Skip to main content

“ப்ளூ ஜே.பி...” - சட்டப் பேரவையில் ஆபாசப் படம் பார்த்த பா.ஜ.க எம்எல்ஏ குறித்து பிரபல நடிகர்

Published on 30/03/2023 | Edited on 30/03/2023

 

prakash raj about BJP MLA Jadab Lal Nath watching obscene reels in  Tripura assembly session

 

திரிபுரா மாநில சட்டப்பேரவைக் கூட்டம் நடைபெற்று வருகிறது. அப்போது கூட்டத்தின் நடுவே பாக்பாசா தொகுதி பா.ஜ.கவை சேர்ந்த எம்.எல்.ஏ ஜாதப் லால் நாத் தனது டேப்லெட்டில் ஆபாசப் படம் பார்த்துள்ளார். இது தொடர்பான வீடியோ சமூக வலைத்தளங்களில் வெளியாகி வைரலாகி வருகிறது. 

 

மார்க்சிஸ்ட் கம்யூனிஸ்ட் கட்சியில் இருந்த ஜதாப் லால் நாத், 2018ஆம் ஆண்டில் பாஜகவில் இணைந்தார். இந்தாண்டு நடைபெற்ற தேர்தலில் பா.ஜ.க சார்பில் போட்டியிட்டு வெற்றி பெற்றார். முதல் முறை எம்எல்ஏவாக வெற்றி பெற்று சட்டமன்றத்தில் நுழைந்துள்ளார் என்பது குறிப்பிடத்தக்கது.

 

சட்டப்பேரவையில் ஒரு எம்.எல்.ஏ ஆபாசப்படம் பார்த்திருப்பது பலருக்கும் ஆச்சரியத்தை ஏற்படுத்தியுள்ளது. மேலும் சமூக வலைத்தளங்களில் இதற்கு பலரும் கண்டனம் தெரிவித்து வருகின்றனர். அந்த வகையில் நடிகரும் அரசியல் விமர்சகருமான பிரகாஷ் ராஜ், பா.ஜ.க எம்.எல்.ஏ ஆபாசப் படம் பார்த்த வீடியோவை தனது ட்விட்டர் பக்கத்தில் பகிர்ந்து, "ப்ளூ ஜே.பி... அசிங்கம்" எனப் பதிவிட்டுள்ளார். முன்னதாக கர்நாடகா, ஒடிசா உள்ளிட்ட மாநில சட்டப்பேரவையில் எம்எல்ஏக்கள் ஆபாசப் படம் பார்த்து சிக்கியுள்ளனர். 

 

 

 

 

சார்ந்த செய்திகள்

Next Story

“கலைஞர் இருக்குற வரைக்கும் எவனும் இங்க வாலாட்ட முடியல” - பிரகாஷ் ராஜ் 

Published on 01/06/2024 | Edited on 06/06/2024
prakash raj about kalaingar

சென்னை பாரிமுனையில் உள்ள ராஜா அண்ணனாமலை மன்றத்தில் முன்னாள் முதலமைச்சர் கலைஞரின் நூற்றாண்டு நிறைவு விழாவினை சிறப்பிக்கும் வகையில், அமைச்சர் சேகர்பாபு ஏற்பாட்டில் கலைஞரின் வரலாற்று புகைப்பட கண்காட்சி இடம்பெற்றுள்ளது. அதை நடிகர் பிரகாஷ் ராஜ் திறந்து வைத்தார். பின்பு செய்தியாளர்களிடம் பேசிய அவர், “அற்புதமான ஆவணப்படம். எனக்கு பேச்சே வரவில்லை. மனசு 30 ஆண்டுகாலத்துக்கு பின்னாடி போகுது. கலைஞரைப் பற்றிய பாசமும், அவரது கொள்கையைப் பற்றிய புரிதலையும் உள்வாங்கியவர்களால் மட்டும் தான் இது போன்ற பதிவை பதிவு செய்ய முடியும். இருவர் படம் நடிச்சு 28 வருஷம் ஆச்சு.  

