Skip to main content

"தன்னைத் தானே ஏமாற்றிக்கொள்ளாத ஒரு மனிதர்" - கலைஞர் குறித்து வெற்றிமாறன்

Published on 11/09/2023 | Edited on 11/09/2023

 

vetrimaaran about kalaignar

 

திமுகவின் முன்னாள் தலைவரும் தமிழகத்தின் முன்னாள் முதல்வருமான கலைஞரின் நூற்றாண்டு விழா ஜூன் மாதம் 3 ஆம் தேதி முதல் தமிழக அரசு சார்பிலும் திமுக சார்பிலும் வெகு விமரிசையாகக் கொண்டாடப்பட்டு வருகிறது. திமுக சார்பில் இந்தாண்டு முழுவதும் கொண்டாடத் திட்டமிட்டு, அதற்கான ஏற்பாடுகளைச் செய்து வருகின்றனர். இந்நிலையில் சென்னை தெற்கு மாவட்டம் சைதாப்பேட்டை மேற்கு பகுதி திமுக சார்பில் முத்தமிழறிஞர் கலைஞர் நூற்றாண்டு விழா, 'முன்னணி இயக்குநர்கள் பார்வையில் தமிழ்நாட்டின் இயக்கம் டாக்டர் கலைஞர்' என்ற தலைப்பில் நடைபெற்றது. இதில் இயக்குநர்கள் எஸ்.பி. முத்துராமன், வி.சி. குகநாதன், தங்கர்பச்சான், வெற்றிமாறன், ராஜுமுருகன் உள்ளிட்டோர் கலந்து கொண்டு உரையாற்றினர். மேலும் அமைச்சர் மா. சுப்பிரமணியன், தமிழச்சி தங்கபாண்டியன் எம்.பி உள்ளிட்ட பலரும் கலந்து கொண்டனர்.

 

இயக்குநர் வெற்றிமாறன் பேசுகையில், "ஒரு சினிமா மாணவனாக கலைஞருடைய படங்கள், தமிழ் சினிமாவுக்குள்ளும் தமிழ் சமூகத்துக்குள்ளும் என்ன தாக்கம் ஏற்படுத்தியது என்பதை என்னுடைய புரிதலில் இருந்து பகிர்ந்து கொள்ள வந்திருக்கிறேன். எல்லாரும் போல பராசக்தி படத்திலிருந்து தான் தொடங்க போறேன். அதற்கு முன்பாக எடிட்டர் விஜயன் சார் சொன்ன ரெண்டு மூணு விஷயங்களை சொல்கிறேன். நான் உதவி இயக்குநராக இருந்தபோது விஜயன் சார் கலைஞருடைய படங்களுக்கு எடிட்டிங் செய்து கொண்டு இருந்தார். ஒரு ஷாட் எவ்வளவு தூரம் இருக்கணும், அப்படி இருந்தால் எவ்வளவு நேரம் பார்க்க முடியும், எந்த அளவை தாண்டினால் பார்வையாளர்கள் பார்க்க முடியாது என்பது இயக்குநருக்கும் எடிட்டருக்கும் தெரிஞ்ச விஷயங்கள். ஒரு வசனம் இங்க இருந்தா சரியா இருக்கும், இல்லைன்னா சரியா இருக்கும் என அனுமானிக்கிறது. அந்த கணிப்பு இருவருக்குமே அத்தியாவசியம். ஒளிப்பதிவாளர்களுக்கே அது கை வராத ஒன்று. 

 

