“பார்த்து பழக ஆரம்பித்த நாளிலிருந்து...” - துணை முதல்வர் குறித்து மாரி செல்வராஜ்

துணை முதல்வர் உதயநிதி ஸ்டாலின் இன்று பிறந்தநாள் காண்கிறார். இதனையொட்டி அரசியல் தலைவர்கள், திரை பிரபலங்கள் உள்ளிட்ட பலர் வாழ்த்து தெரிவித்து வருகின்றனர். அந்த வகையில் உதயநிதியின் அப்பாவும் தமிழக முதல்வருமான ஸ்டாலின், “கொள்கைப் பற்றோடு உழைப்பிலும் உயர்ந்து வரும் உதயநிதிக்குப் பிறந்தநாள் வாழ்த்துகள்!

இளைஞரணிச் செயலாளராக - விளையாட்டுத் துறை அமைச்சராக - துணை முதலமைச்சராக நீ ஆற்றிவரும் பணிகளை மக்களும் கழகத்தினரும் பாராட்டிச் சொல்வதைக் கேட்கும்போது தந்தையாக மட்டுமல்ல தலைவனாக மகிழ்ச்சி அடைகிறேன்! திராவிட முன்னேற்றக் கழகத்தின் தலைமைத் தொண்டனாக நான் உனக்கு அறிவுறுத்துவது, 

காட்சிக்கு எளியனாக, கடுஞ்சொல் சொல்லாதவனாக, மக்களின் அன்புக்குரியவனாக,எப்போதும் அவர்களுக்காகக் களத்தில் நிற்பவனாக நீ திகழ வேண்டும். இளைஞர்களிடம் திராவிட இயக்கக் கருத்தியலைத் தொடர்ந்து விதைத்து, அவர்களுக்கு எடுத்துக்காட்டாகத் திகழ வேண்டும்” என தனது எக்ஸ் பக்கத்தில் குறிப்பிட்டுள்ளார்.  

இதையடுத்து நடிகரும் ம.நீ.ம. தலைவருமான கமல்ஹாசன், “தமிழ்நாடு துணை முதல்வர், எப்போதும் இனியவர், என் அன்பிற்குரிய இளவல் உதயநிதி ஸ்டாலின் நீடு வாழ்க. பொன்றாப் புகழுடனும் குன்றாப் பெருமையோடும்  நிலைத்து வளர்க” என தனது எக்ஸ் பக்கம் வாயிலாக வாழ்த்து தெரிவித்துள்ளார். 

பின்பு திரைப்பட இயக்குநர் மாரி செல்வராஜ், “பார்த்து பழக ஆரம்பித்த நாளிலிருந்து இன்று வரை என்றைக்குமான பேரன்பையும் பெரும் மகிழ்ச்சியையும் எனக்கு அள்ளித்தரும் தமிழ்நாட்டின் துணை முதல்வர் உதயநிதி ஸ்டாலினுக்கு என் இனிய பிறந்தநாள் வாழ்த்துக்களை தெரிவித்துகொள்கிறேன்” என தனது எக்ஸ் பக்கத்தில் குறிப்பிட்டுள்ளார் . உதயநிதி நடித்த கடைசிப் படமான மாமன்னன் படத்தை மாரி செல்வராஜ் இயக்கியிருந்தார் என்பது குறிப்பிடத்தக்கது.