இன்றைய தொழில்நுட்பத்தில் கலைஞருடைய நியாபகங்களை, அவருடைய பேச்சுக்களை மீண்டும் கேட்பது மாதிரி பதிவு, அற்புதமான ஒன்று. அவராக நடிக்க இருவர் படத்துல எனக்கு ஒரு வாய்ப்பு கிடைச்சுது மகிழ்ச்சி. அவரை சந்திப்பதற்கு முன்னாடி அவரை மாதிரி வாழ்ந்தது போல் ஒரு ஃபீல். கிட்டதட்ட இரண்டு வருஷம் அவரைப் பற்றி படிச்சேன். நான் கர்நாடகாவிலிருந்து வந்தவன். அதனால் அவருடைய அந்த தமிழ் உச்சரிப்பு கத்துக் வேண்டும். அந்த தமிழை கத்துக்க கத்துக்க, அந்த மொழியுடைய கர்வத்துல அவருடைய அற்புதமான கொள்கைகளும், அவருடைய வாழ்க்கையின் பயணங்களும் என்னால் உணர முடிஞ்சது. 

ஏனென்றால் அந்த கதாபாத்திரத்தை ஒரு நடிகராக மட்டும் நடிக்க முடியாது. அந்த படத்தில் நடித்ததை விட இப்படியொரு மகானை நான் சந்திக்க நேர்ந்தது மிக முக்கியம். இன்றைக்கு நான் இப்படி பேசுவதற்கு காரணம் அப்படியொரு மனிதனை இரண்டு ஆண்டுகள் படித்தது தான் காரணம். சமீபத்தில் சாதி அரசியல் உள்ளிட்ட நிறைய அரசியல் குறித்து ஒரு பேட்டியில் பேசினேன். அப்போது நீங்க அதை பத்தி ரொம்ப பேசுறீங்கன்னு சொன்னாங்க, கலைஞர் இருந்திருந்தால் நான் பேச வேண்டிய அவசியமே இருந்திருக்காது என்றேன். அவர் இருக்குற வரைக்கும் எவனும் இங்க வாலாட்ட முடியல. கலைஞருடைய நூற்றாண்டு விழா கொண்டாடிட்டு இருக்கிற நாட்டுல ஒரு நூற்றாண்டின் கலைஞரை கொண்டாடிட்டு இருக்கீங்கன்னு நம்புறேன். அவர் சினிமாவில் நல்ல டயலாக் எழுதினாரு என்பதை விட அப்போதே 69 சதவிகிதம் இடஒதுக்கீட்டை கொண்டு வந்தது தான் முக்கியம். அடுத்த தலைமுறைக்கு கலைஞர் இருந்தார் என்ற செய்தியை விட ஏன் கலைஞர் ஆனார், அவரது வாழ்வியல் எப்படி இருந்தது என்பதை தெரிந்து கொள்ள வேண்டும்.  

தண்டவாளத்தில் தலையை கொண்டு வைத்திருக்கிறார் என்றால் எப்படியொரு நெருப்பு அவரிடம் இருந்திருக்கும். அதை மறக்கவே முடியாது. அபியும் நானும் பட ஆடியோ லாஞ்சுக்கு ஒரு நாள் முன்னாடிதான் ஃபோன் போட்டு சொன்னேன். உடனே வந்துவிட்டார். இலக்கியம், கொள்கை உள்ளிட்டவைகளை பேசுவார். நான் இரண்டு வருஷம் படித்ததை விட நிறைய விஷயங்கள் இந்த புகைப்பட கண்காட்சியில் பதிவு செய்யபட்டிருக்கு. கொள்கையை வைத்து ஒரு தலைவரானதும், மக்களின் அன்பை இன்றைக்கும் அவர் சம்பாதித்தது, ஒரு உண்மையான தலைவனுக்கான விஷயம். எங்களுக்கு அவர் வழிகட்டியாக இருக்கிறார். கலைஞரின் கொள்கை வழியில் முதல்வர் ஸ்டாலின் செயல்படுகிறார். இந்தியாவில் முதல் மாநிலமாக தமிழ்நாடு இயங்கிக் கொண்டிருக்கிறது. அது இன்னும் உயரும். எதையும் எதிர்த்து நிற்கும் துணிச்சல் முதலமைச்சர் மு.க.ஸ்டாலினுக்கு இருக்கிறது. ஒரு முதல்வரே அப்படி நிற்கும் போதுதான் மக்களுக்கு ஒரு நம்பிக்கை வரும், நான் எங்கு சென்றாலும் எனக்கு வீடு (தமிழ்நாடு) இருக்கிறது என்று சொல்ல நம்பிக்கை இருக்கிறது. என் செல்லத்த ஒன்னும் பண்ண முடியாது. கலைஞருடைய சிந்தனை தமிழ்நாட்டு மக்கள் மனதில் இருக்கிறது.  நிறைய ஷூட்டிங்கில் மக்கள் வருவார்கள். கன்னியாகுமரி ஷூட்டிங்கில் மோடியே ஆடியன்ஸை கூட்டிட்டு போறார். .” என்றார். 