இந்த விஷயம் எப்போதுமே டைலாக் ரைட்டர்ஸுக்கு இருக்காது. அவர்கள் எழுதிய வசனம் எல்லாமே இருக்க வேண்டும் என நினைப்பார்கள். ஆனால் கலைஞர் ஐயா, இந்த வசனத்தை தூக்குங்கள், அந்த வசனம் வேண்டாம் என சொல்லுவார் போல. அப்படி ஒரு நாள் எடிட் செய்து கொண்டிருந்தபோது அவசரமாக அவரை வேறொரு வேலைக்காக கூட்டிட்டு போய்ட்டாங்க. அவர் 1 மணி நேரத்தில் வந்துடறேன் என சொல்லிவிட்டு கிளம்பி கோட்டைக்கு போய்விட்டார். வெயிட் பண்ணிக்கிட்டே இருக்காங்க. லன்ச் டைம் ஆகிடுச்சு. ஆனால் வேலை நடந்துக்கிட்டே இருக்கு. பிறகு கலைஞர் வந்தார். வீட்டுக்கு கூட போகாம நேரா அங்க வந்திட்டு, விஜயன் சாரை கூப்பிட்டு, 'சாரி விஜயன்... உன்ன வெயிட் பண்ண வச்சிட்டேன். தப்பா எடுத்துக்காத ' என்றார். எனக்கு ரொம்ப ஆச்சரியமா இருந்தது. அவர் அப்படி கேட்க வேண்டும் என்ற அவசியமில்லை. அந்த இடத்தில ஒரு முதலமைச்சராக இல்லாமல், ஒரு எழுத்தாளராக அவருடைய வேலையை செய்தார். அப்புறம் மன்னிப்பு கேட்டு பட வேலைகளை பார்த்தார். 

 

பார்த்துக்கொண்டே வந்தவர் ஒரு இடத்துல நிறுத்தி, இந்த இடத்தில் அதிகமா இருக்கே, குறைக்க சொன்னனே. அதை பண்ணவில்லையா என கேட்டாராம். இந்த மெம்மரி, அவ்வளவு வேலைகளுக்கு மத்தியில் படத்தின் மீது உள்ள ஆர்வம். தங்கர் பச்சான் சார் சொன்ன மாதிரி, விஜயன் சார் கிட்ட நிறைய நேரங்கள் செலவழித்தாராம். அவருடைய எழுத்து அவருடைய படம் என்னவா வந்திருக்கும் என்பது அவ்வளவு சிறப்பா இருக்கும் என நினைக்கிறேன். இதேபோல், அவர் வசனம் எழுதிய படம், எடிட்டிங் எல்லாம் முடிச்சு திரையரங்கில் ஷோ பாக்குறாங்க. கலைஞருக்கு பின்னால் ஒருத்தர் படம் பார்த்துக்கிட்டு இருக்கார். படம் முடிஞ்சு எல்லாம் வெளியே போய்ட்டாங்க. 3 பேர் மட்டும் உள்ள இருக்காங்க. கலைஞர் ஐயா, படம் எப்படி இருக்கு என கேட்க, பின்னாடி இருந்தவர் 'நல்லாருக்கு அண்ணே' என சொல்ல, உடனே கலைஞர் 'அப்போ நீ தூங்கிட்ட, இது நல்லாவா இருக்கு' என்றார். அவர் சார்ந்த படம் என்பதற்காக நல்லா இல்லாததை நல்லாயிருக்கு என்று தன்னை தானே ஏமாற்றிக்கொள்ளாத ஒரு மனிதர். அது ஒரு சிறப்பு வாய்ந்ததாக பார்க்கிறேன். 

 

அரசியல் என்று பார்க்கையில், ஒரு வீட்டில் உள்ள அரசியலையே நம்மால் சமாளிக்க முடியாது. ஆனால் அவரை சுற்றி ஆயிரம் தேவைகள், எதிர்பார்ப்புகள் என ஏகப்பட்டது இருக்கும். இதற்கு நடுவில் அரசியலை நகர்த்திக் கொண்டு போகிறது என்பது சாதாரணமான விஷயம் அல்ல. அதற்கு இந்த ஒரு தன்மை அவருக்கு இருந்தது தான் காரணம் என நினைக்கிறேன்" என்றார்.

 

 

சார்ந்த செய்திகள்

Next Story

பிரியாணி கொடுக்க குப்பை வண்டியில் ஆட்களை அழைத்து வந்த மாநகராட்சி ஊழியர்கள்

Published on 03/06/2024 | Edited on 03/06/2024
Corporation employees who brought people in a garbage truck to give biryani

வேலூர் மாவட்டம் காட்பாடி சித்தூர் பேருந்து நிலையத்தில் முன்னாள் முதலமைச்சர் கலைஞர் அவர்களின் பிறந்தநாள் விழா திமுகவினரால் கொண்டாடப்பட்டது. இந்த விழாவில் வேலூர் பாராளுமன்றத் தொகுதியின் திமுக வேட்பாளர் கதிர் ஆனந்த் கலந்து கொண்டு நல திட்ட உதவிகளையும் பிரியாணியும் வழங்கினார்.

