கிரிக்கெட் வீரர் நடராஜன் பயோ-பிக்கில் சிவகார்த்திகேயன்

சிவகார்த்திகேயன் தற்போது பிரபல தெலுங்கு இயக்குநர் அனுதீப் இயக்கும் 'ப்ரின்ஸ்' படத்தில் நடித்துள்ளார். இப்படம் தீபாவளியை முன்னிட்டு வருகிற 21ஆம் தேதி வெளியாகவுள்ளது. இதனை தொடர்ந்து மண்டேலா இயக்குநர் அஷ்வின் இயக்கும் 'மாவீரன்' படத்திலும் ராஜ்குமார் பெரியசாமி இயக்கும் ஒரு படத்திலும் நடிக்க ஒப்பந்தமாகியுள்ளார்.

இதனையடுத்து சிவகார்த்திகேயன் நடிக்கும் புது படத்தை பற்றிய தகவல் வெளியாகவுள்ளது. பிரபல தமிழக கிரிக்கெட் வீரர் நடராஜனின் வாழ்க்கை திரைப்படமாக உருவாகவுள்ளதாகவும் அதில் நடராஜன் கதாபாத்திரத்தில் சிவகார்த்திகேயன் நடிக்கவுள்ளதாகவும் கூறப்படுகிறது. இது தொடர்பாக சிவகார்த்திகேயனிடம் பேச்சு வார்த்தை நடந்து வருவதாகவும் சொல்லப்படுகிறது. ஏற்கனவே கிரிக்கெட்டை மையப்படுத்தி உருவான 'கனா' படத்தை தயாரித்து அதில் கிரிக்கெட் பயிற்சியாளராக சிவகார்த்திகேயன் நடித்திருந்தார் என்பது குறிப்பிடத்தக்கது.

சேலம் மாவட்டம் சின்னப்பம்பட்டி கிராமத்தை சேர்ந்த நடராஜன் தமிழ்நாடு பிரீமியர் லீக் மற்றும் ஐ.பி.எல் போட்டிகளில் சிறப்பான ஆட்டத்தை வெளிப்படுத்தி பலரது கவனத்தை ஈர்த்தார். பின்பு ஆஸ்திரேலியா சென்ற இந்திய அணியில் இடம் பெற்றார். அங்கு நடந்த ஒரு போட்டியில் இந்திய அணி வெற்றி பெற முக்கிய காரணமாக திகழ்ந்து தமிழ்நாட்டிற்கு பெருமை சேர்த்தார்.