“சினிமாவை காப்பாற்ற ஒன்றிணைவோம்” - கார்த்திக் சுப்புராஜ்

இயக்குநர் கார்த்திக் சுப்புராஜ் கடைசியாக சூர்யாவை வைத்து ரெட்ரோ படத்தை இயக்கியிருந்தார். இப்போது சீக்யா எண்டர்டெயின்மெண்ட் தயாரிப்பில் ஒரு படம் இயக்கி வருகிறார். இதனிடையே தயாரிப்பாளராக இயக்குநர் ரத்ன குமார் இயக்கும் ‘29’ எனும் படத்தை தயாரித்து வருகிறார்.  

இந்த நிலையில் சமீகாலமாக தமிழ் சினிமாவில் நடக்கும் நிகழ்வுகள் குறித்து அவர் ஒரு எமோஷ்னலாக ஒரு பதிவை வெளியிட்டுள்ளார். அவர் வெளியிட்டுள்ள ஃபேஸ் புக் பதிவில், “ஒரு சினிமா ரசிகனாக சில எண்ணங்கள்... குறைந்த பட்ஜெட் கொண்ட ஒரு சுயாதீனப் படமான சல்லியர்களுககு திரையரங்குகள் கிடைக்கவில்லை, நாளை வெளியாகவிருந்த விஜய் சார் போன்ற ஒரு உச்ச நட்சத்திரத்தின், பெரிய பட்ஜெட் படமான ஜனநாயகனுக்கு தணிக்கைத் தாமதம் காரணமாக வெளியீடு தள்ளிப்போகிறது. நாளை மறுநாள் வெளியாகவிருக்கும் மற்றொரு பெரிய பட்ஜெட் படமான பராசக்தி படத்திற்கு சான்றிதழ் வழங்குவதில் உள்ள சிக்கல் காரணமாக பல திரையரங்குகளில் முன்பதிவுகள் இன்னும் தொடங்கப்படவில்லை. சினிமாவிற்கு இது ஒரு கடினமான காலம்!

சுயாதீன, குறைந்த பட்ஜெட் படங்களுக்கு திரையரங்குகள் அதிக ஆதரவளிக்க வேண்டும். ஏனெனில் பெரிய சாட்டிலைட் மற்றும் ஓடிடி நிறுவனங்கள் சுயாதீனப் படங்களை வாங்க அந்தளவு ஆர்வம் காட்டுவதில்லை. இதனால் குறைந்த பட்ஜெட் படங்களுக்கு வருவாய்க்கான ஒரே ஆதாரமாக திரையரங்குகள் மட்டுமே இருக்கிறது. குறைந்த பட்ஜெட் படங்களுக்கு திரையரங்குகள் ஒதுக்காமல் இருப்பது சினிமாவை அழிப்பதற்குச் சமம். பெரிய பட்ஜெட் படங்களுக்கு... (இந்தியா மற்றும் வெளிநாடுகளில்) தணிக்கைக்கான கடுமையான காலக்கெடு விதிகளைப் பின்பற்றுவது மிகவும் கடினமாக உள்ளது. இது குறிப்பாக வெளியீட்டுத் தேதி ஏற்கனவே அறிவிக்கப்பட்ட ஒரு பெரிய பட்ஜெட் படத்தை உருவாக்கும்போது, ​​பிந்தைய தயாரிப்புப் பணிகளில் இயக்குநரின் படைப்புச் சுதந்திரத்தில் பெரும் அழுத்தத்தை ஏற்படுத்துகிறது. இந்திய மற்றும் வெளிநாட்டு தணிக்கைகளுக்கான தற்போதைய காலக்கெடு விதிகளின்படி, ஒரு படம் முழுமையாக முடிப்பதற்கு 3 மாதங்கள் ஆகும். இது பட வெளியீட்டு தேதிற்கு முன்னதாக கணக்கிடப்படுகிறது. இது சாத்தியமில்லை. அதற்கு ஏகப்பட்ட காரணங்கள் இருக்கிறது. 

இது சீரமைக்கப்பட்டு, திரைப்படத் தயாரிப்பாளர்களுக்கு சற்று எளிதாக்கப்பட வேண்டும். தணிக்கை வாரியம், தயாரிப்பாளர்கள் மற்றும் நட்சத்திரங்கள் என அனைவரிடமிருந்தும் இது நடக்க வேண்டும். இல்லையெனில், பண்டிகை நாட்களில் பெரிய படங்கள் தள்ளிப்போவது இறுதியில் இந்தத் துறையையே அழித்துவிடும்! தயவுசெய்து, திரைப்படத் துறையில் உள்ள நாம் அனைவரும் ரசிகர் சண்டைகள், அரசியல் காரணங்கள், தனிப்பட்ட நிகழ்ச்சி நிரல்கள், வெறுப்புப் பிரச்சாரங்கள் ஆகியவற்றை ஒதுக்கி வைத்துவிட்டு, இந்த கலையைக் காப்பாற்ற, சினிமாவை காப்பாற்ற ஆக்கப்பூர்வமான ஒன்றைச் செய்ய ஒன்றிணைவோம்” என தனது ஃபேஸ்புக் பக்கத்தில் குறிப்பிட்டுள்ளார்.