சற்று முன் சன் தொலைக்காட்சியில் இப்படத்தின் டைட்டில் மற்றும் பர்ஸ்ட்லுக் அதிகாரபூர்வமாக வெளியாகியுள்ளது. படத்தின் தலைப்பு 'சர்க்கார்' என்று வைக்கப்பட்டுள்ளது. ரஜினி, கமல் இருவரும் அரசியலில் இறங்கி அவர்களது படங்களும் அரசியல் பேசி வரும் நிலையில், இந்த வரிசையில் அடுத்து அரசியலில் இறங்குவார் என்று எதிர்பார்க்கப்படுபவர் விஜய். இவரது தந்தை எஸ்.ஏ.சி பல பேட்டிகளில் இதை வெளிப்படுத்தினார். விஜயின் கடந்த படமான 'மெர்சல்' அரசியல் ரீதியாக எதிர்ப்புகளை சந்தித்தது. இந்த நிலையில் துப்பாக்கி, கத்தி வெற்றிகளைத் தொடர்ந்து மீண்டும் இயக்குனர் முருகதாஸுடன் கை கோர்த்தார் விஜய்.
முருகதாஸின் 'ரமணா' விஜயகாந்துக்கும், தெலுங்கில் 'ஸ்டாலின்' படம் சிரஞ்சீவிக்கும் அரசியல் மைலேஜ் கொடுத்தது. இத்தனையையும் கருத்தில் கொள்ளும்போது விஜயுடன் முருகதாஸ் இணையும் படத்தில் வெளிப்படையாக அரசியல் இருக்குமென எதிர்பார்க்கப்பட்டது. அதை உறுதிப்படுத்தும் வகையில் படத்துக்கு 'சர்க்கார்' என்ற டைட்டில் வைக்கப்பட்டுள்ளது.