இறுதியில் வெளியாகும் முதல் படம்

கார்த்தி நடிப்பில் இந்தாண்டு இதுவரை ஒரு படம் கூட வெளியாகவில்லை. அவர் கேமியோவாக தெலுங்கில் நடித்த ‘ஹிட் 3’ படம் மட்டும் கடந்த மே 1ஆம் தேதி வெளியானது. இப்போது அவர் வா வாத்தியார், சர்தார் 2 மற்றும் மார்ஷல் ஆகிய படங்களை வைத்துள்ளார். இதில் வா வாத்தியார் படம் நீண்ட காலமாக தயாரிப்பில் இருக்கிறது. சர்தார் 2, வரும் தீபாவளிக்கு வெளியாகும் எனத் தெரிவிக்கப்பட்டது. ஆனால் அது தற்போது அடுத்த ஆண்டுக்கு தள்ளிப் போவதாக கூறப்படுகிறது. மார்ஷல் படத்தின் பணிகள் நடந்து வருகிறது.  

இந்த நிலையில் ‘வா வாத்தியார்’ படம் வருகின்ற டிசம்பரில் ரிலீஸாகும் என சமீபத்தில் அறிவிப்பு வெளியானது. இப்படத்தை நலன் குமாரசாமி இயக்க கார்த்திக்கு ஜோடியாக தெலுங்கு இளம் நடிகை க்ரித்தி ஷெட்டி நடித்துள்ளார். மேலும் ராஜ்கிரண், சத்யராஜ், ஜி.எம்.சுந்தர் உள்ளிட்டோர் முக்கிய கதாபாத்திரத்தில் நடித்துள்ளனர். ஸ்டுடியோ கிரீன் தயாரிக்கும் இப்படத்திற்கு சந்தோஷ் நாராயணன் இசையமைத்துள்ளார். படத்தின் ஃபர்ஸ்ட் லுக் போஸ்டர் கடந்த ஆண்டு மே மாதம் வெளியானது. அதில் போலீஸ் கெட்டப்பில் கார்த்தி இடம் பெற்றிருந்தார். இதையடுத்து கடந்த ஆண்டு நவம்பரில் படத்தின் டீசர் வெளியானது. அதை பார்க்கையில் எம்.ஜிஆர். ரசிகராக கார்த்தி நடித்துள்ளது தெரிந்தது. பின்பு படத்தின் ஃபர்ஸ்ட் சிங்கிள் ‘உயிர் பத்திக்காம’ பாடல் கடந்த பிப்ரவரியில் வெளியாகியிருந்தது. இப்படத்தின் அறிவிப்பு 2023ஆம் ஆண்டு வெளியாகியிருந்த நிலையில் அதற்கடுத்து ஒவ்வொரு அப்டேட்டும் தாமதமாகவே வெளியாகி வருகிறது. 

இந்த நிலையில் டிசம்பரில் எந்த தேதியில் வெளியாகும் என்ற அறிவிப்பு தற்போது வெளியாகியுள்ளது. அதன்படி டிசம்பர் 5ஆம் தேதி இப்படம் வெளியாகவுள்ளதாக தெரிவிக்கப்பட்டுள்ளது. இது தொடர்பாக வெளியிடப்பட்டுள்ள போஸ்டரில் கார்த்தி சில்லவுட்டில் கையில் சவுக்குடன் நின்றிருக்க பின்னணியில் கூட்டம் ஆர்ப்பரிக்கிறது. படத்தின் டிரெய்லர் மற்றும் இசை வெளியீடு குறித்த அறிவிப்புகளும் விரைவில் வெளியாகவுள்ளது.