இளையராஜாவுக்கு எதிரான வழக்கு - தள்ளுபடி செய்த நீதிமன்றம்

ஆதிக் ரவிச்சந்திரன் - அஜித் கூட்டணியில் கடந்த ஏப்ரல் 10ஆம் தேதி வெளியான படம் ‘குட் பேட் அக்லி’. மைத்ரி மூவி மேக்கர்ஸ் தயாரித்திருந்த இப்படத்தில் த்ரிஷா, பிரசன்னா, அர்ஜுன் தாஸ், யோகிபாபு உள்ளிட்ட பலர் நடித்திருந்தனர். ஜி.வி. பிரகாஷ் இசையமைத்திருந்த இப்படம் ரசிகர்கள் மத்தியில் கலவையான விமர்சனங்களை பெற்றது. 

இந்த படத்தில் இளையராஜாவின் ‘ஒத்த ரூபாயும் தாரேன், என் ஜோடி மஞ்ச குருவி, இளமை இதோ இதோ’ உள்ளிட்ட பாடல்கள் இடம் பெற்றிருந்தது. இப்பாடல்களை தன்னுடைய அனுமதியின்றி பயன்படுத்தியதாகவும் அதற்கு நஷ்ட ஈடாக ரூ.5 கோடி தர வேண்டும் என்றும், இளையராஜா தரப்பில் படத்தின் தயாரிப்பு நிறுவனத்திற்கு நோட்டீஸ் அனுப்பப்பட்டது. இளையராஜா நோட்டிஸிற்கு தயாரிப்பு நிறுவனம் சார்பில் பதில் நோட்டிஸ் அனுப்பப்பட்டது. அதில் சட்டப்பூர்வமான உரிமையாளர்களிடம் இருந்து பாடல்களுக்கு அனுமதி பெற்றுள்ளதாக தெரிவிக்கப்பட்டது. ஆனால் அந்த உரிமையாளர் யார் என்பதை தயாரிப்பு நிறுவனம் தெரிவிக்கவில்லை என இளையராஜா தரப்பில் சென்னை உயர் நீதிமன்றத்தில் மனு தாக்கல் செய்யப்பட்டது. இந்த வழக்கு விசாரணைக்கு வந்த போது, இளையராஜா பாடல்களை படத்தில் பயன்படுத்த இடைக்காலத் தடை விதிக்கப்பட்டது. 

நீதிமன்ற உத்தரவு பிறப்பித்தும் சில நாட்கள் படத்தில் பாடல்கள் பயன்படுத்தப்பட்டு வந்தது. இதனால் இளையராஜா, நீதிமன்ற அவமதிப்பு வழக்கு தொடர்வதாக படக்குழுவிற்கு நோட்டிஸ் அனுப்பியதை தொடர்ந்து படத்தில் பாடல்கள் நீக்கப்பட்டது. இதனிடையே நீதிமன்ற விதித்த தடையை நீக்கக் கோரி மைத்ரி மூவி மேக்கர்ஸ் நிறுவனம் நீதிமன்றத்தில் மேல்முறையீடு செய்தது. 

இந்த வழக்கு இன்று நீதிபதி செந்தில்குமார் முன்பு விசாரணைக்கு வந்தது. அப்போது இளையராஜா தரப்பில், தயாரிப்பாளர்கள் பாடல்களுக்கான உரிமையை வாங்கியதாக கூறுகிறார்கள், ஆனால் பதிப்புரிமை சட்டப்படி இளையராஜாவிடம் தான் பாடல்களுக்கான உரிமை இருக்கிறது. ஒட்டுமொத்த படத்திற்கான உரிமைதான் அந்த தயாரிப்பாளர்களிடம் இருக்கும். ஆனால் அதில் பாடல்களை மட்டும் தனியாக எடுத்து பயன்படுத்த இளையராஜாவிடம் தான் அவரக்ள் உரிமை பெற வேண்டும்’ எனத் தெரிவிக்கப்பட்டது. இதையடுத்து பேசிய நீதிபதி, ‘பாடல்களை உருமாற்றுவதை தடுக்கவும் பாடல்களை அனுமதி இன்றி பயன்படுத்துவதை தடுக்கவும் இளையராஜாவுக்கு உரிமை உண்டு. அதனால் ஏற்கனவே பிறப்பிக்கப்பட்ட தடை உத்தரவை நீக்க முடியாது’ என கூறி மனுவை தள்ளுபடி செய்து உத்தரவிட்டார்.