மாஸ்டர் ரிலீஸ் குறித்து தயாரிப்பாளர்!

பிகில் படத்தை தொடர்ந்து விஜய் நடித்துள்ள அடுத்த படம் மாஸ்டர். இந்த படத்தை மாநகரம், கைதி உள்ளிட்ட படங்களை இயக்கிய லோகேஷ் கனகராஜ் இயக்கியுள்ளார்.

அனிருத் இசையமைக்க, விஜய்யுடன் விஜய்சேதுபதி, ஷாந்தனு, மாளவிகா மோகனன் உள்ளிட்ட நடிகர்கள் பலர் இப்படத்தில் நடித்துள்ளனர். கடந்த ஏப்ரல் 9ஆம் தேதி வெளியாகுவதாக இருந்த மாஸ்டர் திரைப்படம் கரோனா ஊரடங்கால் ஒத்திவைக்கப்பட்டது. திரையரங்குகள் எப்போது திறக்கப்படுமோ அதுவரை மாஸ்டர் படம் வேறு எந்த ஓடிடியில் வெளியிடப்போவதில்லை என்று படக்குழு திட்டவட்டமாக முன்பே தெரிவித்திருந்தது.

தற்போது திரையரங்குகளை நிபந்தனைகளுக்கு உட்பட்டு திறக்க தமிழக அரசு அனுமதி வழங்கியுள்ளது. தீபாவளி பண்டிகை சமயம் என்பதால் கண்டிப்பாக மாஸ்டர் படம் வெளியாகும் என்று பலரும் எதிர்பார்த்து வந்தனர்.

இந்த எதிர்பார்ப்புகளுக்கு முற்றுபுள்ளி வைக்கும் விதமாக மாஸ்டர் பட தயாரிப்பாளர் தெரிவிக்கையில், தமிழகத்தில் திரையரங்குகள் திறக்கப்பட்டாலும் உலகம் முழுவதும் திறக்கப்படவில்லை என்பதால் தீபாவளிக்கு மாஸ்டர் படம் வெளியாகாது என்றார்.