‘டியூட்’ பட வழக்கு; நீதிமன்றம் அதிரடி உத்தரவு

சோனி மியூசிக் நிறுவனம், எக்கோ ரெக்கார்டிங் நிறுவனம் அமெரிக்காவில் உள்ள ஓரியண்டல் ரெக்கார்ட்ஸ் ஆகிய நிறுவனங்களுக்கு எதிராக சென்னை உயர்நீதி மன்றத்தில் இசையமைப்பாளர் இளையராஜா வழக்கு தொடர்ந்திருந்தார். இந்த வழக்கு விசாரணையின் போது, இளையராஜா தரப்பில் ஆஜரான வழக்கறிஞர், டியூட் படத்தில் கூட இளையராஜாவின் இரண்டு பாடல்களை பயன்படுத்தி வருவாய் ஈட்டி வருவதாக வாதிட்டிருந்தார். இதைக்கேட்ட நீதிபதி இது தொடர்பாக இளையராஜா தனியாக வழக்கு தொடரலாம் என தெரிவித்திருந்தார். 

அதன்படி இளையராஜா டியூட் படத்திற்கு எதிராக சென்னை உயர்நீதி மன்றத்தில் வழக்கு தாக்கல் செய்தார். அந்த மனுவில், படத்தில் இடம்பெற்ற ‘கருத்த மச்சான்’ மற்றும் ‘நூறு வருஷம் இந்த மாப்பிள்ளையும் பொண்ணும்தான்’ ஆகிய பாடல்களை தனது அனுமதியின்றி பயன்படுத்தியுள்ளதாகவும் அதனை நீக்க வேண்டும் எனவும் கோரிக்கை வைத்திருந்தார். இந்த வழக்கு, விசாரணைக்கு வந்த போது, இளையராஜா தரப்பும் தயாரிப்பு நிறுவனம் தரப்பும் தங்களது வாதங்களை முன்வைத்தனர். இதைக் கேட்ட நீதிபதி, மனு மீதான உத்தரவை தேதி குறிப்பிடாமல் தள்ளி வைத்தார்.

இந்த நிலையில் இந்த வழக்கு நீதிபதி செந்தில்குமார் முன்பு விசாரணைக்கு வந்தது. வழக்கை விசாரித்த அவர், படத்தில் இளையராஜா பாடல்களை உருமாற்றி பயன்படுத்தியற்கு முகாந்திரம் இருப்பதாகக் கூறி பாடல்களை பயன்படுத்த இடைக்கால தடை விதித்தும் பாடல்களை நீக்கவும் உத்தரவிட்டார். இந்த உத்தரவை அமல்படுத்த படத் தயாரிப்பு நிறுவனம் ஏழு நாள் அவகாசம் கேட்டது.  ஆனால் அந்த கோரிக்கையை நீதிபதி நிராகரித்து விட்டார். மேலும் மனு தொடர்பாக பதிலளிக்கவும் உத்தரவிட்டார். பின்பு மனு மீதான விசாரணையை ஜனவரி 7ஆம் தேதிக்கு தள்ளி வைத்தார். ஏற்கனவே இந்த தயாரிப்பு நிறுவனம் தயாரித்த குட் பேட் அக்லி படத்தில் இளையராஜா பாடல்கள் இடம்பெற்ற நிலையில் அதனை எதிர்த்து இளையராஜா வழக்கு தொடர்ந்தார். அதிலும் பாடல்களை நீக்க தடை விதித்த நிலையில் அப்பாடல்கள் படத்தில் நீக்கப்பட்டது குறிப்பிடத்தக்கது.