“சிங்கம் எப்போதும் சிங்கம் தான்”; தி கோட் விஜய்

இயக்குநர் வெங்கட் பிரபு இயக்கத்தில், விஜய் நடிப்பில் உருவாகி வரும் திரைப்படம் ‘தி கிரேட்டஸ்ட் ஆஃப் ஆல் டைம்’. ஏ.ஜி.எஸ் நிறுவனம் சார்பில் அர்ச்சனா கல்பாத்தி தயாரிக்கும் இப்படத்திற்கு யுவன் சங்கர் ராஜா இசையமைக்கிறார். பிரசாந்த், மோகன், பிரபுதேவா, சினேகா, லைலா, ஜெயராம் என பலர் நடித்து வரும் இப்படம் வருகிற செப்டம்பர் 5ஆம் தேதி உலகம் முழுவதும் உள்ள திரையரங்கிலும், ஐமேக்ஸ் திரைக்கேற்பவும் வெளியாகவுள்ளது.

இப்படத்திலிருந்து கடந்த ஏப்ரல் மாதம் ‘விசில் போடு...’ என்ற முதல் பாடல் வெளியானது. இப்பாடலை மதன் கார்க்கி வரிகளில் விஜய்யுடன் இணைந்து யுவன் பாடியிருந்தார். அதைத்தொடர்ந்து, விஜய் பிறந்தநாளான கடந்த ஜூலை 22ஆம் தேதி ‘சின்ன சின்ன கண்கள்...’ என்ற பாடல் வெளியானது. இப்பாடலைக் கபிலன் வைரமுத்து வரிகளில் விஜய் பாடியிருந்தார். மேலும் இப்பாடலில் மறைந்த பாடகி பவதாரிணி குரலை ஏ.ஐ தொழில்நுட்பம் மூலம் பயன்படுத்தியிருந்தனர். இதையடுத்து கடந்த சில நாட்களுக்கு முன்பு ‘ஸ்பார்க்...’ என்ற பாடல் வெளியாகியது. இப்பாடலைக் கங்கை அமரன் வரிகளில் யுவனுடன் இணைந்து விருஷா பாலு பாடியிருந்தார். இந்த பாடலுக்கு கலவையான விமர்சனங்கள் எழுந்தது.

இந்த நிலையில் இப்படத்தின் ட்ரைலர் தற்போது வெளியாகியுள்ளது. ட்ரைலரை பார்க்கையில், ரா உளவுப் பிரிவில் வேலை பார்த்த விஜய்க்கு நீண்ட ஆண்டுகள் கழித்து அவர் வேலை பார்த்தது தொடர்பாக பிரச்சனை வருவதாகவும் அந்த பிரச்சனையிலிருந்து அவரை அவரது மகன் எப்படி தப்பிக்க வைத்தார் என்பதையும் சஸ்பன்ஸ் கலந்து த்ரில்லர் ஜானரில் சொல்லியிருப்பது போல் அமைந்துள்ளது.

மேலும் அஜித்தை வைத்து வெங்கட் பிரபு இயக்கிய மங்காத்தா படத்தில் இடம்பெற்ற வசனம் போல் ‘இனிமே சத்தியமா குடிக்கக்கூடாதுடா...’ என்ற வசனம் இடம்பெறுகிறது. அதே போல் விஜய்யின் கில்லி படத்தில் இடம்பெற்ற காட்சி போல், இதிலும் ஒரு காட்சி வருகிறது. அதோடு ‘சிங்கம் எப்போதும் சிங்கம் தான்’ மற்றும் விஜய்யின் ஹிட் டயலாக்கான ‘ஐ எம் வெய்டிங்’ வசனம் ட்ரைலரின் இறுதியில் இடம்பெற்றுள்ளது. இந்த ட்ரைலர் தற்போது ரசிகர்களின் கவனம் பெற்று யூட்யூபில் 3 மில்லியன் பார்வையாளர்களை கடந்து சமூக வலைதளங்களில் வைரலாகி வருகிறது.