டேனியல் பாலாஜியின் கடைசிப் படம் எப்படி இருக்கிறது? - ‘பிபி 180’ விமர்சனம்

சமீபத்தில் மறைந்த நடிகர் டேனியல் பாலாஜி நடித்த கடைசி திரைப்படம் பிபி 180. படத்தின் தலைப்பு வித்தியாசமாக அமைந்திருப்பது போல் வித்தியாசமான ஒரு கதையை தாங்கிக் கொண்டு வெளியாகி இருக்கிறது இந்த திரைப்படம். இப்படி சில பல எதிர்பார்ப்புகளுடன் வெளியாகி இருக்கும் இந்த திரைப்படம் வரவேற்பு பெற்றிருக்கிறதா, இல்லையா?

எம்எல்ஏவாக இருக்கும் கே பாக்யராஜ் மகள் ஒரு விபத்தில் இறந்து விடுகிறார். பாக்யராஜுக்கு அடியாளாக வேலை செய்கிறார் டேனியல் பாலாஜி. இந்நிலையில் இறந்த மகளின் உடல், அரசு மருத்துவமனைக்கு எடுத்துச் செல்லப்படுகிறது. அங்கு போஸ்ட்மார்ட்டம் செய்யும் டாக்டராக தான்யா ரவிச்சந்திரன் இருக்கிறார். பாக்யராஜுக்கோ தன் மகளை போஸ்ட்மார்ட்டம் செய்யாமல் அப்படியே வீட்டிற்கு எடுத்து வந்து சடங்குகள் செய்ய வேண்டும் என்ற எண்ணம் இருக்கிறது. ஆனால் அரசு மருத்துவமனையில் போஸ்ட்மார்ட்டம் செய்துதான் உடலை ஒப்படைப்பார்கள். இதனை எப்படியாவது நிறுத்த டேனியல் பாலாஜியிடம் உதவி கேட்கிறார் பாக்யராஜ்.

டேனியல் பாலாஜியோ தான்யா ரவிச்சந்திரனுக்கு போனில் போஸ்ட்மார்ட்டம் செய்யக்கூடாது எனக் கூறி மிரட்டல் விடுகிறார். தான்யாவோ இது என் கடமை யார் தடுத்தாலும் நான் போஸ்ட்மார்ட்டம் செய்தே தீருவேன் என உறுதியாக இருக்கிறார். இதனால் இவர்களுக்குள் மிகப் பெரிய பகை மற்றும் ஈகோ மோதல் வெடிக்கிறது. ரவுடி டேனியல் பாலாஜி தான்யாவுக்கு பல்வேறு வகையில் தொல்லை கொடுக்கிறார். அவரை பழிவாங்க முயற்சி செய்கிறார். இன்னொரு பக்கம் தான்யா அதை எப்படி முறியடித்து ஒரு உயிரின் முக்கியத்துவத்தை டேனியல் பாலாஜிக்கு புரிய வைக்கிறார்? என்பதே இப்படத்தின் மீதி கதை.

பிபி 180 என்றால் ரத்த அழுத்தம் 180க்கு மேல் சென்றால் மனிதருக்கு ஆபத்து என்ற விஷயத்தை குறிக்கிறது. இப்படி வித்தியாசமாக தலைப்பு வைத்திருக்கும் இயக்குநர் கதையையும் வித்தியாசமாகவே யோசித்து இருக்கிறார். மார்ச்சுரி, போஸ்ட்மார்ட்டம் சம்பந்தப்பட்ட ஒரு கதையை கையில் எடுத்த அவர், அதை ஆக்ஷன் பாணியிலும் விறுவிறுப்பாக கூற முயற்சி செய்திருக்கிறார். படம் ஆரம்பித்து பாதி படம் வரை இது எந்த மாதிரியான திரைப்படம் எந்த மாதிரியான கதை என்றே புரியாதபடி பல்வேறு குழப்பங்கள் உண்டாக்கும்படியாக திரைக்கதை அமைத்திருக்கிறார். அது பார்ப்பவர்களுக்கு பல்வேறு விதங்களில் எரிச்சல் ஏற்படுத்தும் படி அமைந்து இருந்தாலும் படத்தின் நடுவில் இருந்து ஆரம்பித்து பின் இரண்டாம் பாதியில் கதைக்குள் முழுவதுமாக செல்லும் திரைப்படம் அதன் பின் விறுவிறுப்பாக நகர்ந்து இறுதி கட்ட காட்சிகள் நேர்த்தியாகவும் ரசிக்க வைப்பதாகவும் அமைந்திருப்பது படத்திற்கு சற்றே ஆறுதலாக அமைந்திருக்கிறது.