Next Story

மிதக்கும் வடகிழக்கு மாநிலங்கள்; மீட்புப்பணிகள் தீவிரம்!

Published on 30/05/2024 | Edited on 30/05/2024
Floating Northeast States; Intensive rescue work

வங்கக் கடலில் உருவான ஆழ்ந்த காற்றழுத்த தாழ்வு மண்டலம் புயலாக மாறியது. இந்த புயலுக்கு ரிமால் எனப் பெயரிடப்பட்டது. இது வங்காள தேசம் மற்றும் அதையொட்டிய மேற்குவங்க மாநில கடற்கரை இடையே கடந்த 26 ஆம் தேதி (26.05.2024) நள்ளிரவில் கரையைக் கடந்தது. இதன் காரணமாக வடகிழக்கு மாநிலங்களான அசாம், திரிபுரா, மணிப்பூர் மற்றும் மிசோரம் போன்ற மாநிலங்களில் கனமழை பெய்தது. இதனால் சாலைகள் மழை நீரில் அடித்துச் செல்லப்பட்டன. மேம்பாலங்கள் உடைந்தன. விளைநிலங்கள் வெள்ளத்தில் மிதந்தன.

இதனையடுத்து ராணுவ வீரர்கள் மீட்புப் பணியில் ஈடுபட்டனர். மழை வெள்ளத்தில் சிக்கிய பொதுமக்களைப் பத்திரமாக வெளியேற்றுவதற்கும், உதவி பொருட்களைக் கொண்டு செல்வதற்கும் தற்காலிக சாலைகள், பாலங்கள் அமைத்து வருகின்றனர். அந்த வகையில் மணிப்பூர் மற்றும் மிசோரம் மாநிலங்களில் ரிமால் புயலின் போது பெய்த மழையால் ஏற்பட்ட வெள்ளம் போன்ற சூழ்நிலையில் ராணுவம் மற்றும் அசாம் ரைபிள்ஸ் விரிவான நிவாரண மற்றும் மீட்பு நடவடிக்கைகளை மேற்கொண்டு வருகின்றன. 

Floating Northeast States; Intensive rescue work

இந்த மழை வெள்ள பாதிப்பு குறித்து ராணுவ அதிகாரி அதிகாரிகள் கூறுகையில், ‘மணிப்பூரில் மழை வெள்ளத்தால் பாதிக்கப்பட்ட பகுதிகளில் இருந்து இன்று (30.05.2024) வரை 1500க்கும் மேற்பட்ட பெண்கள் மற்றும் 800 குழந்தைகள் உட்பட மொத்தம் 4000க்கும் மேற்பட்ட நபர்களை மீட்புப் படையினர் வெற்றிகரமாக மீட்டுள்ளனர். மீட்புப் பணிகளின் போது பாதிக்கப்பட்ட மக்களுக்கு அத்தியாவசியப் பொருட்கள் கிடைப்பதை உறுதி செய்வதற்காக உணவுப் பொட்டலங்கள் விநியோகம் செய்யப்பட்டன. அவசர மற்றும் அத்தியாவசியத் தேவையை நிவர்த்தி செய்ய ஏராளமான வீடுகளுக்குச் சுத்தமான குடிநீரும் வழங்கப்பட்டது” எனத் தெரிவித்தனர்.