"வலிமை அப்டேட் சம்பவம் இன்னும் நினைவில் உள்ளது..." - மொயின் அலி பேட்டி!

இங்கிலாந்தைச் சேர்ந்த ஆல்ரவுண்டர் மொயின் அலி, டெஸ்ட் கிரிக்கெட் போட்டிகளில் இருந்து ஓய்வு பெறுவதாக நேற்று அறிவித்தார். அதே நேரத்தில், ஒருநாள் மற்றும் டி20 போட்டிகளில் தொடர்ந்து விளையாட உள்ளார். நடப்பு ஐபிஎல் தொடரில் மொயின் அலி சென்னை அணிக்காக விளையாடிவரும் நிலையில், தன்னுடைய டெஸ்ட் போட்டி அனுபவங்கள் குறித்து மொயின் அலி பேசிய சிறிய காணொளியைச்சென்னை அணி நிர்வாகம் தன்னுடைய ட்விட்டர் பக்கத்தில் பகிர்ந்துள்ளது. 1 நிமிடங்கள் 12 நொடிகள் கொண்ட அந்த காணொளியில் இங்கிலாந்து டெஸ்ட் அணிக்காக விளையாடியது, தன்னுடைய சிறந்த டெஸ்ட் இன்னிங்ஸ், சேப்பாக்கம் மைதானத்தில் இந்தியாவிற்கு எதிராக விளையாடியது மற்றும் தன்னுடைய ஓய்வு அறிவிப்பு குறித்து அவர் சுருக்கமாகப் பேசியுள்ளார்.

அதில், சென்னை சேப்பாக்கம் மைதானத்தில் விளையாடியது குறித்து கூறுகையில், "போட்டியின்போது தொடர்ந்து வலிமை அப்டேட் கேட்டது இன்னும் தனக்கு நினைவில் இருப்பதாகத்தெரிவித்தார். மொயின் அலி பேசிய இந்தக் காணொளி தற்போது இணையத்தில் வைரலாகிவருகிறது.

சென்னை சேப்பாக்கம் மைதானத்தில் இந்தாண்டின் தொடக்கத்தில் நடைபெற்ற இந்தியா - இங்கிலாந்து அணிகளுக்கு இடையேயான டெஸ்ட் போட்டியின்போது ஃபீல்டிங்கில் நின்ற மொயின் அலியிடம் அஜித் ரசிகர்கள் சிலர் வலிமை அப்டேட் கேட்டது குறிப்பிடத்தக்கது.