"இப்போது என் அம்மா நிம்மதியாக தூங்குவார்" - விஜய் தேவரகொண்டா

பூரி ஜெகன்நாத் இயக்கத்தில் விஜய் தேவரகொண்டா நடிப்பில் உருவாகியுள்ள படம் 'லைகர்'. இப்படத்தில் அனன்யா பாண்டே, ரம்யா கிருஷ்ணன், ரோனித் ராய் உள்ளிட்ட பலர் நடித்துள்ளனர். இவர்களோடு பிரபல குத்துச்சண்டை வீரர் 'மைக் டைசன்' முக்கிய கதாபாத்திரத்தில் நடித்துள்ளார். 'தர்மா புரொடக்ஷன்' தயாரித்துள்ள இப்படத்தின் ட்ரைலர் சமீபத்தில் வெளியாகி நல்ல வரவேற்பை பெற்றது. இப்படம் தமிழ், தெலுங்கு, மலையாளம், கன்னடம், இந்தி ஆகிய மொழிகளில் ஆகஸ்ட் மாதம் 25-ஆம் தேதி வெளியாகவுள்ளது. இதனால் ப்ரோமோஷன் பணிகளில் படக்குழு தீவிரமாக ஈடுபட்டு வருகிறது.

இந்நிலையில் விஜய் தேவரகொண்டா தனது ட்விட்டர் பக்கத்தில் சில புகைப்படங்களை பகிர்ந்துள்ளார். அதோடு, "ஏற்கனவே இந்தியா முழுக்க இந்த மாதம் சுற்றுப்பயணம் மேற்கொண்டு அன்பைப் பெற்றது கடவுளின் ஆசீர்வாதமாக உணர்கிறேன். ஆனால் என் அம்மா எங்களுக்கு பாதுகாப்பு தேவை என்று உணர்ந்து எங்களுக்கு சிறு பூஜை நடத்தினார். இப்போது நாங்கள் எங்களது ப்ரோமோஷன் பயணத்தைத் தொடரும்போது என் அம்மா நிம்மதியாக தூங்குவார்" எனக் குறிப்பிட்டுள்ளார்.