இளையராஜா வழக்கு; பல்டி அடித்த தயாரிப்பு நிறுவனம்

மைத்ரி மூவி மேக்கர்ஸ் நிறுவனம் தயாரிப்பில் பிரதீப் ரங்கநாதன், மமிதா பைஜூ நடிப்பில் கடந்த தீபாவளியை முன்னிட்டு வெளியான படம் ‘டியூட்’. இப்படத்தில் இளையராஜாவின் ‘கருத்த மச்சான்’ மற்றும் ‘நூறு வருஷம் இந்த மாப்பிள்ளையும் பொண்ணும்தான்’ பாடல்கள் பயன்படுத்தப்பட்டிருந்தது. ஆனால் அதற்கு அனுமதி பெறவில்லை எனக் கூறி அதை நீக்க இளையராஜா டியூட் படத்திற்கு எதிராக சென்னை உயர்நீதி மன்றத்தில் வழக்கு தொடர்ந்தார். 

இந்த வழக்கு, விசாரணைக்கு வந்த போது, நீதிபதி செந்தில்குமார் படத்தில் இளையராஜா பாடல்களை உருமாற்றி பயன்படுத்தியற்கு முகாந்திரம் இருப்பதாகக் கூறி பாடல்களை பயன்படுத்த இடைக்கால தடை விதித்தும் பாடல்களை நீக்கவும் உத்தரவிட்டார். இந்த உத்தரவை எதிர்த்து மைத்ரி மூவி மேக்கர்ஸ் நிறுவனம் மனுத் தாக்கல் செய்திருந்தது. ‘குட் பேட் அக்லி’ திரைப்படத்தில் இடம்பெற்ற பாடல்களின் உரிமையை, சோனி நிறுவனத்திடம் இருந்து பெற்று பயன்படுத்தியதாகவும், தற்போது இளையராஜா பாடல்களை ‘குட் பேட் அக்லி’ திரைப்படத்தில் இருந்து நீக்கி இருப்பதாகவும் தெரிவிக்கப்பட்டது.

இந்த மனு நீதிபதி செந்தில்குமார் முன்பு மீண்டும் விசாரணைக்கு வந்தது. அப்போது மைத்ரி மூவி மேக்கர்ஸ் நிறுவனம் தரப்பில், இளையராஜாவின் பாடல்களை நாங்கள் பயன்படுத்த மாட்டோம் என உறுதியளித்தனர். இதைப் பதிவு செய்து கொண்ட நீதிபதி வழக்கை முடித்து வைத்து உத்தரவிட்டார். 

முன்னதாக இளையராஜா தொடர்ந்த வழக்கும் முடித்து வைக்கப்பட்டது. அப்போது தயாரிப்பு நிறுவனம் சார்பில் இளையராஜாவுக்கு உரிய இழப்பீடு வழங்கப்பட்டுள்ளதாகவும், பாடலை பயன்படுத்தியதற்காக படத்தில் நன்றி தெரிவிக்கப்படும் என்றும் தெரிவிக்கப்பட்டது. மேலும் இரு தரப்புக்கும் சமரசம் ஏற்பட்டு விட்டதால் வழக்கை முடித்து வைக்க கோரிக்கை வைக்கப்பட்டது குறிப்பிடத்தக்கது.