மீண்டு வந்தாரா? - தர்மேந்திரா உடல்நிலை குறித்து மருத்துவர்

பாலிவுட்டில் பிரபல நடிகராக வலம் வந்தவர் தர்மேந்திரா(89). 1960 ஆண்டு முதல் 2000 ஆண்டு வரை நாயகனாக பல்வேறு ஹிட் படங்களை கொடுத்துள்ளார். இந்தியைத் தாண்டி பஞ்சாபி மொழி உட்பட கிட்டத்தட்ட 300க்கும் அதிகமான படங்களில் நடித்துள்ளார். இவருக்கு பத்மபூஷன் விருதும் இந்திய அரசு வழங்கிய கௌரவித்தது. சினிமாவை தாண்டி அரசியலிலும் இருந்துள்ளார். பிஜேபி சார்பில் 2004 ஆம் ஆண்டு நாடாளுமன்றத் தேர்தலில் போட்டியிட்டு வென்றார். 

இவர் சமீபகாலமாக உடல்நலப் பிரச்சினைகளால் அவதிப்பட்டு வந்தார். அண்மையில் மூச்சு திணறல் காரணமாக மும்பையில் உள்ள பிரபல தனியார் மருத்துவமனையில் அனுமதிக்கப்பட்டார். இது தொடர்பாக பதிவிட்ட அவரது மனைவியும் பிரபல நடிகையுமான எம்.பி. ஹேமமாலினி, மருத்துவமனையில் தர்மேந்திராவை தொடர்ந்து கண்காணித்து வருவதாகவும் அவர் விரைவில் பூரண குணமடைய அனைவரும் பிரார்த்திக்க வேண்டும் எனவும் எக்ஸ் வலைதளத்தில் பதிவிட்டிருந்தார். ஆனால் நேற்று காலை திடீரென அவர் உயிரிழந்து விட்டதாக செய்திகள் வெளியானது. இது திரையுலகில் பரபரப்பை ஏற்படுத்தியது. ஆனால் செய்தி வெளியான உடனே தர்மேந்திரா உயிரோடுதான் இருக்கிறார் என ஹேமா மாலினி தெரிவித்தார். மேலும் செய்தி வெளியிட்ட ஊடகங்களை கடுமையாக சாடினார். 

இந்த நிலையில் தர்மேந்திரா இன்று காலை டிஸ்சார்ஜ் செய்யப்பட்டுள்ளார். இது தொடர்பாக மருத்துவர் கூறுகையில், “இன்று காலை 7:30 மணிக்கு தர்மேந்திரா டிஸ்சார்ஜ் செய்யப்பட்டார். தர்மேந்திரா குடும்பத்தினர் வீட்டில் இருந்தபடியே அவருக்கு சிகிச்சை அளிக்க முடிவு எடுத்ததால் அவர் வீட்டுக்கு புறப்படுகிறார்” என தெரிவித்துள்ளார். அபாய கண்டத்தில் இருந்து தர்மேந்திரா மீண்டு வந்துள்ளதாகத் தெரியும் சூழலில் முழுமையாக மீண்டு வர அவரது ரசிகர்கள் பிரார்த்தனை செய்து வருகின்றனர்.