‘நண்பர்கள் இல்லாமல் நானில்லை’ - ‘4 இடியட்ஸ்’ பட விழாவில் புகழ் நெகிழ்ச்சி!

தமிழ் சினிமாவின் முன்னணி தயாரிப்பு நிறுவனங்களில் ஒன்றான லக்‌ஷ்மி மூவி மேக்கர்ஸ், பல வெற்றி படங்களை தயாரித்த நிலையில், அதன் நிறுவனர்களின் மறைவுக்குப் பிறகு அந்நிறுவனம் திரைப்பட தயாரிப்பை நிறுத்தி விட்டது. இந்த நிலையில், லக்‌ஷ்மி மூவி மேக்கர்ஸ் நிறுவனர்களின் வாரிசுகள் தற்போது அதே நிறுவனத்தின் பெயரில் திரைப்படங்கள் தயாரிக்க தொடங்கியிருக்கிறார்கள். அதன்படி, லக்‌ஷ்மி மூவி மேக்கர்ஸ் நிறுவனம் சார்பில், டாக்டர்.எம்.ஸ்ரீவத்சன், எம்.கோகுல் கிருஷ்ணன் இணைந்து தயாரித்திருக்கும் படம் ‘4 இடியட்ஸ்’.

அறிமுக இயக்குநர் சஜோ சுந்தர் முருகேசன் இயக்கியிருக்கும் இப்படத்தில் குக் வித் கோமாளி மூலம் பிரபலமான புகழ் நாயகனாக நடித்திருக்கிறார். வில்லனாக முக்கிய கதாபாத்திரத்தில் ரவி மரியா நடித்திருக்கிறார். நாயகியாக பிரக்யா நயன் நடித்திருக்கிறார். இவர்களுடன் வின்செண்ட் அசோகன், கும்கி அஷ்வின், இந்திரன், திடியன் ஆகியோர் நடித்திருக்கிறார்கள்.

சுபாஷ் முனிரத்னம் இசையமைத்திருக்கும் இப்படத்தின் பாடல்களை கலைகுமார், திவ்யபரத் ரவி எழுதியிருக்கிறார். யு.கே.செந்தில்குமார் ஒளிப்பதிவு செய்ய, எம்.டி.பிரபாகரன் கலை இயக்குநராக பணியாற்றியுள்ளார். எஸ்.என்.பாசில் படத்தொகுப்பு செய்கிறார். டாவின்ஸி சரவணன் வசனம் எழுதியிருக்கிறார். 

இந்நிகழ்வில் நாயகன் புகழ் பேசியதாவது... “என்னை வாழ்த்த வந்த திரையுல ஜாம்பவான்கள் அனைவருக்கும் நன்றி. சாலிகிராமம் பிரசாத் ஸ்டூடியோ வாசலில் வாட்டர் வாஸ் பண்ணி வண்டி கழுவிக்கிட்டு இருந்தவன் நான். இன்று இந்த இடத்தில் ஹீரோவாக நிற்கிறேன். இதற்கெல்லாம் என் நண்பர்கள் தான் காரணம். என் நண்பர்கள் இல்லாமல் நானில்லை. அவர்கள் தான் எனக்கு கலக்கப்போவது யாரு வாய்ப்பை தேடி வாங்கி தந்தார்கள். அங்கிருந்து தான் நான் இங்கு வந்து நிற்கிறேன்” என்றார்

விரைவில் திரையரங்குகளில் வெளியாக உள்ள இப்படத்தின் இசை வெளியீட்டு விழா சமீபத்தில், சென்னை கமலா திரையரங்கில் கோலாகலமாக நடைபெற்றது. இதில் ஏராளமான திரையுலக பிரமுகர்கள் கலந்து கொண்டு படக்குழுவினரை வாழ்த்தினார்கள். மேலும், லக்‌ஷ்மி மூவி மேக்கர்ஸ் மீண்டும் திரைப்பட தயாரிப்பில் ஈடுபட்டிருப்பது மகிழ்ச்சியளிப்பதாகவும், இந்த நிறுவனம் இன்னும் தொடர்ந்து பல வெற்றி படங்களை தயாரிக்கும், என்றும் தெரிவித்தனர்.