கதையை வித்தியாசமாக யோசித்த இயக்குநர் அதை இன்னும் கூட சிறப்பான திரைக்கதை மூலம் ரசிக்கும்படி கொடுத்திருக்கலாம். மிகவும் சுமாரான காட்சி அமைப்புகள் மூலம் ரசிக்க வைக்க முயற்சி செய்திருக்கிறார். நாயகி தான்யா ரவிச்சந்திரன் டாக்டராக வருகிறார். மிகவும் ஸ்ட்ரிக்ட்டான டாக்டராக அவர் செய்யும் சம்பவங்கள் சிறப்பாக அமைந்திருக்கின்றன. இவரின் நேர்த்தியான நடிப்பு கவனம் பெற்று இருக்கிறது. மறைந்த நடிகர் டேனியல் பாலாஜி வில்லனாக வருகிறார். தனக்கு கொடுத்த வேலையை நிறைவாக செய்து விட்டு சென்றிருக்கிறார். தந்தையாக வரும் பாக்கியராஜ் பிற்போக்கு வாதியாக நடித்து கவனம் பெற்று இருக்கிறார். தனக்கு கொடுத்த வேலையை சிறப்பாகவே செய்திருக்கிறார். முக்கிய பாத்திரத்தில் வரும் அருள் தாஸ் அவர் வேலையை நிறைவாக செய்திருக்கிறார். மற்றபடி உடனடித்த அனைவருமே அவரவர் வேலையை செவ்வன செய்து விட்டு சென்றிருக்கிறனர். 

ஜிப்ரான் இசையில் பாடல்கள் சுமார் பின்னணி இசை ஓகே. ராமலிங்கம் ஒளிப்பதிவில் காட்சிகள் நேர்த்தியாக படம் பிடிக்கப்பட்டுள்ளன. மிஷ்கின் பட பாணியில் படத்தை உருவாக்க நினைத்து இயக்கியிருக்கும் இயக்குநர் ஜே பி அதை இன்னமும் கூட திறன் பட கையாண்டு சிறப்பான முறையில் அதேசமயம் விறுவிறுப்பாக கொடுத்திருக்கலாம். படத்தில் ஆரம்ப கட்டத்தில் வரும் குழப்பமான காட்சி அமைப்புகள் மற்றும் சுவாரசியமற்ற திரைக்கதை போன்ற விஷயங்கள் படத்திற்கு அயற்சி கொடுத்தாலும் இறுதி கட்ட காட்சிகள் விறுவிறுப்பாகவும் நேர்த்தியாகவும் அமைந்து பார்ப்பவர்களுக்கு ஆறுதலாக அமைந்திருக்கிறது. குறிப்பாக கிளைமாக்ஸ் காட்சியில் எவ்வளவு மிகப்பெரிய ரவுடியாக இருந்தாலும் அவர்களுக்குள்ளும் ஒரு வித பயம் இருக்கும் என்ற விஷயத்தை புதுமையான கோணத்தில் காட்டி இருப்பது பாராட்டுக்குரியது. அந்த நேரத்தில் அவர்களுக்குள் பிபி எந்த அளவுக்கு எகிறும் என்பதையும் வித்தியாசமான முறையில் காண்பித்திருப்பது சிறப்பு. 

பிபி 180 - ரத்த கொதிப்பு!