குரல் அழகாக சமநிலைப்படுத்துகிறது. அவரது பாடல், இசைக்கு மேலும் ஆழத்தையும் நிறைவும் சேர்க்கிறது. இந்த முழு இசை அனுபவமும் எம்.எஸ்.வி-வின் கைத்தேர்ந்த இசையமைப்பின் கீழ்
ஒரே ஓட்டமாக ஒன்றிணைகிறது.

விஸ்வராகம் பாகம் 2, ஹைக்கூ பாணியில் அமைந்த இசை வடிவங்களாக விரிகிறது. சுருக்கமான இந்தப் படைப்புகள், மெட்டுக்கும் மௌனத்துக்கும் இடையே ஒரு நுண்ணிய, அழகான சமநிலையை உருவாக்குகின்றன. இந்த இசை தொகுப்பு தற்போது யூட்யூப், ஸ்பாட்டிஃபை மற்றும் டீசெர் தளங்களில் கிடைக்கிறது. வாணி ஜெயராமின் குரலுக்கான மரியாதை அஞ்சலியாக மட்டுமல்லாமல்,  உயர்ந்த இடத்தைப் பெறும் இசை உருவாக்க மரபிற்கும் மரியாதை செலுத்தும் நோக்கில், மாதந்தோறும் புதிய வெளியீடுகள் திட்டமிடப்பட்டுள்ளன.