பிரியாணி வாங்குவதற்கு பெரிய அளவில் ஆட்கள் வரவில்லை எனக் கூறப்படுகிறது. இந்த நிலையில் வேலூர் மாநகர எம்.எல்.ஏ கார்த்தி, துணை மேயர் சுனில் ஏற்பாட்டில்  ஏரியாக்களில் இருந்து ஏழை மக்களை அழைத்துவந்தனர். அப்படி வந்தவர்களை வேலூர் மாநகராட்சி குப்பை வண்டியில் ஏற்றிக்கொண்டு வந்துவிட்டனர் மாநகராட்சி ஊழியர்கள். அரசு வாகனத்தில் அதுவும் குப்பை வண்டியில் பொதுமக்களை ஏற்றி வந்தது அதிர்ச்சியாக பார்க்கப்பட்டது

Corporation employees who brought people in a garbage truck to give biryani

தேர்தல் நேரத்தில் ஓட்டு கேட்கச் செல்லும் பொழுது பணம், பிரியாணி, வாட்டர் பாட்டில், சரக்கு எனத் தந்து ஷேர் ஆட்டோக்கள் மூலம் மக்களை அழைத்து வந்த இதே. நபர்கள். இப்போது ஒரு பிறந்தநாள் நிகழ்ச்சிக்கு இப்படி குப்பை வண்டியில் ஏற்றி வருகிறார்கள் என்கின்றனர் சமூக ஆர்வலர்கள். 

Next Story

“கலைஞர் இருக்குற வரைக்கும் எவனும் இங்க வாலாட்ட முடியல” - பிரகாஷ் ராஜ் 

Published on 01/06/2024 | Edited on 06/06/2024
prakash raj about kalaingar

சென்னை பாரிமுனையில் உள்ள ராஜா அண்ணனாமலை மன்றத்தில் முன்னாள் முதலமைச்சர் கலைஞரின் நூற்றாண்டு நிறைவு விழாவினை சிறப்பிக்கும் வகையில், அமைச்சர் சேகர்பாபு ஏற்பாட்டில் கலைஞரின் வரலாற்று புகைப்பட கண்காட்சி இடம்பெற்றுள்ளது. அதை நடிகர் பிரகாஷ் ராஜ் திறந்து வைத்தார். பின்பு செய்தியாளர்களிடம் பேசிய அவர், “அற்புதமான ஆவணப்படம். எனக்கு பேச்சே வரவில்லை. மனசு 30 ஆண்டுகாலத்துக்கு பின்னாடி போகுது. கலைஞரைப் பற்றிய பாசமும், அவரது கொள்கையைப் பற்றிய புரிதலையும் உள்வாங்கியவர்களால் மட்டும் தான் இது போன்ற பதிவை பதிவு செய்ய முடியும். இருவர் படம் நடிச்சு 28 வருஷம் ஆச்சு.  

இன்றைய தொழில்நுட்பத்தில் கலைஞருடைய நியாபகங்களை, அவருடைய பேச்சுக்களை மீண்டும் கேட்பது மாதிரி பதிவு, அற்புதமான ஒன்று. அவராக நடிக்க இருவர் படத்துல எனக்கு ஒரு வாய்ப்பு கிடைச்சுது மகிழ்ச்சி. அவரை சந்திப்பதற்கு முன்னாடி அவரை மாதிரி வாழ்ந்தது போல் ஒரு ஃபீல். கிட்டதட்ட இரண்டு வருஷம் அவரைப் பற்றி படிச்சேன். நான் கர்நாடகாவிலிருந்து வந்தவன். அதனால் அவருடைய அந்த தமிழ் உச்சரிப்பு கத்துக் வேண்டும். அந்த தமிழை கத்துக்க கத்துக்க, அந்த மொழியுடைய கர்வத்துல அவருடைய அற்புதமான கொள்கைகளும், அவருடைய வாழ்க்கையின் பயணங்களும் என்னால் உணர முடிஞ்சது. 

