"சங்கத்திற்கு வேற செயலாளர்தான் பார்க்கனும்போல..." சூரிக்கு வித்தியாசமாக பிறந்தநாள் வாழ்த்துத் தெரிவித்த சிவகார்த்திகேயன்!

தமிழ் சினிமாவின் முன்னணி காமெடி நடிகரான சூரி, வெற்றிமாறன் இயக்கத்தில் உருவாகிவரும் விடுதலை படத்தின் மூலம் நாயகனாக அறிமுகமாகிறார். முழுவீச்சில் நடைபெற்றுவரும் இப்படத்தின் படப்பிடிப்பு தற்போது இறுதிக்கட்டத்தை எட்டியுள்ளது. இந்த நிலையில், நடிகர் சூரி இன்று தனது பிறந்தாளைக் கொண்டாடுகிறார். அதனை முன்னிட்டு, விடுதலை படத்திற்கான கெட்டப்பில் சூரி இருக்கும் சில புகைப்படங்கள் வெளியிடப்பட்டுள்ளன. அந்தப் புகைப்படங்கள் உருவாக்கத்தின்போது எடுத்த வீடியோவை தன்னுடைய ட்விட்டர் பக்கத்தில் பகிர்ந்துள்ள சூரி, பிறந்தநாள் வாழ்த்துத் தெரிவித்த அனைவருக்கும் நன்றி தெரிவித்துள்ளார்.

இந்த நிலையில், நடிகர் சூரி பதிவிட்டுள்ள வீடியோவை பகிர்ந்துள்ள சிவகார்த்திகேயன், "எதிர் நீச்சல் அடி வென்று ஏற்று கொடி. ஆள் செம்மையா இருக்கீங்க. இனி ஹீரோதான். நாங்க சங்கத்திற்கு வேற செயலாளர்தான் பார்க்கனும்போல. என் அன்பு அண்ணனுக்கு இனிய பிறந்தநாள் வாழ்த்துகள்" எனக் குறிப்பிட்டுள்ளார்.