ரிலீஸில் இருந்து திடீரென பின்வாங்கிய விஷால் - ஆர்யா இணைந்து நடித்த படம்!

'அரிமா நம்பி' படத்தின் மூலம் தமிழ் சினிமாவிற்கு அறிமுகமானவர் இயக்குநர் ஆனந்த் சங்கர். இவர், தற்போது நடிகர் விஷாலை வைத்து 'எனிமி' திரைப்படத்தை இயக்கிவருகிறார். இப்படத்தில் விஷாலுக்கு ஜோடியாக மிர்னாலினி ரவி நடிக்க, வில்லனாக ஆர்யா நடித்துள்ளார். தமன் இசையமைக்கிறார். ஐதராபாத்தில் முதற்கட்ட படப்பிடிப்பை நடத்திய படக்குழு, இரண்டாம்கட்ட படப்பிடிப்பை துபாயில் நடத்தி மொத்த படப்பிடிப்பையும் நிறைவுசெய்தது. இதையடுத்து, டப்பிங் உள்ளிட்ட இறுதிக்கட்டப் பணிகளில் படக்குழு கவனம் செலுத்திவருகிறது.

இப்படம் ஆயுத பூஜை தினத்தன்று திரையரங்கில் வெளியாகும் என கடந்த மாதத்தின் தொடக்கத்தில் படக்குழு அறிவித்திருந்த நிலையில், தற்போது படத்தின் ரிலீஸில் மாற்றம் செய்யப்பட்டுள்ளதாக புதிய அறிவிப்பு வெளியாகியுள்ளது. ‘எனிமி’ படத்திற்கு யூ / ஏ சென்சார் சான்றிதழ் கிடைத்துள்ளதாக தெரிவித்துள்ள படக்குழு, படம் தீபாவளி தினத்தன்று திரையரங்கில் வெளியாகவுள்ளதாக அறிவித்துள்ளது.

தீபாவளி தினத்தன்று ரஜினிகாந்தின் ‘அண்ணாத்த’, சிம்புவின் ‘மாநாடு’, அருண் விஜய்யின் ‘வா டீல்’ ஆகிய படங்கள் வெளியாகவுள்ள நிலையில், தற்போது அப்பட்டியலில் ‘எனிமி’ படமும் இணைந்துள்ளது.