'ஏலியன்லாம் நம்ம ஜானரே இல்லையேப்பா...' - எதிர்பார்ப்பை அதிகரித்த அயலான்

'இன்று நேற்று நாளை' பட இயக்குநர் ரவிக்குமார் இயக்கத்தில், சிவகார்த்திகேயன் நடிப்பில் கடந்த 2 வருடங்களுக்கும் மேலாக உருவாகி வரும் படம் 'அயலான்'. இப்படத்தில், சிவகார்த்திகேயனுக்கு ஜோடியாக ரகுல் ப்ரீத் சிங் நடிக்க ஏ.ஆர். ரஹ்மான் இசையமைக்கிறார். இப்படத்தின் முதல் பாடல் 'வேற லெவல் சகோ' கடந்த 2021 ஆம் ஆண்டு வெளியானது.

அந்தாண்டே படப்பிடிப்பு நிறைவடைந்ததாகவும் கம்ப்யூட்டர் கிராஃபிக்ஸ் சார்ந்த காட்சிகள் நிறைய உள்ளதால் சி.ஜி. பணிகளுக்கு அதிக நாள் தேவைப்படுவதாகவும், இதன் காரணத்தால் படம் வெளியாவதில் தாமதமாகிறது எனவும் படக்குழு தெரிவித்திருந்தது. ஆனால் இந்தாண்டு தொடக்கத்தில் இன்னும் படப்பிடிப்பு இருப்பதாகக் கூறி மீண்டும் படப்பிடிப்பை படக்குழு தொடங்கியதாகக் கூறப்பட்டது. இதையடுத்து இந்தாண்டு மத்தியில் இப்படம் வெளியாக வாய்ப்புள்ளதாக பேச்சுக்கள் அடிபட்டது.

இதனைத் தொடர்ந்து இந்த வருட தீபாவளிக்கு வெளியாகும் எனக் கடந்த எப்ரல் மாதம் அதிகாரப்பூர்வ அறிவிப்பு வெளியானது. அதற்கு முந்தைய நாள் படக்குழு வெளியிட்ட அறிக்கையில், "திரைப்படம் கச்சிதமாக முழுமையடைய எங்களுக்குப் போதிய நேரம் தேவைப்பட்டது. 4500க்கும் அதிகமான விஎப்எக்ஸ் காட்சிகளைக் கொண்ட இந்திய சினிமாவின் முதல் முழு நீள லைவ்-ஆக்சன் திரைப்படமாக 'அயலான்' இருக்கும்" எனக் குறிப்பிடப்பட்டிருந்தது.

இதையடுத்து சமீபத்தில் திடீரென்று இப்படம் அடுத்த ஆண்டு பொங்கலன்று வெளியாகும் என சிவகார்த்திகேயன் அறிவித்திருந்தார். இதையொட்டி படத்தின் ட்ரைலர் தற்போது வெளியாகியுள்ளது. டீசரைபார்க்கையில், வேற்றுக் கிரகத்திலிருந்து ஒரு ஏலியன் பூமிக்குவருகிறது. அந்த ஏலியன் சிவகார்த்திகேயனுடன் இருக்கிறது. அந்த ஏலியன் எதற்காக வந்தது?எப்படி வந்தது?அது வந்த பிறகு என்ன நடக்கிறது என்பதை சுவாரசியம் கலந்து சொல்லியிருப்பதாக அமைந்திருக்கிறது. இந்த டீசர் தற்போது ரசிகர்களின் எதிர்பார்ப்பை அதிகரித்துள்ளது. குறிப்பாக கருணாகரன் 'ஏலியன்லாம் நம்ம ஜானரேஇல்லையேப்பா...' எனப் பேசும் வசனத்திற்குப் பிறகு ஒரு காட்சி காண்பிக்கப்படுகிறது. பார்ப்பவர்களை அது பிரமிக்க வைக்கிறது.