கேப்டன் மில்லர் படத்தைத் தொடர்ந்து தற்போது தனது 50 ஆவது படப் பணிகளை கவனித்து வருகிறார் தனுஷ். அவரே இயக்கி நடிக்கும் இப்படத்தின் முழு படப்பிடிப்பும் முடிந்துள்ளது. இதைத் தவிர்த்து ‘நிலவுக்கு என்மேல் என்னடி கோபம்’ என்ற தலைப்பில் ஒரு படம் இயக்கி வருகிறார். மேலும் ஹீரோவாக சேகர் கம்முலா இயக்கத்தில் ஒரு படம், மாரி செல்வராஜ் இயக்கத்தில் ஒரு படம், அருண் மாதேஷ்வரன் இயக்கத்தில் ஒரு படம், இந்தியில் ஆனந்த் எல்.ராய் இயக்கத்தில் ஒரு படம் எனக் கைவசம் வைத்துள்ளார். இப்போது சேகர் கம்முலா இயக்கும் படத்தில் நடித்து வருகிறார்.

இதில் தனுஷின் 50வது படத்தில் காளிதாஸ் ஜெயராம், துஷாரா விஜயன், எஸ்.ஜே. சூர்யா, சந்தீப் கிஷன், அபர்ணா பாலமுரளி நடிக்கவுள்ளதாகத் தகவல் வெளியானது. மேலும் வட சென்னையை மையமாக வைத்து ஒரு கேங்ஸ்டர் ஜானரில் இப்படம் உருவாகி வருவதாகக் கூறப்பட்டது. இந்த நிலையில், இப்படத்தின் ஃபர்ஸ்ட் லுக் போஸ்டர் தற்போது வெளியாகியுள்ளது. இதில் தனுஷ், காளிதாஸ் ஜெயராம், சந்தீப் கிஷன் உள்ளிட்ட மூன்று பேரும் இடம்பெற்றிருக்கின்றனர். மூன்று பேரும் கையில் ஆயுதங்களோடு கோபமாக நின்றுகொண்டிருக்கின்றனர். 

மேலும் ரத்தக் கறையோடு காணப்படுகின்றனர். இப்படத்திற்கு ‘ராயன்’ எனத் தலைப்பு வைக்கப்பட்டுள்ளது. ஏ.ஆர். ரஹ்மான் இசையமைக்கிறார். இந்தாண்டிற்குள் இப்படம் தமிழ், இந்தி, தெலுங்கு உள்ளிட்ட மொழிகளில் வெளியாகவுள்ளதாக அறிவிக்கப்பட்டுள்ளது. தனுஷின் 50வது படம் என்பதால் ரசிகர்கள் மத்தியில் இப்படத்திற்கு தற்போது எதிர்பார்ப்பு அதிகரித்து வருகிறது. மேலும் தனுஷ் ரசிகர்கள் ஃபர்ஸ்ட் லுக் போஸ்டரை சமூக வலைத்தளங்களில் அதிகம் பகிர்ந்து வருகின்றனர். 

RAAYAN #D50 @sunpictures @arrahman pic.twitter.com/DdDNlJPVxw

 

— Dhanush (@dhanushkraja) February 19, 2024

லோகேஷ் கனகராஜ் வழங்க 'ஸ்ரீ வெங்கடேஸ்வரா சினிமாஸ்' நிறுவனம் தயாரிப்பில் கடந்த மாதம் 3 ஆம் தேதி வெளியான படம் 'மைக்கேல்'. இப்படத்தில் சந்தீப் கிஷன் ஹீரோவாக நடிக்க விஜய் சேதுபதி சிறப்புத் தோற்றத்தில் நடித்திருந்தார். ரஞ்சித் ஜெயக்கொடி இயக்கியிருந்த இப்படத்திற்கு கலவையான விமர்சனமே கிடைத்தது. இந்த விமர்சனங்களுக்கு இப்படத்தின் இயக்குநர் "அனைவரையும் திருப்திப்படுத்தக் கூடிய படைப்பு என்ற ஒன்று இல்லை. ஒவ்வொருவருக்கும் ரசனையும் மாறும்" என விளக்கமளித்திருந்தார்.

இந்த நிலையில் இப்படத்தின் தயாரிப்பாளர் மற்றும் இயக்குநரின் அடுத்த படத்திற்கு தமிழ்நாடு திரையரங்கு உரிமையாளர்கள் சங்கம் தடை விதித்துள்ளதாகத் தகவல் வெளியாகியுள்ளது. பொதுவாக திரையரங்கில் வெளியான படம் 4 வாரங்கள் முடிந்த பிறகே ஓடிடி தளங்களில் வெளியிட வேண்டும் என திரையரங்கு உரிமையாளர்கள் சங்கம் கட்டுப்பாடு விதித்துள்ளது. இந்த கட்டுப்பாட்டை மீறி மைக்கேல் படம் 3 வாரங்களுக்கு பிறகு ஓடிடி தளத்தில் வெளியிட்டுள்ளதால் அதற்கு எதிர்ப்பு தெரிவித்து இந்த அதிரடி முடிவை எடுத்துள்ளதாகக் கூறப்படுகிறது.