வசந்த் இயக்கத்தில் பார்வதி, லட்சுமி ப்ரியா சந்திரமௌலி, காளிஸ்வரி ஸ்ரீனிவாசன், கருணாகரன், 'மயக்கம் என்ன' சுந்தர், கார்த்திக் கிருஷ்ணா, மாரிமுத்து மற்றும் மாஸ்டர் ஹமரேஷ், நேத்ரா என பல நட்சத்திரங்கள் நடிப்பில் வெளியான சிவரஞ்சினியும் இன்னும் சில பெண்களும் படம் ரசிகர்களிடையே நல்ல வரவேற்பையும், பாராட்டுகளையும் பெற்றது. சர்வதேச அரங்கில் பாராட்டுகளை பெற்ற இப்படத்திற்கு சிறந்த படத்திற்கான தேசிய விருது அளிக்கப்பட்டது. 

இந்நிலையில் நடிகர் ரஜினிகாந்த் சிவரஞ்சினியும் இன்னும் சில பெண்களும் படத்திற்கு தேசிய விருது கிடைத்ததற்கு வாழ்த்து தெரிவித்துள்ளார். இது தொடர்பாக அவர் வெளியிட்ட ட்விட்டர் பதிவில், "மதிப்பிற்குரிய இயக்குநர் சிகரம் கே. பாலசந்தர் சார் அவர்களால் உருவாக்கப்பட்ட இயக்குநர்களில் வஸந்த் மிக முக்கியமானவர். பாலசந்தர் சாருக்கு  மிகுவும் பிடித்தவர். இயக்குநர் வசந்த் இயக்கிய அனைத்து படங்களுமே நல்ல கருத்தாழமிக்க அருமையான படங்கள். அவர் இயக்கிய சிவரஞ்சினியும் இன்னும் சில பெண்களும் திரைப்படம் அவர் இயக்கிய திரைப்படங்களிலேயே மிக அருமையான படம் என்று சொன்னால் அது மிகையாகாது. 

பாரதி கண்ட புதுமை பெண்களான மூன்று பெண் கதாபாத்திரங்களை வைத்து மூன்று கதைகளாக்கி இந்த படத்தை உருவாக்கியுள்ளார். இதை பார்த்தவர்கள் அனைவரும் இந்த படைப்பை பாராட்டுவதில் எந்த ஆச்சரியமும் இல்லை. ஏனென்றால் இந்த படத்தை பார்த்த பிறகு அந்த மூன்று பெண் கதாபாத்திரங்களும் என் நெஞ்சை விட்டு அகலவில்லை. இது போன்று ஒரு அருமையான படத்தை அளித்த இயக்குநர் வசந்த அவர்களுக்கு என் மனமார்ந்த   வாழ்த்துக்களும், பாராட்டுக்களும்" என்று அந்த கடிதத்தில் குறிப்பிட்டுள்ளார். 

கடந்த 2003 ஆம் ஆண்டு முதல் ஆண்டுதோறும் இந்தோ அப்ரிசியேஷன் பவுண்டேஷன் சார்பில் சென்னை சர்வதேச திரைப்பட விழா நடைபெற்று வருகிறது.  ஆண்டுதோறும் சினிமா துறையில் சிறந்த கலைஞர்கள் மற்றும் சிறந்த படைப்புகளுக்கு இவ்விழாவில் விருது வழங்கப்பட்டு வருகிறது. அந்தவகையில் இந்தாண்டிற்கான 19 வது சென்னை சர்வதேச திரைப்படவிழா கடந்த 30 ஆம் தேதி தொடங்கி நடைபெற்று வந்த நிலையில் அந்த நிகழ்வு நேற்றுடன்(6.1.2022)  நிறைவடைந்தது. இதில் 53 நாடுகளில் இருந்து 100 க்கு மேற்பட்ட படங்கள் திரையிடப்பட்டன.

இவ்விழாவில், தமிழ் பிரிவில் சிறந்த படங்களுக்கான போட்டியில் கர்ணன், தேன், சேத்துமான், உடன்பிறப்பு, சிவரஞ்சினியும் இன்னும் சில பெண்களும், இராமே ஆண்டாளும் இராவணே ஆண்டாளும், மாறா உள்ளிட்ட 11 படங்கள் இடம் பெற்றது. இதில் சிறந்த படங்களுக்கான முதல் பரிசு சிவரஞ்சினியும் இன்னும் சில பெண்களும் படத்திற்கு வழங்கப்பட்டுள்ளது. அத்துடன் பரிசுத் தொகையான ரூ.3 லட்சம் வழங்கப்பட்டது. இரண்டாம் பரிசுக்கு தேன் மற்றும் சேத்துமான் ஆகிய இரு படங்களும் தேர்வு செய்யப்பட்டு தல ரூ.1 லட்சம் வழங்கப்பட்டுள்ளது. 

மேலும் இவ்விழாவில் வாழ்நாள் சாதனையாளர் விருது மூத்த இயக்குநர் சிங்கீதம் சீனிவாசராவுக்கும், அமிதாப்பச்சன் யூத் ஐகான் விருது பாடகர் சித் ஸ்ரீராமுக்கும் வழங்கப்பட்டது. அத்துடன் 'சிவரஞ்சினியும் இன்னும் சில பெண்களும்' படத்தில் நடித்த லட்சுமி பிரியாவுக்கு ஸ்பெஷல் ஜூரி விருது வழங்கப்பட்டது.