ஏனென்றால் அந்த கதாபாத்திரத்தை ஒரு நடிகராக மட்டும் நடிக்க முடியாது. அந்த படத்தில் நடித்ததை விட இப்படியொரு மகானை நான் சந்திக்க நேர்ந்தது மிக முக்கியம். இன்றைக்கு நான் இப்படி பேசுவதற்கு காரணம் அப்படியொரு மனிதனை இரண்டு ஆண்டுகள் படித்தது தான் காரணம். சமீபத்தில் சாதி அரசியல் உள்ளிட்ட நிறைய அரசியல் குறித்து ஒரு பேட்டியில் பேசினேன். அப்போது நீங்க அதை பத்தி ரொம்ப பேசுறீங்கன்னு சொன்னாங்க, கலைஞர் இருந்திருந்தால் நான் பேச வேண்டிய அவசியமே இருந்திருக்காது என்றேன். அவர் இருக்குற வரைக்கும் எவனும் இங்க வாலாட்ட முடியல. கலைஞருடைய நூற்றாண்டு விழா கொண்டாடிட்டு இருக்கிற நாட்டுல ஒரு நூற்றாண்டின் கலைஞரை கொண்டாடிட்டு இருக்கீங்கன்னு நம்புறேன். அவர் சினிமாவில் நல்ல டயலாக் எழுதினாரு என்பதை விட அப்போதே 69 சதவிகிதம் இடஒதுக்கீட்டை கொண்டு வந்தது தான் முக்கியம். அடுத்த தலைமுறைக்கு கலைஞர் இருந்தார் என்ற செய்தியை விட ஏன் கலைஞர் ஆனார், அவரது வாழ்வியல் எப்படி இருந்தது என்பதை தெரிந்து கொள்ள வேண்டும்.  

தண்டவாளத்தில் தலையை கொண்டு வைத்திருக்கிறார் என்றால் எப்படியொரு நெருப்பு அவரிடம் இருந்திருக்கும். அதை மறக்கவே முடியாது. அபியும் நானும் பட ஆடியோ லாஞ்சுக்கு ஒரு நாள் முன்னாடிதான் ஃபோன் போட்டு சொன்னேன். உடனே வந்துவிட்டார். இலக்கியம், கொள்கை உள்ளிட்டவைகளை பேசுவார். நான் இரண்டு வருஷம் படித்ததை விட நிறைய விஷயங்கள் இந்த புகைப்பட கண்காட்சியில் பதிவு செய்யபட்டிருக்கு. கொள்கையை வைத்து ஒரு தலைவரானதும், மக்களின் அன்பை இன்றைக்கும் அவர் சம்பாதித்தது, ஒரு உண்மையான தலைவனுக்கான விஷயம். எங்களுக்கு அவர் வழிகட்டியாக இருக்கிறார். கலைஞரின் கொள்கை வழியில் முதல்வர் ஸ்டாலின் செயல்படுகிறார். இந்தியாவில் முதல் மாநிலமாக தமிழ்நாடு இயங்கிக் கொண்டிருக்கிறது. அது இன்னும் உயரும். எதையும் எதிர்த்து நிற்கும் துணிச்சல் முதலமைச்சர் மு.க.ஸ்டாலினுக்கு இருக்கிறது. ஒரு முதல்வரே அப்படி நிற்கும் போதுதான் மக்களுக்கு ஒரு நம்பிக்கை வரும், நான் எங்கு சென்றாலும் எனக்கு வீடு (தமிழ்நாடு) இருக்கிறது என்று சொல்ல நம்பிக்கை இருக்கிறது. என் செல்லத்த ஒன்னும் பண்ண முடியாது. கலைஞருடைய சிந்தனை தமிழ்நாட்டு மக்கள் மனதில் இருக்கிறது.  நிறைய ஷூட்டிங்கில் மக்கள் வருவார்கள். கன்னியாகுமரி ஷூட்டிங்கில் மோடியே ஆடியன்ஸை கூட்டிட்டு போறார். .” என்றார்.